డాక్టర్ అమెరికాలో… ఆపరేషన్ మన ఊరిలో! రేపటి వైద్యం ఇదేనా?

–సూర్య ప్రకాష్ జోశ్యుల

ఆపరేషన్ థియేటర్ తలుపులు నెమ్మదిగా మూసుకుపోయాయి.

లోపల…

రోగి ఉన్నాడు.

నర్సులు ఉన్నారు.

మానిటర్ల శబ్దం వినిపిస్తోంది.

సర్జికల్ పరికరాలన్నీ సిద్ధంగా ఉన్నాయి.

కానీ… అందరూ ఎదురు చూస్తున్న ఒక వ్యక్తి మాత్రం కనిపించడం లేదు.

డాక్టర్.

ఆ క్షణంలో గడియారం మాత్రమే పరిగెడుతోంది. ఎందుకంటే…ఆపరేషన్‌లో ప్రతి సెకను ఒక ప్రాణం విలువ.
సాధారణంగా ఇక్కడి నుంచే ఒక కథ మొదలవుతుంది.

“డాక్టర్ ఇంకా రాలేదు…”

“మరో ఆసుపత్రికి తీసుకెళ్లండి…”

“ఇంకొంచెం వేచి చూద్దాం…”

కానీ…

ఈ కథలో అలా జరగలేదు.

కొన్ని క్షణాల తర్వాత…ఆపరేషన్ టేబుల్ పక్కన నిలబడ్డ ఒక మనిషి రూపంలోని రోబో తన చేతిని కదిలించింది.

కత్తి కదిలింది. సర్జరీ మొదలైంది.

అయితే… ఆ చేతిని కదిలించింది రోబో కాదు. వందల కిలోమీటర్ల దూరంలో కూర్చున్న ఒక సర్జన్.

ఆయన చేతులు…రోబో చేతులుగా మారాయి.

కొన్ని నిమిషాల తర్వాత…

ఆపరేషన్ పూర్తయింది.

ప్రశ్న ఒక్కటే…

డాక్టర్ నిజంగా ఆపరేషన్ థియేటర్‌లో ఉండాలా?

వందేళ్లుగా వైద్య ప్రపంచం నమ్మిన సమాధానం…”అవును.” కానీ ఇప్పుడు…ఆ సమాధానమే మారడం మొదలైందేమో.

ఇది సినిమా కాదు.

ఇది కల్పిత కథ కాదు.

భవిష్యత్తు వైద్యం ఎలా ఉండబోతోందో చూపించే ఒక నిజమైన శాస్త్రీయ ప్రయోగం.

ఒక్కసారి ఊహించండి…

రేపు అల్లూరి సీతారామరాజు జిల్లా లాంటి మారుమూల ప్రాంతంలో ఒకరికి అత్యవసర శస్త్రచికిత్స అవసరమైంది. అక్కడ స్పెషలిస్ట్ సర్జన్ లేడు.కానీ హైదరాబాద్‌లో ఉన్న డాక్టర్…లేదా ఢిల్లీలో…లేదా ప్రపంచంలో మరో మూలలో ఉన్న ఒక నిపుణుడు…రోబోను రిమోట్ ద్వారా నియంత్రిస్తూ ఆ రోగికి శస్త్రచికిత్స చేయగలిగితే?

ఈ రోజు అది ఊహలా అనిపించొచ్చు. కానీ…ఆ ఊహకు ఇప్పుడు శాస్త్రవేత్తలు మొదటి రూపం ఇచ్చారు.

యూనివర్సిటీ ఆఫ్ కాలిఫోర్నియా శాన్ డియాగో (UC San Diego) పరిశోధకులు టెలీఆపరేషన్ ద్వారా హ్యూమనాయిడ్ రోబోలను ఉపయోగించి పెద్ద క్షీరదాలపై విజయవంతంగా ప్రయోగాత్మక శస్త్రచికిత్సలు నిర్వహించారు. ఈ పరిశోధన వివరాలు ప్రముఖ శాస్త్రీయ జర్నల్ Natureలో ప్రచురితమయ్యాయి.

