వంటగదిలో గంటల పని వద్దు.. ఈ స్మార్ట్ టిప్స్‌తో వంట పనిని సగం చేసేయండి!

రోజూ వంట చేసే సమయంలో చిన్న పనులకే ఎక్కువ సమయం వెచ్చించాల్సి వస్తుంది. ముఖ్యంగా కూరగాయలు సిద్ధం చేయడం, ఆకుకూరలు నిల్వ చేయడం, మసాలాలు అందుబాటులో ఉంచుకోవడం వంటి పనులను ముందుగానే సరిగ్గా చేసుకుంటే వంటగదిలో గడిపే సమయం తగ్గుతుంది. అందుకే రోజువారీ వంటను సులభతరం చేసే ఈ ఐదు చిట్కాలను ప్రయత్నించవచ్చు.

ఆకులు, అల్లం-వెల్లుల్లి నిల్వ

కొత్తిమీర (Coriander), కరివేపాకు (Curry Leaves), పుదీనా (Mint) వంటి ఆకులను కొనుగోలు చేసిన వెంటనే శుభ్రం చేసి పూర్తిగా తేమ లేకుండా తుడవాలి. వాటిని కిచెన్ టిష్యూ (Kitchen Tissue)లో చుట్టి గాలి చొరబడని డబ్బాలో లేదా జిప్ కవర్‌లో ఉంచితే త్వరగా వాడిపోకుండా కొంతకాలం తాజాగా ఉంచుకోవచ్చు. డబ్బాలో నీటి బిందువులు కనిపిస్తే టిష్యూ మార్చాలి.

అల్లం (Ginger), వెల్లుల్లి (Garlic)లను ప్రతిరోజూ విడిగా తొక్కడం సమయం తీసుకుంటుంది. వీటిని ఒకేసారి శుభ్రం చేసి అవసరమైన పరిమాణంలో పేస్ట్‌గా తయారు చేసుకుని శుభ్రమైన గాజు సీసాలో భద్రపరచుకోవచ్చు. చిన్న పరిమాణాల్లో తయారు చేసి ఫ్రిజ్‌లో ఉంచడం మంచిది. వాసన, రంగు లేదా రుచి మారితే ఉపయోగించకుండా కొత్తగా తయారు చేసుకోవాలి.

కూరగాయలు ముందస్తు స్టోరేజ్ టిప్స్

కూరగాయలు కోయడంలో సమయం ఆదా కావాలంటే వారానికి రెండు మూడు రోజుల అవసరానికి సరిపడే కూరగాయలను ముందుగానే శుభ్రం చేసి, పూర్తిగా ఆరిన తర్వాత కట్ చేసుకోవచ్చు. అయితే అన్ని కూరగాయలను ఒకే విధంగా నిల్వ చేయకూడదు. త్వరగా పాడయ్యే వాటిని తక్కువ పరిమాణంలోనే సిద్ధం చేసుకోవడం మంచిది. కట్ చేసిన కూరగాయలను తగిన కంటైనర్లలో ఫ్రిజ్‌లో ఉంచితే వంట సమయంలో పని తగ్గుతుంది. మునగాకు ,పొన్నగంటాకు వంటి ఆకుకూరలను ముందుగానే ఉడికించి ఫ్రిడ్జ్ లో భద్రపరచుకోవచ్చు.

పొడి పదార్థాలు, మసాలాల స్మార్ట్ స్టోరేజ్

పప్పులు (Pulses), బియ్యం (Rice), రవ్వ (Semolina), పిండి వంటి పొడి పదార్థాలను పారదర్శకమైన ఎయిర్‌టైట్ కంటైనర్లలో ఉంచడం మరో ఉపయోగకరమైన చిట్కా. ప్రతి డబ్బాపై పదార్థం పేరు, కొనుగోలు చేసిన తేదీ రాసి పెడితే అవసరమైనవి వెంటనే గుర్తించవచ్చు. పాత స్టాక్‌ను ముందుగా ఉపయోగించేలా కొత్త సరుకును వెనుక ఉంచడం కూడా మంచిది.

చివరగా రోజూ ఉపయోగించే ఉప్పు, కారం, పసుపు, జీలకర్ర, ఆవాలు వంటి మసాలాలను స్టవ్‌కు దగ్గరగా సులభంగా అందుకునేలా ఒకే చోట అమర్చుకోవాలి. అయితే వేడి, ఆవిరి నేరుగా తగిలే ప్రదేశంలో కాకుండా పొడి ప్రదేశంలో ఉంచడం మంచిది. వంట మొదలుపెట్టే ముందు అవసరమైన పదార్థాలను ఒకసారి సిద్ధం చేసుకోవడం వల్ల మధ్యలో వెతుక్కోవాల్సిన పని ఉండదు. ముందు రోజే రేపు చేసే వంటకు సంబంధించిన అన్ని సామాన్లను సిద్ధం చేసుకోవడం వల్ల ఉదయాన్నే టెన్షన్ తగ్గుతుంది.

వంట పనిని సులభం చేసే చిన్న మార్పులు

ఈ చిన్న మార్పులను రోజువారీ అలవాట్లుగా మార్చుకుంటే వంటగదిలో గందరగోళం తగ్గడంతో పాటు సమయం కూడా ఆదా అవుతుంది. ముఖ్యంగా ముందస్తు ప్రిపరేషన్, సరైన నిల్వ, వస్తువులను క్రమబద్ధంగా అమర్చుకోవడం వంట పనిని సులభంగా నిర్వహించేందుకు ఉపయోగపడతాయి.