నామినేటెడ్ పదవుల కోసం ఎదురుచూపులు ఇంకెన్నాళ్లు?

తెలంగాణలో నామినేటెడ్ పదవుల భర్తీపై వాయిదాల పర్వం కొనసాగుతోంది. దీపావళి నాటికి నామినేటెడ్ పోస్టులు భర్తీ అవుతాయని ఎంతోమంది ఎదురు చూస్తున్నారు. అయితే తాజా పరిణామాలను చూస్తే వాళ్ల ఆశలు అడియాశలయ్యేలా ఉన్నాయి. హోలీ ముందే అన్నారు.. తర్వాత ఉగాదికి అని ఊరించారు.. తర్వాత దసరాకు పక్కా అన్నారు.. ఇప్పుడు దీపావళికి ఖాయం అన్నారు. కానీ ఇప్పుడు కూడా చేతులెత్తేశారు. పార్టీలో నామినేటెడ్ పదవుల ఊసే వినిపించట్లేదు. ఈసారి సంక్రాంతికి పక్కా అని గాంధీభవన్ లో గుసగుసలు వినిపిస్తున్నాయి. దీంతో ఆశావహుల్లో అసంతృప్తి వెల్లువెత్తుతోంది.

గవర్నర్ కోటా ఎమ్మెల్యేలు, పీసీసీ వర్కింగ్ ప్రెసిడెంట్, డిప్యూటీ స్పీకర్, చీఫ్ విప్ నియామకాలు, ఇతర కీలక పదవుల భర్తీ ప్రక్రియ పలుసార్లు వాయిదా పడుతూ వస్తోంది. అధికార పార్టీలో అసంతృప్తులు, రాజకీయ సమీకరణాలు, జిల్లాల వారీగా సమతుల్యతలు దీని ప్రధాన కారణంగా తెలుస్తోంది. 2024 జూలై 7న నియమించిన 37 కార్పొరేషన్ల ఛైర్మన్ల పదవీకాలం 2026 జూలై 8తో ముగిసింది. అయితే ఇంకా భర్తీ చేయవలసినవి, ఖాళీగా ఉన్న కార్పొరేషన్లు కలిపి 50కి పైగా ఉన్నట్లు సమాచారం.

మొదట మహేష్ కుమార్ గౌడ్ మార్చిలో ఈ ప్రక్రియను ప్రకటిస్తే, ఆ తర్వాత 99 రోజుల ప్రజా పాలన కార్యక్రమం, రాజ్యసభ అభ్యర్థుల ఎంపిక, బడ్జెట్ సమావేశాల కారణంగా ఇది సాధ్యపడలేదు. ఆ తర్వాత ఉగాది అన్నారు.. ఏప్రిల్ లో వస్తాయన్నారు.. చివరకు ‘సర్’ ప్రక్రియలో భాగంగా సీఎం రేవంత్ రెడ్డి చురుగ్గా పనిచేసేవారికే పదవులు ఇస్తామని ప్రకటించడంతో జూలై 3 వరకు వాయిదా పడింది. సెప్టెంబర్ లో భర్తీ చేస్తామని, 70-80 శాతం పదవులు సీనియర్ కార్యకర్తలకే ఇస్తామని మహేష్ కుమార్ గౌడ్ స్పష్టం చేసినా, ఆ గడువు కూడా దాటిపోయింది.

నామినేటెడ్ పదవుల ప్రకటన ప్రతిసారీ వాయిదా పడుతుండటంతో ఆశావహులు ఢిల్లీ స్థాయి మంతనాలు, పైరవీల్లో మునిగిపోయారు. గాంధీ భవన్ చుట్టూ ప్రదక్షిణలు చేస్తున్న నేతలకు ఎప్పటికప్పుడు గడువులు మారుతుండటం తీవ్ర నిరాశను కలిగిస్తోంది. మరోవైపు నామినేటెడ్ పదవులతో పాటు క్యాబినెట్ విస్తరణ ఉంటుందనే ప్రచారం కూడా పార్టీలో జోరుగా సాగుతోంది. అయితే కొన్ని జిల్లాల్లో ఎమ్మెల్యేల ఒత్తిడి, సామాజిక సమీకరణాల సర్దుబాటు పార్టీ పెద్దలకు తలనొప్పిగా మారింది. ముఖ్యంగా డిసెంబర్ 30న వెలువడిన కొన్ని నియామకాలు ఒకే వర్గానికి కేటాయించారనే అసంతృప్తి వ్యక్తమైంది.

ప్రస్తుతం ఉన్న సమాచారం ప్రకారం మొదటి విడతగా 50 మందితో జాబితా సిద్ధమవగా, మరో 30 మందితో కలిపి మొత్తం 80 పదవులు భర్తీ చేసేందుకు కాంగ్రెస్ కసరత్తు చేస్తోంది. అయితే ఈ ఆలస్యం వెనుక ఢిల్లీ పెద్దల ఆమోదం కూడా ఒక కారణమని తెలుస్తోంది. ఏది ఏమైనప్పటికీ, గ్రౌండ్ లెవెల్ లో పార్టీ కోసం కష్టపడిన నాయకులకు తగిన గుర్తింపు దక్కకపోతే అది రాబోయే రోజుల్లో పార్టీకి నష్టం చేకూరుస్తుందనే ఆందోళన కేడర్ లో వ్యక్తమవుతోంది. పదవుల పంపిణీ కేవలం రాజకీయ లబ్ధి కోసం కాకుండా, నిజమైన కార్యకర్తలకు న్యాయం చేసేలా ఉంటేనే పార్టీలో అసంతృప్తి జ్వాలలు తగ్గుతాయని విశ్లేషకులు అభిప్రాయపడుతున్నారు. మరి ఈసారైనా సంక్రాంతికి నామినేటెడ్ పదవుల భర్తీ పూర్తవుతుందా లేదా అనేది వేచి చూడాలి.