కానీ… అసలు ట్విస్ట్ ఇంకా మిగిలే ఉంది.

ఈ కథలో మీరు చూసింది…ఒక సన్నివేశం మాత్రమే.దాని వెనుక జరిగిన ప్రయోగం ఇంకా ఆసక్తికరంగా ఉంది.మొదటి ప్రయత్నంలో…రోబో ఒంటరిగా లేదు.దాని పక్కనే ఒక మానవ సర్జన్ నిలబడ్డాడు. ఎందుకంటే… కొత్త టెక్నాలజీ మొదటి అడుగు ఎప్పుడూ జాగ్రత్తగానే పడుతుంది.

ఆ ఇద్దరూ కలిసి పిత్తాశయం తొలగింపు శస్త్రచికిత్సను విజయవంతంగా పూర్తి చేశారు.కానీ…రెండోసారి…ఆపరేషన్ టేబుల్ దగ్గర మనిషి కనిపించలేదు.ఇద్దరు హ్యూమనాయిడ్ రోబోలు మాత్రమే ఉన్నాయి. అది చూసి…

“అంటే రోబోలే సర్జరీ చేశాయా?” అనిపించొచ్చు.

అసలు ట్విస్ట్ అక్కడే ఉంది. రోబోలు ఒక్క నిర్ణయమూ తీసుకోలేదు.వాటి ప్రతి కదలిక వెనుక… దూరంలో కూర్చున్న సర్జన్లే ఉన్నారు. కనిపించకుండా.ఇక్కడో ప్రశ్న.

రోబోను మనిషిలానే ఎందుకు తయారు చేశారు?

సమాధానం చాలా సింపుల్. ప్రపంచంలోని ప్రతి ఆసుపత్రి… మనుషుల కోసం నిర్మించబడింది. తలుపులు…ఆపరేషన్ టేబుళ్లు… సర్జికల్ పరికరాలు…అన్నీ మనుషుల చేతుల్లో పనిచేసేలా రూపొందించబడ్డాయి. అందుకే…ఆసుపత్రిని మార్చాలని పరిశోధకులు అనుకోలేదు. రోబోనే మనిషిలా మార్చేశారు.

రెండు చేతులు.

రెండు కాళ్లు.

మనిషి ఆకృతి.

ఈ రోబో పేరు…

“సర్జీ” (Surgie).

ఎత్తు కేవలం ఐదు అడుగులు.

బరువు కేవలం 27 కిలోలు.

ప్రస్తుతం ఉపయోగించే భారీ రోబోటిక్ సిస్టమ్స్‌తో పోలిస్తే ఇది చాలా చిన్నది. అంబులెన్స్‌లో కూడా తీసుకెళ్లే అవకాశం ఉంది.

అంటే…భారీ యంత్రాల కోసం ఆసుపత్రిని మార్చాల్సిన అవసరం లేదు. రోబోనే ఆసుపత్రి దగ్గరకు వస్తుంది.

“రోబోలు డాక్టర్ల స్థానాన్ని తీసుకోవడం కాదు… డాక్టర్ చేతులు చేరని చోటుకు ఆయన నైపుణ్యాన్ని తీసుకెళ్తున్నాయి.” అయితే…

ఇది నిజంగానే అంత సులభమా?

ప్రతి కొత్త టెక్నాలజీకి ఒక హీరో ఉంటాడు. ఒక విలన్ కూడా ఉంటాడు. ఈ కథలో విలన్ పేరు…లేటెన్సీ. సర్జన్ అక్కడ చేయి కదిపిన వెంటనే…ఇక్కడ రోబో స్పందించాలి. ఆ మధ్య వచ్చే చిన్న ఆలస్యం కూడా శస్త్రచికిత్సలో కీలకం.

ఇంకో సవాలు…

సమయం.

