Jaishankar: జైశంకర్‌కు ఇరాన్ విదేశాంగ మంత్రి ఫోన్.. బ్రిక్స్ సహకారం కోసం విజ్ఞప్తి

పశ్చిమాసియాలో భౌగోళిక ఉద్రిక్తతలు నానాటికీ తీవ్రమవుతున్న క్లిష్ట పరిస్థితుల మధ్య దౌత్యపరమైన మంతనాలు వేగవంతమయ్యాయి. తాజాగా భారత విదేశాంగ శాఖ మంత్రి ఎస్. జైశంకర్‌తో (Jaishankar) ఇరాన్ విదేశాంగ మంత్రి అబ్బాస్ అరాగ్చీ ఫోన్‌లో సుదీర్ఘంగా చర్చించారు. తాజా ఘర్షణలు మొదలైనప్పటి నుంచి ఈ ఇద్దరు అగ్ర నేతలు ఫోన్‌లో మాట్లాడుకోవడం ఇది నాలుగోసారి కావడం ప్రస్తుత పరిస్థితుల తీవ్రతకు అద్దం పడుతోంది.

ఈ కీలక సంభాషణలో ఇరాన్ విదేశాంగ మంత్రి ప్రధానంగా పశ్చిమాసియాలో నెలకొన్న తాజా యుద్ధ పరిస్థితులను జైశంకర్‌కు (Jaishankar) వివరించారు. ఇజ్రాయెల్, అమెరికా దాడుల వల్ల ప్రాంతీయంగా, అంతర్జాతీయంగా శాంతి భద్రతలకు వాటిల్లుతున్న ముప్పును ఆయన ప్రస్తావించినట్లు ఇరాన్ ప్రభుత్వ మీడియా వెల్లడించింది. తమ దేశ సార్వభౌమత్వంపై దాడులు జరిగినప్పుడు, తమను తాము రక్షించుకునే (సెల్ఫ్ డిఫెన్స్) పూర్తి చట్టబద్ధమైన హక్కు ఇరాన్‌కు ఉందని అరాగ్చీ స్పష్టం చేశారు. ఈ పోరాటంలో తమ ప్రభుత్వం, భద్రతా దళాలు, ప్రజలు ఏకతాటిపై అత్యంత పట్టుదలతో ఉన్నారని ఆయన ఉద్ఘాటించారు. ముఖ్యంగా ప్రపంచ శాంతి, అంతర్జాతీయ సుస్థిరతను కాపాడేందుకు ‘బ్రిక్స్’ (BRICS) కూటమి దేశాలు సమన్వయంతో సహకరించాలని ఈ సందర్భంగా అరాగ్చీ విజ్ఞప్తి చేయడం గమనార్హం.