ఐటీ సోదాల వార్తలపై రకుల్ క్లారిటీ..! ఆ ప్రచారంలో నిజమెంతంటే?

కొన్ని రోజులుగా ఐటీ సోదాలకు సంబంధించిన వార్తల్లో తన పేరు వినిపించడంతో ర‌కుల్‌ ప్రీత్‌ సింగ్‌(Rakul Preeth Singh) స్పందించింది. తనకు సంబంధం లేని వ్యవహారంలోనూ తన పేరు ప్రస్తావిస్తూ కొన్ని కథనాలు వచ్చాయని ఆమె అభ్యంతరం వ్యక్తం చేసింది. వాస్తవాలను పూర్తిగా నిర్ధారించకుండానే ప్రచారం జరిగినట్టుగా పేర్కొంటూ, తాను ఎలాంటి అక్రమ విదేశీ నగదు లావాదేవీల్లో పాల్గొనలేదని క్లారిటీ ఇచ్చింది. తన తరఫున కానీ, ఏదైనా నిర్మాణ సంస్థ తరఫున కానీ అలాంటి లావాదేవీలు జరపలేదని చెప్పడంతో పాటు, ఇండియాలో లేదా విదేశాల్లో ఇతరుల కోసం బినామీ ఆస్తులు కలిగి ఉన్నానన్న ప్రచారాన్ని కూడా ఆమె ఖండించింది. దీంతో తనపై వస్తున్న ఊహాగానాలకు నేరుగా చెక్‌ పెట్టే ప్రయత్నం చేసినట్టుగా కనిపిస్తోంది.

అయితే ర‌కుల్‌ తన వివరణలో ప్రత్యేకంగా ట్యాక్స్‌ చెల్లింపుల అంశాన్ని ప్రస్తావించడం ఇప్పుడు ఆసక్తిని కలిగిస్తోంది. తాను బాధ్యతాయుతంగా పన్నులు చెల్లిస్తూ వస్తున్నానని చెప్పడం ద్వారా ఆర్థిక వ్యవహారాల విషయంలో తన వైపు ఎలాంటి అనుమానాలకు తావులేదనే విషయాన్ని స్పష్టం చేయాలని ఆమె భావించినట్టుగా తెలుస్తోంది. సాధారణంగా ఒక సెలబ్రిటీపై ఆర్థిక అవకతవకలకు సంబంధించిన ప్రచారం మొదలైతే, దాని ఇంపాక్ట్ కేవలం ఒక వార్తకే పరిమితం కాకుండా వ్యక్తిగత ప్రతిష్ఠపైనా పడే అవకాశం ఉంటుంది. అందుకే తన ట్యాక్స్‌ కంప్లయన్స్‌ను కూడా ప్రస్తావిస్తూ ర‌కుల్‌ తన ఇమేజ్‌ను డిఫెండ్‌ చేసుకునే ప్రయత్నం చేసినట్టుగా కనిపిస్తోంది.

మరోవైపు, ఐటీ శాఖ చేపట్టిన సోదాలు, వాటి వెనుక ఉన్న ఆర్థిక లావాదేవీలపై దర్యాప్తు మాత్రం ప్రత్యేకంగానే కొనసాగుతోంది. ఇప్పటివరకు ర‌కుల్‌ తప్పు చేసినట్లు నిర్ధారించే అఫీషియ‌ల్ ఇన్ఫ‌ర్మేష‌న్ బయటకు రాలేదు. దీంతో ఒకవైపు అధికారుల దర్యాప్తు ఎలాంటి ఫలితాలకు దారితీస్తుందో చూడాల్సి ఉండగా, మరోవైపు తనపై వచ్చిన ప్రచారానికి ర‌కుల్ ఇచ్చిన క్లారిటీనే ఇప్పుడు చర్చనీయాంశంగా మారింది. అఫీషియ‌ల్ గా ఏం తేలుతుందన్నది పక్కన పెడితే, తన పేరుతో వస్తున్న ఊహాగానాలకు మాత్రం ర‌కుల్‌ ముందుగానే ఫుల్‌స్టాప్‌ పెట్టే ప్రయత్నం చేసినట్టుగా చెప్పొచ్చు.