పొంగులేటి, పాడి కౌశిక్ రెడ్డి మధ్య డబుల్ బెడ్రూమ్ గొడవ
- Published By: Vasishta
- August 10, 2026 / 05:15 PM IST
హన్మకొండ జిల్లా కమలాపూర్ మండల కేంద్రంలో నిర్వహించిన డబుల్ బెడ్రూమ్ ఇండ్ల పంపిణీ కార్యక్రమం రణరంగంగా మారింది. పేదలకు నీడ కల్పించే ఒక శుభకార్యం చివరకు కాంగ్రెస్, బీఆర్ఎస్ పార్టీల నడుమ రాజకీయ సవాల్-ప్రతి సవాల్లకు, అధిపత్య పోరుకు వేదికగా నిలిచింది. ముఖ్యంగా మంత్రులు పొన్నం ప్రభాకర్, పొంగులేటి శ్రీనివాస రెడ్డి వర్సెస్ హుజూరాబాద్ బీఆర్ఎస్ ఎమ్మెల్యే పాడి కౌశిక్ రెడ్డికి మధ్య చోటుచేసుకున్న వాగ్వాదం రాష్ట్ర రాజకీయాల్లో తీవ్ర కలకలం రేపింది.
ప్రభుత్వ అధికారిక కార్యక్రమంలో భాగంగా ఏర్పాటు చేసిన సభా వేదికపైనే ప్రజాప్రతినిధుల మధ్య మాటలతూటాలు పేలాయి. రవాణా, బీసీ సంక్షేమ శాఖ మంత్రి పొన్నం ప్రభాకర్ ప్రసంగిస్తూ.. గత బీఆర్ఎస్ ప్రభుత్వం డబుల్ బెడ్రూమ్ ఇండ్ల నిర్మాణాన్ని అరకొరగా, సగంలోనే వదిలేసిందని విమర్శించారు. తమ కాంగ్రెస్ ప్రభుత్వం అధికారంలోకి వచ్చిన తర్వాతే ప్రత్యేకంగా నిధులు కేటాయించి, పనులను వేగవంతం చేసి లబ్ధిదారులకు అందించే స్థాయికి తీసుకొచ్చామని పేర్కొన్నారు.
ఈ వ్యాఖ్యలపై వేదికపైనే ఉన్న హుజూరాబాద్ ఎమ్మెల్యే పాడి కౌశిక్ రెడ్డి తీవ్రంగా స్పందించారు. “బరాబర్ ఈ ఇండ్లను కట్టించింది కేసీఆరే” అంటూ బిగ్గరగా కౌంటర్ ఇచ్చారు. దీంతో ఇరు పార్టీల నేతలు, కార్యకర్తల నడుమ పరస్పర నినాదాలతో వాతావరణం ఒక్కసారిగా వేడెక్కింది.
పరిస్థితిని సర్దుబాటు చేసే క్రమంలో రెవెన్యూ, గృహనిర్మాణ శాఖ మంత్రి పొంగులేటి శ్రీనివాస రెడ్డి ప్రసంగిస్తూ చేసిన వ్యాఖ్యలు వివాదాన్ని మరింత పెంచాయి. గత బీఆర్ఎస్ ప్రభుత్వం చేసిన విచ్చలవిడి అప్పులు, ఆర్థిక అక్రమాల వల్లే ప్రస్తుతం రాష్ట్ర పాలనలో, సంక్షేమ పథకాల అమల్లో తీవ్ర ఇబ్బందులు ఎదుర్కొంటున్నామని పొంగులేటి ధ్వజమెత్తారు.
పొంగులేటి వ్యాఖ్యలతో ఆగ్రహంతో ఊగిపోయిన ఎమ్మెల్యే కౌశిక్ రెడ్డి, వేదికపైనే లేచి నిలబడి నేరుగా మంత్రులతో వాగ్వాదానికి దిగారు. ప్రభుత్వ వైఫల్యాలను కప్పిపుచ్చుకోవడానికే గత ప్రభుత్వంపై నిందలు వేస్తున్నారని ఆయన తీవ్రస్థాయిలో విరుచుకుపడ్డారు. వేదికపై నేతల మధ్య మాటామాటా పెరగడంతో, ప్రాంగణంలోని కాంగ్రెస్, బీఆర్ఎస్ శ్రేణులు ఒకరిపైకొకరు పోటీపడి నినాదాలు చేస్తూ దూసుకొచ్చాయి. సభ తీవ్ర రసాభాసగా మారడంతో, పరిస్థితులు చేయిదాటకుండా చూసేందుకు పోలీసులు వెంటనే రంగప్రవేశం చేశారు. బీఆర్ఎస్ శ్రేణులను, కౌశిక్ రెడ్డి అనుచరులను సభా ప్రాంగణం నుంచి బయటకు పంపి పరిస్థితిని అదుపులోకి తీసుకొచ్చారు.
ఈ ఘటన కేవలం ఒక సభలో జరిగిన క్షణికావేశ వాగ్వాదం మాత్రమే కాదు. దీని వెనుక హుజూరాబాద్ నియోజకవర్గంలో బలమైన రాజకీయాధిపత్యం కోసం సాగుతున్న అంతర్గత, బహిరంగ పోరాటం దాగి ఉందనేది స్పష్టమవుతోంది. హుజూరాబాద్లో తన ఉనికిని కాపాడుకోవడంతో పాటు, తమ హయాంలో జరిగిన అభివృద్ధి సంక్షేమ ఫలాల క్రెడిట్ను కాంగ్రెస్ ఖాతాలో పడకుండా చూడాలని పాడి కౌశిక్ రెడ్డి తీవ్రంగా ప్రయత్నిస్తున్నారు. అధికార పక్షాన్ని నేరుగా నిలదీయడం ద్వారా పార్టీ కేడర్లో ఉత్సాహం నింపే వ్యూహాన్ని ఆయన ఎంచుకున్నారు. ఉమ్మడి కరీంనగర్, వరంగల్ జిల్లాల్లో గత ప్రభుత్వ వైఫల్యాలను నిలదీస్తూనే, తాము చేస్తున్న సంక్షేమ కార్యక్రమాలను ప్రజల్లోకి బలంగా తీసుకెళ్లాలని మంత్రులు పొన్నం ప్రభాకర్, పొంగులేటి శ్రీనివాస రెడ్డి యత్నిస్తున్నారు. ప్రతిపక్షం నుంచి వస్తున్న విమర్శలను తిప్పికొట్టే క్రమంలో తీవ్రమైన ఆర్థిక గణాంకాలను, అప్పుల అంశాన్ని తెరపైకి తెస్తున్నారు.
ఏది ఏమైనా, పేదలకు ఇండ్లు ఇచ్చే సదుద్దేశంతో నిర్వహించిన ఒక ప్రభుత్వ కార్యక్రమం, అధికార-ప్రతిపక్షాల నడుమ రాజకీయ ఆధిపత్య పోరుకు, రణరంగంగా మారడం గమనార్హం. ఈ పరిణామాలు రాబోయే రోజుల్లో హుజూరాబాద్ కేంద్రంగా జిల్లా రాజకీయాలను మరింత వేడెక్కించేలా ఉన్నాయి.
