Donald Trump: తృతీయ దేశాల వలసలకు చెక్..! ట్రంప్ క్లారిటీ…!

వైట్ హౌస్ కాల్పుల ఘటనను సీరియస్ గా తీసుకున్న అమెరికా ప్రభుత్వం.. దానికి తృతీయ ప్రపంచదేశాల నుంచి వచ్చిన వలసలే కారణమంటోంది. ఇక నుంచి తృతీయ ప్రపంచ దేశాల నుంచి తమ దేశంలోకి వచ్చే వలసలకు శాశ్వత విరామం ఇస్తామని అమెరికా అధ్యక్షుడు డొనాల్డ్‌ ట్రంప్‌ ప్రకటించారు. దేశ భద్రతకు ముప్పుగా పరిణమించే విదేశీయుల్ని వెనక్కి పంపించేస్తామని చెప్పారు. ఆందోళనకర దేశాల నుంచి వచ్చి గ్రీన్‌కార్డులు పొందినవారిలో ప్రతిఒక్కరినీ క్షుణ్నంగా పరిశీలిస్తామని తెలిపారు. శ్వేతసౌధం సమీపాన భద్రత బలగాలపై అఫ్గాన్‌ పౌరుడు జరిపిన కాల్పుల నేపథ్యంలో ఈ నిర్ణయాలు వెలువరించారు. కాల్పుల ఘటనలో తీవ్రంగా గాయపడిన ఇద్దరిలో ఒకరైన మహిళా నేషనల్‌ గార్డు సభ్యురాలు సారా బెక్‌స్ట్రోమ్‌ మరణించినట్లు ప్రకటించారు. మరొకరు చావుబతుకుల్లో, విషమ పరిస్థితుల్లో ఉన్నారని ఆందోళన వ్యక్తంచేశారు.

‘‘మన ఇమిగ్రేషన్‌ విధానం చాలామంది జీవన పరిస్థితులను దెబ్బతీస్తోంది. నిద్రమత్తులో ఉండే జో బైడెన్‌ ఆటోపెన్‌తో సంతకం చేసి రప్పించిన లక్షలమంది అక్రమ ప్రవేశాలను రద్దు చేస్తున్నాం. అఫ్గాన్‌ నుంచి వేలమందిని ఎలాంటి తనిఖీల్లేకుండా మన దేశంలోకి ఆయన తెచ్చారు. కుటిల బైడెన్, ఆయన దొంగపరివారం చేసినదాన్ని మరిచిపోం. అమెరికాను ప్రేమించనివారిని, మన వృద్ధికి పాటుపడనివారిని ఇక్కడి నుంచి పంపించేస్తాం. అమెరికాయేతర పౌరులందరికీ ప్రభుత్వ ప్రయోజనాలు, రాయితీలు నిలిపివేస్తాం. ప్రశాంతతకు భంగం కలిగించేవారిని, పాశ్చాత్య సంస్కృతికి సరిపోనివారిని, మన భద్రతకు ముప్పుగా మారేవారిని బహిష్కరిస్తాం’’ అని ట్రంప్‌ తన ‘ట్రూత్‌ సోషల్‌’ పోస్ట్‌లో రాసుకొచ్చారు.

‘‘అమెరికాలో 5.30 కోట్ల మంది విదేశీయులున్నారు. వారిలో చాలామంది విఫల దేశాల నుంచి, జైళ్ల నుంచి, మానసిక సంస్థల నుంచి, డ్రగ్స్‌ ముఠాల నుంచి వచ్చినవారే. దేశభక్తులు, సహృదయులైన అమెరికా పౌరులు చేస్తున్న చెల్లింపులతో ఇలాంటివారికి, వారి పిల్లలకు ప్రయోజనం అందుతోంది. ఇది క్రమంగా అమెరికా పౌరుల్ని కబళిస్తోంది. ఏటా 30వేల డాలర్లు ఆర్జించే గ్రీన్‌కార్డు వలసదారుడికి వివిధ ప్రయోజనాల రూపంలో 50వేల డాలర్లు వెళ్లిపోతున్నాయి. వలసదారులు, శరణార్థులతో ఇలా ఎంతో భారం పడుతోంది’’ అని వివరించారు. అఫ్గాన్‌ సహా 18 దేశాలకు చెందిన గ్రీన్‌కార్డ్‌దారుల్ని సమీక్షించనున్నట్లు అమెరికా పౌరసత్వం, వలస సేవల (యూఎస్‌సీఐఎస్‌) డైరెక్టర్‌ జోసెఫ్‌ ఎడ్లో వెల్లడించారు. కొత్త మార్గదర్శకాలు వెంటనే అమల్లోకి వచ్చాయని, పెండింగులో ఉన్న దరఖాస్తులకు కూడా వర్తిస్తాయని చెప్పారు.