16.6 మిలియన్ డాలర్ల నిధులతో అగ్రస్థానంలో రో ఖన్నా!

ఫెడరల్ ఎన్నికల కమిషన్ రికార్డుల పరిశీలన ప్రకారం, భారతీయ అమెరికన్ రాజకీయ నాయకుడు రో ఖన్నా తన ప్రచార నిధుల కింద 16.6 మిలియన్ డాలర్లు కలిగి ఉన్నారు. భారతీయ అమెరికన్ హౌస్ సభ్యులు, నూతనంగా ఎన్నికైన సభ్యులందరిలో ఇదే అత్యధిక రిజర్వ్ కావడం విశేషం. కాలిఫోర్నియాకు చెందిన ఈ డెమొక్రాట్ నేత వద్ద ఉన్న ఈ నగదు నిల్వ, మిగిలిన ఏడుగురు చట్టసభ సభ్యులు , ఎన్నికైన సభ్యుల వద్ద ఉన్న మొత్తం 11.1 మిలియన్ డాలర్ల కంటే కూడా అధికంగా ఉంది. రో ఖన్నాకు ఎలాంటి ప్రచార రుణాలు లేవని నివేదికలు స్పష్టం చేస్తున్నాయి. అక్టోబర్ 14 వరకు సాగిన 2026 ఎన్నికల ప్రక్రియలో ఆయన ప్రచార బృందం 15.3 మిలియన్ డాలర్ల ఆదాయాన్ని, 9.5 మిలియన్ డాలర్ల ఖర్చులను నమోదు చేసింది.

ఇతర సిట్టింగ్ సభ్యుల విషయానికి వస్తే, వాషింగ్టన్ ప్రతినిధి ప్రమీలా జయపాల్ వద్ద 1.75 మిలియన్ డాలర్లు, కాలిఫోర్నియా ప్రతినిధి అమీ బేరా వద్ద 1.65 మిలియన్ డాలర్ల నగదు నిల్వ ఉంది. అలాగే వర్జీనియా ప్రతినిధి సుహాస్ సుబ్రమణ్యం సుమారు 746,000 డాలర్ల నిల్వలను కలిగి ఉన్నారు. ప్రమీలా జయపాల్ , సుహాస్ సుబ్రమణ్యంలకు ఎలాంటి అప్పులు లేవు కాగా, అమీ బేరాకు 80,000 డాలర్ల బకాయి రుణం ఉంది. ఈ ఎన్నికల కాలంలో జయపాల్ ప్రచారానికి 2.9 మిలియన్ డాలర్లు రాగా, ఆమె 3.2 మిలియన్ డాలర్లు ఖర్చు చేశారు. అమీ బేరా 1.5 మిలియన్ డాలర్ల ఆదాయాన్ని, 1.7 మిలియన్ డాలర్ల వ్యయాన్ని చూపించగా, సుబ్రమణ్యం 1.7 మిలియన్ డాలర్లు సేకరించి సుమారు 1.1 మిలియన్ డాలర్లు ఖర్చు చేశారు.

ఎన్నికైన నూతన భారతీయ అమెరికన్ సభ్యుల విషయానికి వస్తే, వారి విజయానికి ముందు ప్రచార నిధులు తక్కువగా ఉండేవి. అరిజోనా 1వ కాంగ్రెషనల్ డిస్ట్రిక్ట్‌లో రిపబ్లికన్ అభ్యర్థి జే ఫీలీని ఓడించిన అమిష్ షా, అక్టోబర్ 14 నాటికి 5.7 మిలియన్ డాలర్ల ఆదాయాన్ని, 5.5 మిలియన్ డాలర్ల ఖర్చులను చూపించారు. ఆయన వద్ద దాదాపు 206,000 డాలర్ల నగదు నిల్వ ఉండగా, 37,000 డాలర్ల అప్పు ఉంది. ఫ్లోరిడా 22వ కాంగ్రెస్ నియోజకవర్గంలో కేసీ అస్కార్‌ను ఓడించిన పియా దండియా 4.6 మిలియన్ డాలర్ల ఆదాయాన్ని, 3.9 మిలియన్ డాలర్ల వ్యయాన్ని నమోదు చేశారు. ఆమె వద్ద 735,000 డాలర్ల నగదు, 247,000 డాలర్ల అప్పు ఉన్నాయి. ఆమె ప్రత్యర్థి ఫీలీ 3.8 మిలియన్ డాలర్ల ఆదాయాన్ని, 3.6 మిలియన్ డాలర్ల వ్యయాన్ని చూపిస్తూ 183,000 డాలర్ల నగదును, 330,000 డాలర్ల అప్పును మిగిల్చారు.

ఇతర భారతీయ అమెరికన్ చట్టసభ సభ్యులలో, ప్రతినిధి థానేదార్ సెప్టెంబర్ 30 నాటికి 5.9 మిలియన్ డాలర్ల నగదు నిల్వతో రెండవ స్థానంలో నిలిచారు. అయితే ఆయన ప్రచార బృందం మాత్రం తన నిల్వలను మించి 14.44 మిలియన్ డాలర్ల భారీ అప్పులో ఉన్నట్లు నివేదించింది. ఇక రాజా కృష్ణమూర్తి విషయానికి వస్తే, సెప్టెంబర్ 30 నాటికి ఆయన హౌస్ ప్రచార ఖాతాలో 47,000 డాలర్లు, సెనేట్ ప్రచార ఖాతాలో 33 వేల డాలర్లు ఉన్నాయి. ఆయన ప్రతినిధుల సభ ఖాతాలో 3.9 మిలియన్ డాలర్ల ఆదాయం, 21 మిలియన్ డాలర్ల ఖర్చులు నమోదు కాగా, సెనేట్ ఖాతాలో 31.6 మిలియన్ డాలర్ల ఆదాయం, 31.5 మిలియన్ డాలర్ల ఖర్చులు నమోదయ్యాయని నివేదికలు వెల్లడించాయి.