లోకేష్ తో బ‌న్నీ మైథాల‌జీ మూవీ?

అల్లు అర్జున్(allu arjun) ప్రస్తుతం అట్లీ(Atlee) దర్శకత్వంలో రూపొందుతున్న భారీ ప్రాజెక్ట్ రాకా(Raaka)తో బిజీగా ఉన్నప్పటికీ, ఆ తర్వాత చేయనున్న సినిమాపై కూడా ఇండస్ట్రీలో ఆసక్తికర చర్చ సాగుతోంది. డైరెక్ట‌ర్ లోకేష్ కనగరాజ్‌(lokesh kanagaraj)తో బన్నీ కాంబినేషన్‌లో తెరకెక్కనున్న సినిమా సాధారణ యాక్షన్ ఎంటర్‌టైనర్ కాకుండా కొత్త తరహా కాన్సెప్ట్‌తో ప్రేక్షకుల ముందుకు వచ్చే అవకాశాలు కనిపిస్తున్నాయి. లోకేష్ తన సినిమాల్లో స్టైలిష్ యాక్షన్, ఎమోషనల్ కాన్ఫ్లిక్ట్‌లను సమతూకంగా చూపించడంలో ప్రత్యేక గుర్తింపు తెచ్చుకున్నాడు. ఈసారి ఆ ఫార్ములాకు మరో కొత్త కోణాన్ని జోడించనున్నట్లు సినీ వర్గాల్లో ప్రచారం జరుగుతోంది.

సినిమా కథలో కీలకమైన భాగంగా పురాణాల నుంచి స్ఫూర్తి పొందిన ఓ స్పెష‌ల్ ట్రాక్ ఉంటుందని సమాచారం. అయితే ఇది పూర్తి స్థాయి పౌరాణిక సినిమాగా కాకుండా, కథలోని ప్రధాన మలుపుకు బలమైన నేపథ్యంగా ఉపయోగపడే ఎపిసోడ్‌గా ఉండే అవకాశం ఉందని చెబుతున్నారు. ఆ సీన్స్ లో అల్లు అర్జున్ ఇప్పటివరకు కనిపించని పవర్‌ఫుల్ లుక్‌లో దర్శనమిస్తాడనే టాక్ వినిపిస్తోంది. యాక్షన్‌కు మైథాలజీ టచ్‌ను జోడించడం ద్వారా ఆడియ‌న్స్‌కు భిన్నమైన అనుభూతి ఇవ్వాలన్నదే డైరెక్ట‌ర్ ఆలోచనగా తెలుస్తోంది.

ఇక అల్లు అర్జున్ కూడా చాలా కాలంగా పురాణాల నేపథ్యం ఉన్న క్యారెక్ట‌ర్ లో నటించాలని ఆసక్తి చూపుతున్నట్లు గతంలో పలుమార్లు వార్తలు వచ్చాయి. ఈ కొత్త ప్రాజెక్ట్ ద్వారా ఆ కోరిక కొంతవరకు నెరవేరే అవకాశముందని సినీ విశ్లేషకులు భావిస్తున్నారు. అయితే కథ, పాత్రల స్వరూపం లేదా మైథాలజీ ఎలిమెంట్స్‌పై చిత్రబృందం నుంచి ఇప్పటివరకు ఎలాంటి అఫీషియ‌ల్ అనౌన్స్‌మెంట్ రాలేదు. దీంతో ఈ ప్రాజెక్ట్‌పై వస్తున్న ప్రతి కొత్త సమాచారం అభిమానుల్లో మరింత ఆసక్తిని పెంచుతోంది.