ప్రభాస్‌పై దుల్కర్ ఇంట్రెస్టింగ్ కామెంట్స్

మాస్ యాక్షన్ సినిమాలకే పరిమితమవకుండా, ప్రతి సినిమాతో కొత్త తరహా కథలను ఎంచుకునే ప్రయత్నం చేస్తున్న హీరోల్లో ప్రభాస్(prabhas) ఒకరని నటుడు దుల్కర్ సల్మాన్(Dulquer salman) చేసిన కామెంట్స్ ఇప్పుడు సినీ వర్గాల్లో ఇంట్రెస్టింగ్ డిస్క‌ష‌న్ కు దారితీశాయి. పాన్ ఇండియా స్టార్‌గా ఎదిగిన తర్వాత ప్రభాస్‌పై భారీ అంచనాలు, వెయ్యి కోట్ల మార్కెట్ ఒత్తిడి సహజంగానే పెరిగిందని, అయినప్పటికీ ఆయన సేఫ్ రూట్ ను ఎంచుకోకుండా విభిన్నమైన కథలతో ముందుకు సాగడం విశేషమని దుల్కర్ అభిప్రాయపడ్డారు. స్టార్‌డమ్‌ను కాపాడుకుంటూనే కొత్త జానర్లను అన్వేషించడం అంత సులభం కాదని ఆయన వ్యాఖ్యానించారు.

దుల్కర్ సల్మాన్ మాటల్లో ప్రభాస్ కెరీర్‌ను పరిశీలిస్తే, ఒకే తరహా కమర్షియల్ ఫార్ములాకు పరిమితం కాకుండా యాక్షన్, పీరియాడిక్, మైథలాజికల్, హారర్, రొమాంటిక్, సైన్స్ ఫిక్షన్ వంటి విభిన్న జానర్లలో సినిమాలు చేయాలనే ప్రయత్నం స్పష్టంగా కనిపిస్తుందని సినీ విశ్లేషకులు కూడా అభిప్రాయపడుతున్నారు. ప్రతి ప్రాజెక్ట్ రేంజ్ భారీగా ఉండటం వల్ల స‌క్సెస్‌పై ఒత్తిడి ఎక్కువైనా, కథల్లో కొత్తదనం కోసం రిస్క్ తీసుకోవడంలో ప్రభాస్ వెనుకడుగు వేయడం లేదనే అభిప్రాయం వ్యక్తమవుతోంది.

ప్రస్తుతం ఇండియ‌న్ సినీ మార్కెట్‌లో స్టార్ హీరోలు సేఫ్ జోన్లకే పరిమితమవుతున్నారనే విమర్శలు వినిపిస్తున్న వేళ, ప్రభాస్ మాత్రం భిన్నమైన కథలు, కొత్త ప్రపంచాలను ప్రేక్షకులకు పరిచయం చేయాలనే ప్రయత్నం కొనసాగిస్తున్నారని దుల్కర్ కామెంట్స్ మరోసారి గుర్తు చేశాయి. అభిమానుల అంచనాలు ఎంత పెద్దవైనా, ప్రతి సినిమాతో కొత్త అనుభూతిని అందించాలనే ఆలోచనే ప్రభాస్ ప్రయాణాన్ని ప్రత్యేకంగా నిలబెడుతోందని, అందుకే ఆయన సినిమా అనౌన్స్‌మెంట్ వచ్చిన ప్రతిసారి ప్రేక్షకుల్లో ఆసక్తి కొత్త స్థాయికి చేరుకుంటోందని ట్రేడ్ వర్గాలు విశ్లేషిస్తున్నాయి.