ఈ ప్రయోగంలో రోబోలను పలుమార్లు రీ-కాలిబ్రేట్ చేయాల్సి వచ్చింది. అందుకే శస్త్రచికిత్స ఎక్కువ సమయం పట్టింది. అయితే… శాస్త్రవేత్తలు ఒక విషయం గుర్తు చేస్తున్నారు. ఒకప్పుడు రోబోటిక్ సర్జరీలకే గంటల సమయం పట్టేది.

ఈ రోజు…

అదే సర్జరీలు చాలా తక్కువ సమయంలో పూర్తవుతున్నాయి.అంటే…ఈ టెక్నాలజీ కూడా అభివృద్ధి చెందే అవకాశం ఉందనే ఆశ వారిలో ఉంది.

ఇందతా చదివిన తర్వాత…మీకు ఒక సందేహం వచ్చి ఉండొచ్చు.

“అంటే AI సర్జరీ చేసిందా?”

లేదు.

అసలు కథ అక్కడే మలుపు తిరుగుతుంది.రోబోలు స్వయంగా ఎలాంటి వైద్య నిర్ణయాలు తీసుకోలేదు. ప్రతి కదలిక వెనుక…ఒక సర్జన్ ఉన్నాడు. ప్రతి చర్య వెనుక…ఒక మనిషి ఉన్నాడు. అంటే…AI డాక్టర్‌ను భర్తీ చేయడం కాదు.డాక్టర్ నైపుణ్యాన్ని మరింత దూరం వరకు తీసుకెళ్లే ఒక కొత్త సాధనంగా మారుతోంది.

మరి… మన దేశానికి ఎప్పుడు వస్తుంది?

ఈ ప్రశ్నకు ఇప్పుడే ఖచ్చితమైన సమాధానం లేదు. ఎందుకంటే…ఇది ఇంకా ప్రారంభ దశలోనే ఉంది. జంతువులపై జరిగిన ప్రీక్లినికల్ పరిశోధన మాత్రమే పూర్తయింది. ఇంకా మనుషులపై క్లినికల్ ట్రయల్స్ జరగాలి. నియంత్రణ సంస్థల అనుమతులు రావాలి. సాంకేతిక పరిమితులు తగ్గాలి. ఆ తర్వాతే ఈ టెక్నాలజీ సాధారణ ఆసుపత్రుల్లోకి వచ్చే అవకాశం ఉంది.

అయితే…

ఒక విషయం మాత్రం స్పష్టంగా కనిపిస్తోంది. ఒకప్పుడు అత్యాధునిక వైద్యం అంటే…పెద్ద నగరాలు మాత్రమే. రేపు… అది గ్రామానికి చేరవచ్చు. యుద్ధభూమికి చేరవచ్చు. సముద్రంలో ఉన్న ఓడకు చేరవచ్చు. చివరికి…అంతరిక్షానికీ చేరవచ్చు.

ముగింపు

ప్రతి విప్లవం…

మొదట అసాధ్యంగా కనిపిస్తుంది.

తర్వాత…

ఆశ్చర్యంగా అనిపిస్తుంది.

చివరికి…

సాధారణమైపోతుంది.

ఒకప్పుడు…

చేతిలో ఫోన్ పెట్టుకుని ప్రపంచంతో మాట్లాడతామని ఎవరూ నమ్మలేదు. ఈ రోజు… అదే మన దైనందిన జీవితం. బహుశా…

రేపు ఇంకో వార్త చదువుతాం.

“హైదరాబాద్‌లో ఉన్న సర్జన్… ఆదిలాబాద్‌లోని రోగికి రోబో ద్వారా విజయవంతంగా శస్త్రచికిత్స చేశారు.” అని. ఆ రోజు… ఈ రోజు జరిగిన ఈ చిన్న ప్రయోగం గుర్తుకొస్తుంది.ఎందుకంటే…

ప్రపంచాన్ని మార్చే విప్లవాలు… పెద్ద శబ్దంతో మొదలవు. నిశ్శబ్దంగా… ఒక ఆపరేషన్ థియేటర్ తలుపులు మూసుకున్నప్పుడు మొదలవుతాయి.