పల్లా రాజేశ్వర్ రెడ్డిపై జేఎన్టీయూ వీసీ సతీమణి ఫిర్యాదు!
- Published By: Vasishta
- October 13, 2026 / 10:17 AM IST
విద్యా రంగం, రాజకీయాలు ఎప్పుడూ ఒకదానితో ఒకటి ముడిపడి ఉంటాయి. తాజాగా తెలంగాణలో చోటు చేసుకున్న ఓ సంఘటన అత్యంత వివాదాస్పదమవుతోంది. జేఎన్టీయూ హైదరాబాద్ వైస్ ఛాన్సలర్ ప్రొఫెసర్ కిషన్ కుమార్ రెడ్డి సతీమణి సుజనా రెడ్డి… జనగామ బీఆర్ఎస్ ఎమ్మెల్యే పల్లా రాజేశ్వర్ రెడ్డిపై కేపీహెచ్‌బీ పోలీస్ స్టేషన్‌లో ఫిర్యాదు చేశారు. ఇదిప్పుడు అటు విద్యారంగంలోనూ, అటు రాజకీయ రంగంలోనూ చర్చనీయాంశంగా మారింది.
అక్టోబర్ 6వ తేదీన వీసీ దంపతులు తిరుపతి ప్రయాణంలో ఉన్నారు. ఆ సమయంలో పల్లా రాజేశ్వర్ రెడ్డి వీసికి ఫోన్ చేశారు. విద్యాజ్యోతి ఇన్‌స్టిట్యూట్ ఆఫ్ టెక్నాలజీ ఆధ్వర్యంలో అక్టోబర్ 30న జరగనున్న ‘స్టూడెంట్ కమ్యూనిటీ డే’ కార్యక్రమానికి వీసీ హాజరుకావాలని కోరారు. అయితే, పల్లా రాజేశ్వర్ రెడ్డి తీవ్ర పదజాలంతో దూషించారని, తనపై బెదిరింపులకు పాల్పడ్డారంటూ వీసీ సతీమణి సుజనా రెడ్డి పోలీసులకు ఫిర్యాదు చేశారు. సాయంత్రం 7.27 గంటలకు, 7.33 గంటలకు రెండుసార్లు తనను, కుటుంబ సభ్యులను బెదిరించారంటూ ఆమె ఫిర్యాదులో పేర్కొన్నారు. అంతేకాకుండా, విద్యాసంస్థల ద్వారా తప్పుడు కేసులు బనాయిస్తామని హెచ్చరించారని ఆమె పోలీసులను ఆశ్రయించారు.
ఈ ఆరోపణలను బీఆర్ఎస్ ఎమ్మెల్యే పల్లా రాజేశ్వర్ రెడ్డి పూర్తిగా తోసిపుచ్చారు. సుజనా రెడ్డి అనే వ్యక్తి ఎవరో తనకు తెలియదని, ఆమెతో ఎప్పుడూ మాట్లాడలేదని స్పష్టం చేశారు. ఇది పూర్తిగా నిరాధారమైన ఆరోపణ అని కొట్టిపారేశారు. అయితే, తాను నేరుగా వీసీ కిషన్ కుమార్ రెడ్డితో మాట్లాడిన మాట వాస్తవమని ఆయన తెలిపారు. మహిళా ప్రొఫెసర్లను, ముఖ్యంగా సీనియర్ మహిళా అధ్యాపకులను వీసీ దుర్భాషలాడటంపైనే తాను నిలదీశానని, దీనిపై మహిళా ప్రొఫెసర్లు సైతం పోలీసులకు లిఖితపూర్వకంగా ఫిర్యాదు చేశారని పల్లా రాజేశ్వర్ రెడ్డి వెల్లడించారు. ఈ క్రమంలోనే వీసీ వైపు నుండి తప్పును కప్పిపుచ్చుకునేందుకు ఈ కక్షసాధింపు చర్యలు జరుగుతున్నాయని ఆయన పరోక్షంగా ఆరోపించారు.
ఇవి కూడా చదవండి
కేపీహెచ్‌బీ పోలీసులు ఈ వ్యవహారంపై ఆధారాలను సేకరిస్తున్నారు. ప్రాథమిక విచారణ తర్వాతే తదుపరి చర్యలు ఉంటాయని తెలిపారు. ఇప్పటివరకు ఎలాంటి అధికారిక ఎఫ్‌ఐఆర్ నమోదు కాలేదని ఇన్‌స్పెక్టర్ జి. విజయ్ కుమార్ స్పష్టం చేశారు. మరోవైపు, ఈ ఫిర్యాదు వెనుక డాక్టర్ ఎ. సుజన, డాక్టర్ డి. అరుణ కుమారి వంటి వ్యక్తుల హస్తం ఉండొచ్చని, వీసీపై కౌంటర్ ఫిర్యాదులు దాఖలు చేయడంలో వీరు క్రియాశీలకంగా వ్యవహరించారనే అనుమానాలు వ్యక్తమవుతున్నాయి.
విద్యా సంస్థల నిర్వహణ, అధికారిక వేడుకలకు హాజరుకావడం వంటి పరిపాలనాపరమైన అంశాలు కాస్తా వ్యక్తిగత దూషణలు, పోలీసు కేసుల వరకు వెళ్లడం విద్యా వ్యవస్థలో క్షీణిస్తున్న నైతిక విలువలకు అద్దం పడుతోంది. అధికార, ప్రతిపక్ష వర్గాల మధ్య యూనివర్సిటీ వేదికగా జరుగుతున్న ఈ ఆరోపణలు, ప్రత్యారోపణలు రాబోయే రోజుల్లో ఎలాంటి రాజకీయ మలుపులు తిరుగుతాయో వేచి చూడాలి.
