Revanth Reddy: టీడీపీపై ప్రేమ వెనుక రేవంత్ పక్కా వ్యూహం!?

తెలంగాణ రాజకీయ ముఖచిత్రంపై ప్రస్తుతం ఒకే చర్చ నడుస్తోంది. అదే ముఖ్యమంత్రి రేవంత్ రెడ్డికి తెలుగుదేశం పార్టీపై ఉన్న మమకారం. సాధారణంగా పార్టీలు మారిన నేతలు, పాత పార్టీని విమర్శించడం ద్వారా కొత్త పార్టీలో తమ విధేయతను నిరూపించుకోవాలని చూస్తారు. కానీ రేవంత్ రెడ్డి ఇందుకు భిన్నం. కాంగ్రెస్ పార్టీలో అత్యున్నత పదవిలో ఉండి కూడా, ఆయన తన పసుపు మూలాలను దాచుకోవడం లేదు సరికదా.. మరింత చాటుకుంటున్నారు.

రేవంత్ రెడ్డి రాజకీయాల్లో ఎదిగింది టీడీపీ నుండే అన్నది జగమెరిగిన సత్యం. చంద్రబాబు నాయుడు శిష్యుడిగా ఆయన పొందిన శిక్షణ, అసెంబ్లీలో ఆయన చూపిన దూకుడు రేవంత్‌ను మాస్ లీడర్‌గా నిలబెట్టాయి. ఇప్పుడు ముఖ్యమంత్రి హోదాలో ఉన్నా, ఎన్టీఆర్ విగ్రహాన్ని జూబ్లీహిల్స్‌లో ఏర్పాటు చేస్తానని ఆయన ప్రకటించడం రాజకీయ వర్గాల్లో ప్రకంపనలు సృష్టించింది.

ఇది కేవలం కృతజ్ఞత మాత్రమేనా? అంటే కాదనే చెప్పాలి. దీని వెనుక అత్యంత లోతైన రాజకీయ సమీకరణాలు ఉన్నాయి. తెలంగాణలో టీడీపీ ప్రత్యక్షంగా పోటీలో లేకపోయినా, ఇప్పటికీ గణనీయమైన స్థాయిలో సెటిలర్లు, పాత టీడీపీ కేడర్ ఉన్నారు. ఈ ఓటు బ్యాంకు ఏ పార్టీ వైపు మొగ్గు చూపితే ఆ పార్టీకి అధికారం దక్కుతుందనేది బహిరంగ రహస్యం. గతంలో టీడీపీ ఓటు బ్యాంకు అంతా బీఆర్ఎస్ వైపు మళ్లింది. ఆ ఓట్లను ఇప్పుడు కాంగ్రెస్ వైపు తిప్పుకోవడం ద్వారా బీఆర్ఎస్‌ను శాశ్వతంగా దెబ్బకొట్టాలనేది రేవంత్ ప్లాన్.

జూబ్లీహిల్స్‌లో ఎన్టీఆర్ విగ్రహ ఏర్పాటు ప్రకటన కేవలం విగ్రహానికే పరిమితం కాదు. ఇది ఒక ఎమోషనల్ బాండ్. తెలంగాణలో ఎన్టీఆర్ అభిమానులు కోట్లలో ఉన్నారు. వారిని ప్రసన్నం చేసుకోవడం ద్వారా, అటు ఆంధ్రా మూలాలున్న ఓటర్లను, ఇటు బలమైన సామాజిక వర్గాలను తన వైపునకు తిప్పుకోవడంలో రేవంత్ సక్సెస్ అవుతున్నారు. “రాజకీయాల్లో శత్రువుకు శత్రువు మిత్రుడు” అనే సూత్రం కంటే, “గత మిత్రులను కలుపుకుంటూ వెళ్లడం” అనే కొత్త పంథాను రేవంత్ అనుసరిస్తున్నారు. అయితే, ఈ ప్రయాణం రేవంత్‌కు అంత సులభం కాదు. కాంగ్రెస్ హైకమాండ్, సీనియర్ నేతలు దీన్ని ఎలా స్వీకరిస్తారనేది ముఖ్యం. ‘తెలంగాణ కాంగ్రెస్’ అస్తిత్వం దెబ్బతింటుందని కొందరు భావించే ప్రమాదం ఉంది.

రేవంత్ రెడ్డి ‘కాంగ్రెస్ ఫేస్ విత్ టీడీపీ హార్ట్’ అనేది కేవలం విమర్శ కాదు, అది ఆయన రాజకీయ ఆయుధం. పార్టీ జెండా ఏదైనా.. కేడర్‌ను, ఓటర్లను తన వైపు తిప్పుకోవడంలో రేవంత్ చూపిస్తున్న ఈ చాకచక్యం తెలంగాణ రాజకీయాల్లో ఆయనను ఒక విభిన్నమైన నాయకుడిగా నిలబెడుతోంది. విమర్శలు ఎలా ఉన్నా, తాను చేసేది తన రాజకీయ మనుగడకు, పార్టీ బలోపేతానికి మేలు చేస్తుందని ఆయన బలంగా నమ్ముతున్నారు.