TAJA: తాజా 24వ అధ్యక్షుడిగా సాయిశంకర విశ్వనాధ బాధ్యతల స్వీకారం..

హైదరాబాద్: అమెరికాలోని ఫ్లోరిడా రాష్ట్రం, జాక్సన్‌విల్లేలో దశాబ్దాలుగా తెలుగు సంస్కృతిని కాపాడుతూ, ప్రోత్సహిస్తున్న ‘తెలుగు అసోసియేషన్ ఆఫ్ జాక్సన్‌విల్లే’ (TAJA) కొత్త నాయకత్వాన్ని ఎన్నుకుంది. సంఘం 24వ అధ్యక్షుడిగా సీనియర్ సభ్యులు సాయిశంకర విశ్వనాధ బాధ్యతలు స్వీకరించారు. గత 26 ఏళ్లుగా జాక్సన్‌విల్లేలో నివసిస్తున్న ఆయన, తన కుటుంబ సమేతంగా (సతీమణి జానకి, పిల్లలు హర్ష, సత్యశ్రీ) కమ్యూనిటీ సేవలలో చురుగ్గా పాల్గొంటున్నారు. ఈ ఏడాది ఆయన సారథ్యంలో ‘తాజా’ అనేక వినూత్న కార్యక్రమాలకు శ్రీకారం చుట్టబోతోంది.

మన సంస్కృతి – మన మూలాలు..
సాయిశంకర విశ్వనాధ నాయకత్వంలోని కొత్త కమిటీ ప్రధానంగా మన మాతృభాషను తర్వాతి తరాలకు అందించడంపై దృష్టి పెట్టింది. ఇందులో భాగంగా ‘తెలుగు బడి’ని మళ్లీ పునర్నిర్మించనున్నట్లు ఆయన ప్రకటించారు. ప్రవాస తెలుగు రాష్ట్రాల పిల్లలకు తెలుగు భాషను, మన సంస్కృతిని ఉచితంగా, సరళ రీతిలో బోధించడమే ఈ బడి ముఖ్య ఉద్దేశం. అంతేకాకుండా, ఈ ఏడాది నుండి అధికారికంగా ‘తెలుగు భాషా దినోత్సవం’ వేడుకలను కూడా నిర్వహించబోతున్నట్లు తాజా కమిటీ గర్వంగా ప్రకటించింది.

సంఘం కేవలం పండుగ వేడుకలకే పరిమితం కాకుండా, సమాజ సేవలోనూ ముందుండాలని తాజా నిర్ణయించింది.

ఛారిటీ ఈవెంట్స్: ప్రతి మూడు నెలలకు ఒకసారి (త్రైమాసికంలో) స్థానిక అవసరాలను గుర్తించి స్వచ్ఛంద కార్యక్రమాలు నిర్వహించనున్నారు.

యువతకు పెద్దపీట: రేపటి తరం నాయకులను తయారుచేసే క్రమంలో యువతను సంఘం కార్యకలాపాల్లో భాగస్వాములను చేస్తూ, వారిని నాయకత్వ స్థానాల్లోకి ప్రోత్సహించనున్నారు.

ప్రత్యేక ఈవెంట్స్: కేవలం తాజా సభ్యుల కోసం మాత్రమే కొన్ని ప్రత్యేకమైన సంప్రదాయ, విద్యా సంబంధిత కార్యక్రమాలు నిర్వహించి సంఘాన్ని మరింత బలోపేతం చేయనున్నారు.

పారదర్శకతతో కూడిన నాయకత్వం
కొత్త అధ్యక్షుడిగా బాధ్యతలు చేపట్టిన సాయిశంకర విశ్వనాధ మాట్లాడుతూ.. భిన్న అభిప్రాయాలను గౌరవిస్తూ, అందరినీ కలుపుకుంటూ పారదర్శకమైన పాలన అందిస్తామని హామీ ఇచ్చారు. సభ్యుల అభిప్రాయాలకు విలువనిస్తూ, వారి సూచనల మేరకు తాజా కార్యక్రమాలను మెరుగుపరుస్తామని తెలిపారు. స్నేహపూర్వకమైన, అంకితభావం గల కార్యవర్గ సభ్యులతో కలిసి పనిచేయడం తనకెంతో గర్వంగా ఉందని ఆయన పేర్కొన్నారు. 24 ఏళ్ల సుదీర్ఘ ప్రస్థానం కలిగిన ‘తాజా’ 2026-27 సంవత్సరంలో మరిన్ని చిరస్మరణీయ విజయాలను సాధించాలని సభ్యులందరూ ఆకాంక్షిస్తున్నారు. ఏవైనా వివరాల కోసం లేదా ప్రశ్నల కోసం నేరుగా తాజా కార్యవర్గాన్ని సంప్రదించవచ్చని సాయిశంకర విశ్వనాధ విజ్ఞప్తి చేశారు.

నూతన సభ్యుల వివరాలు తెలుసుకోవడానికి ఇక్కడ క్లిక్ చేయండి