సజ్జనార్పై రాజాసింగ్ సంచలన ఆరోపణలు..!
తెలంగాణ రాజకీయ, అధికార వర్గాల్లో మరోసారి పెను దుమారం రేగింది. తమదైన శైలిలో దూకుడుగా వ్యవహరించే గోషామహల్ ఎమ్మెల్యే రాజాసింగ్, ఈసారి నేరుగా సీనియర్ ఐపీఎస్ అధికారి, హైదరాబాద్ మాజీ పోలీస్ కమిషనర్ వీసీ సజ్జనార్ను లక్ష్యంగా చేసుకుని ముఖ్యమంత్రి రేవంత్ రెడ్డికి ఒక సంచలన లేఖ రాశారు. సజ్జనార్ కమిషనర్గా పనిచేసిన కాలంలో చోటుచేసుకున్న పరిణామాలు, కీలక కేసుల దర్యాప్తు తీరు, అలాగే ఆయన వ్యక్తిగత ఆస్తుల వ్యవహారాలపై సమగ్ర విచారణ జరిపించాలని రాజాసింగ్ డిమాండ్ చేశారు. ఈ వ్యవహారంపై సీబీఐ లేదా జ్యుడీషియల్ విచారణకు ఆదేశించాలని ఆయన సీఎంను కోరారు.
రాజాసింగ్ తన లేఖలో ప్రధానంగా గతంలో సంచలనం సృష్టించిన కొన్ని కేసుల దర్యాప్తు పురోగతిని ప్రస్తావించారు. సజ్జనార్ సీపీగా ఉన్న సమయంలో బంగారం దొంగతనం కేసుతో పాటు హామ్ వే వంటి కేసుల విచారణ ఆశించిన స్థాయిలో జరగలేదని ఆయన ఆరోపించారు. ముఖ్యంగా బంగారం దొంగతనం కేసులో అసలైన సూత్రధారులను ఇప్పటికీ ఎందుకు అరెస్ట్ చేయలేదని, దర్యాప్తు ఎందుకు మందగించిందని ఆయన ప్రశ్నించారు. వ్యవస్థలో పారదర్శకత లోపించిందనే అనుమానాలను వ్యక్తం చేశారు. ఇటీవల జనార్ధన్ అనే వ్యక్తిపై చేసిన ట్వీట్ అనంతరం సజ్జనార్ వ్యవహారశైలిపై మరిన్ని సందేహాలు బలపడ్డాయని రాజాసింగ్ తన లేఖలో పేర్కొన్నారు.
రాష్ట్రంలో కాంగ్రెస్ ప్రభుత్వం అధికారంలోకి వచ్చిన తర్వాత వెలుగులోకి వచ్చిన ఫోన్ ట్యాపింగ్ వ్యవహారాన్ని కూడా రాజాసింగ్ తన లేఖలో ప్రముఖంగా ప్రస్తావించారు. గత ప్రభుత్వ హయాంలో రాజకీయ ప్రత్యర్థులు, ప్రముఖులు, వీఐపీల ఫోన్లను అక్రమంగా ట్యాప్ చేశారన్న ఆరోపణలు రాష్ట్రవ్యాప్తంగా కలకలం సృష్టించిన సంగతి తెలిసిందే. అయితే, ఈ కేసు దర్యాప్తులో ఏపీకి చెందిన సజ్జల రామకృష్ణారెడ్డి వంటి ప్రముఖుల ప్రమేయంపై ఆరోపణలు వినిపించినప్పటికీ, విచారణను పక్కదారి పట్టించే ప్రయత్నాలు జరిగాయని రాజాసింగ్ ఆందోళన వ్యక్తం చేశారు. ఆ సమయంలో ఉన్నతాధికారిగా ఉన్న సజ్జనార్ ఈ కేసును నిష్పక్షపాతంగా దర్యాప్తు చేశారా లేదా అనే దానిపై నిజాలు నిగ్గుతేలాల్సిన అవసరం ఉందని ఆయన అభిప్రాయపడ్డారు.
ఇవి కూడా చదవండి
కేవలం కేసుల దర్యాప్తు మాత్రమే కాకుండా, సజ్జనార్ వ్యక్తిగత నిజాయతీ, ఆస్తుల అంశాన్ని కూడా రాజాసింగ్ తెరపైకి తెచ్చారు. గతంలో సీబీఐ మాజీ డైరెక్టర్ ఎం.నాగేశ్వరరావు వంటి ఉన్నతాధికారి సజ్జనార్పై చేసిన వ్యాఖ్యలను రాజాసింగ్ ఈ సందర్భంగా గుర్తుచేశారు. “పోలీసు యూనిఫామ్ వెనుక దాక్కున్న నేరస్తుడి తరహా ప్రవర్తన” అంటూ నాగేశ్వరరావు గతంలో వ్యాఖ్యానించినప్పటికీ, సజ్జనార్పై ఎలాంటి చట్టపరమైన చర్యలు తీసుకోకుండా కేవలం బదిలీతో సరిపెట్టడంపై రాజాసింగ్ అభ్యంతరం వ్యక్తం చేశారు.
దీనికితోడు కర్ణాటకలోని సజ్జనార్ స్వగ్రామం, దాని పరిసర ప్రాంతాల్లో సుమారు 100 ఎకరాల వరకు భూమి కొనుగోలు చేసినట్లు ప్రచారం జరుగుతోందని రాజాసింగ్ ఆరోపించారు. ఒక ప్రభుత్వ అధికారికి ఇంత భారీ స్థాయిలో ఆస్తులు ఎలా సమకూరాయి.. ఆయన ఆదాయానికి మించిన ఆస్తులు, ఆర్థిక లావాదేవీలపై పూర్తిస్థాయిలో విచారణ జరిపించాలని డిమాండ్ చేశారు. నిజాయతీ కలిగిన, కఠినమైన అధికారిగా పేరున్న సజ్జనార్పై ఒక ప్రజాప్రతినిధి ఈ స్థాయిలో ఆరోపణలు చేయడం, నేరుగా ముఖ్యమంత్రికి లేఖ రాయడం ఇప్పుడు హాట్ టాపిక్గా మారింది. ఒకవైపు ఫోన్ ట్యాపింగ్ కేసు దర్యాప్తు కొనసాగుతున్న తరుణంలో, రాజాసింగ్ లేవనెత్తిన ఈ అంశాలపై ముఖ్యమంత్రి రేవంత్ రెడ్డి ఏ విధంగా స్పందిస్తారు? ఈ ఆరోపణలపై ప్రభుత్వం విచారణకు ఆదేశిస్తుందా లేదా అన్నది వేచి చూడాలి.







