Instant Loans: డిజిటల్ లోన్ యాప్‌లతో సింపుల్‌గా లోన్.. ఆ తర్వాత?!

Digital Lending: ప్రస్తుత డిజిటల్ కాలంలో లోన్ తీసుకోవడం అనేది చాలా సులభంగా మారిపోయింది. బ్యాంకుల చుట్టూ ప్రదక్షిణలు చేయాల్సిన అవసరం లేకుండా, స్మార్ట్‌ఫోన్ క్లిక్‌తో డబ్బులు ఖాతాలో పడిపోతున్నాయి. అయితే, ఈ సౌలభ్యం వెనుక ఉన్న లాభాలను, నష్టాలను లోతుగా పరిశీలించాల్సిన అవసరం ఉంది.

ప్రయోజనాలు :
తక్షణ ఆర్థిక భరోసా: అత్యవసర వైద్య ఖర్చులు లేదా పెండింగ్ బిల్లుల కోసం ఎవరినీ అడగాల్సిన పని లేకుండా నిమిషాల్లో రుణం లభిస్తుంది.

క్రెడిట్ స్కోర్ లేకున్నా: సాధారణంగా బ్యాంకులు సిబిల్ (CIBIL) స్కోర్ తక్కువ ఉంటే లోన్ ఇవ్వవు, కానీ ఈ యాప్‌లు తక్కువ స్కోర్ ఉన్నవారికి కూడా చిన్నపాటి రుణాలు అందిస్తాయి.

పేపర్ లెస్ ప్రాసెస్: ఎలాంటి ఫిజికల్ డాక్యుమెంట్లు సమర్పించాల్సిన అవసరం లేదు. ఈ-కేవైసీ (E-KYC) ద్వారా ఇంటి వద్ద నుంచే అప్పు పొందవచ్చు.

నష్టాలు :
చక్రవడ్డీల మాయాజాలం: ఈ యాప్‌లు ఒక రోజు జాప్యం జరిగినా భారీ జరిమానాలు విధిస్తాయి. వడ్డీ మీద వడ్డీ వేస్తూ అప్పును కొండలా పెంచేస్తాయి.

రహస్య సమాచారం : ఈ యాప్‌లు మీ గ్యాలరీలోని ఫోటోలు, వీడియోలు, లొకేషన్ వివరాలను సేకరిస్తాయి. ఈ డేటాను మూడో వ్యక్తికి అమ్మేసే ప్రమాదం కూడా ఉంది.

సైకలాజికల్ ఒత్తిడి: రికవరీ ఏజెంట్లు చేసే ఫోన్ కాల్స్, అసభ్యకరమైన మెసేజ్‌లు, మీ కాంటాక్ట్ లిస్ట్‌లోని వ్యక్తులకు ఫోన్ చేయడం వంటి చర్యల వల్ల బాధితులు తీవ్ర మానసిక ఒత్తిడికి లోనవుతున్నారు.

నకిలీ యాప్‌ల బెడద: ప్లే స్టోర్‌లో చైనాకు చెందిన అనేక అక్రమ యాప్‌లు చలామణిలో ఉన్నాయి. ఇవి ఒకసారి మొబైల్‌లోకి వస్తే మన వ్యక్తిగత సమాచారాన్ని దొంగిలిస్తాయి.

అత్యవసరం అయితే తప్ప డిజిటల్ లెండింగ్ యాప్‌ల జోలికి వెళ్లకపోవడమే మంచిది. ఒకవేళ తీసుకోవాల్సి వస్తే, అవి ఆర్‌బీఐ (RBI) రిజిస్టర్డ్ సంస్థలవేనా అని ప్లే స్టోర్ రివ్యూలు , వెబ్‌సైట్ ద్వారా క్రాస్ చెక్ చేసుకోవాలి.