Suspicious Husband: వీడు మనిషేనా..! భార్య అందంగా ఉందని ఇంత దారుణమా.. ఛీ.. ఛీ!!

Suspicious husband: భార్య అందంగా ఉంటే సంతోషించాల్సింది పోయి, ఆమె అందమే తన కొంప ముంచుతుందనే వికృత ఆలోచనతో ఓ భర్త చేసిన దారుణానికి కర్ణాటకలోని బాగల్‌కోట జిల్లా వేదికైంది. తోదలబాగి గ్రామానికి చెందిన ఉమేష్, లక్ష్మీబాయి భార్యాభర్తలు. లక్ష్మీబాయికి పొడవాటి జడ ఉండటంతో పాటు ఆమె అందంగా అలంకరించుకోవడం ఉమేష్‌కు ఏమాత్రం నచ్చేది కాదు. ఆమెను చూసి యువకులు ఆకర్షితులవుతున్నారనే అనుమానంతో అతడు మానసిక రోగిలా ప్రవర్తించేవాడు.

వికృత చేష్ట:

ఈ క్రమంలోనే సోమవారం రాత్రి మద్యం మత్తులో ఇంటికి చేరిన ఉమేష్, భార్యతో తీవ్రంగా గొడవపడ్డాడు. ఆమె అందాన్ని పూర్తిగా తుడిచిపెట్టాలని నిర్ణయించుకున్న అతడు, చెరుకు నరికే రేజర్ కత్తితో ఆమెను బెదిరించాడు. తీవ్ర భయాందోళనకు గురైన లక్ష్మీబాయిని బలవంతంగా పట్టుకుని, ఆమె తలపై ఉన్న జుట్టును పూర్తిగా తొలగించి గుండు చేశాడు. ఆమె ఆర్తనాదాలు విన్న పొరుగువారు వెంటనే అక్కడికి చేరుకుని ఉమేష్ కబంధ హస్తాల నుండి ఆమెను రక్షించారు.

పోలీసుల స్పందన:

బాధితురాలి పట్ల ఉమేష్ ప్రవర్తించిన తీరుపై గ్రామస్థులు, మహిళా సంఘాలు తీవ్ర ఆగ్రహం వ్యక్తం చేశాయి. కేవలం జుట్టు విషయంలో ఇంతటి కిరాతకానికి ఒడిగట్టడం అతనిలోని మానసిక వైకల్యానికి పరాకాష్ట అని స్థానికులు పోలీసులకు ఫిర్యాదు చేశారు. ఫిర్యాదు అందుకున్న పోలీసులు నిందితుడిని అదుపులోకి తీసుకుని గృహ హింస, మహిళల ఆత్మగౌరవాన్ని దెబ్బతీసే సెక్షన్ల కింద కేసు నమోదు చేశారు. ప్రస్తుతం బాధితురాలికి వైద్య పరీక్షలు నిర్వహించిన అధికారులు, ఆమెకు తగిన రక్షణ కల్పిస్తామని హామీ ఇచ్చారు. ఈ ఘటన సమాజంలో మహిళల భద్రత, పెరుగుతున్న అనుమానపు ప్రవృత్తిపై ఆందోళన కలిగిస్తోంది.