పార్లమెంటులో కుక్క వివాదం: రేణుకా చౌదరీకి ప్రీవిలేజ్ నోటీసు .. అసలు కారణం తెలుకోండి

భారత పార్లమెంటరీ చరిత్రలో ఎన్నడూ లేని విధంగా ఒక ఆసక్తికరమైన అంశం తెరపైకి వచ్చింది. కాంగ్రెస్ సీనియర్ నాయకురాలు, ఎంపీ రేణుకా చౌదరీకి ప్రీవిలేజ్ నోటీసు జారీ చేసింది. గత శీతాకాల సమావేశాల సమయంలో ఆమె ప్రవర్తన సభా మర్యాదలకు భంగం కలిగించేలా ఉందన్న ఫిర్యాదుల నేపథ్యంలో ఈ చర్యలు తీసుకున్నారు. ఈ నెల 23వ తేదీ లోపు తన వివరణ ఇవ్వాలని కమిటీ ఆమెను ఆదేశించింది.

ఈ వివాదం గతేడాది డిసెంబర్ 1న ప్రారంభమైంది. సాధారణంగా పార్లమెంట్ భవన సముదాయం అత్యంత కట్టుదిట్టమైన భద్రతతో ఉంటుంది. అక్కడికి ఎంపీల వాహనాలను అనుమతించినప్పటికీ, పెంపుడు జంతువులను తీసుకురావడంపై కఠినమైన నిబంధనలు ఉన్నాయి. అయితే, రేణుకా చౌదరి తన కారులో ఒక పెంపుడు కుక్కను పార్లమెంట్ లోపలికి తీసుకురావడం అప్పట్లో పెద్ద దుమారం రేపింది. భద్రతా సిబ్బంది సైతం ఎంపీ వాహనం కావడంతో తొలుత అడ్డుకోలేకపోయారు.

కుక్కను పార్లమెంట్‌కు తీసుకురావడం ఒక ఎత్తైతే, ఆ సమయంలో ఆమె మీడియా ప్రతినిధులతో చేసిన వ్యాఖ్యలు మంటలకు మరింత ఆజ్యం పోశాయి. పార్లమెంట్‌లోకి కుక్కను ఎందుకు తెచ్చారని ప్రశ్నించిన మీడియాకు ఆమె బదులిస్తూ.. “బయట ఉన్న కుక్కలు కరవవు, కానీ లోపల కూర్చున్న వారే కరుస్తారు” అని వ్యాఖ్యానించారు. ఈ వ్యాఖ్యలు నేరుగా అధికార పక్ష ఎంపీలను ఉద్దేశించి చేసినవేనని బీజేపీ వర్గాలు తీవ్రంగా పరిగణించాయి. ప్రజాస్వామ్య దేవాలయంగా భావించే పార్లమెంట్‌లో కూర్చునే సభ్యులను జంతువులతో పోల్చడం, వారిని తక్కువ చేసి మాట్లాడటం సభా గౌరవానికి విఘాతం కలిగించడమేనని విమర్శలు వెల్లువెత్తాయి.

రేణుకా చౌదరి ప్రవర్తనపై బీజేపీ ఎంపీలు బ్రిజ్ లాల్, ఇందు బాలగోస్వామి తీవ్ర అభ్యంతరం వ్యక్తం చేస్తూ రాజ్యసభ ఛైర్మన్‌కు ఫిర్యాదు చేశారు. ఇందులో అనేక అంశాలను వాళ్లు ప్రస్తావించారు. పార్లమెంట్ వంటి హై-సెక్యూరిటీ జోన్‌లోకి జంతువులను తీసుకురావడం వల్ల భద్రతా పరమైన ఇబ్బందులు తలెత్తుతాయన్నారు. ఎంపీలను కుక్కలతో పోలుస్తూ చేసిన వ్యాఖ్యలు పార్లమెంటరీ సంప్రదాయాలను కించపరచడమేనని అభ్యంతరం వ్యక్తం చేశారు. ఒక బాధ్యతాయుతమైన ఎంపీగా సభ మర్యాదలను కాపాడాల్సిన బాధ్యత ఆమెపై ఉందని, కానీ ఆమె కావాలనే వివాదం సృష్టించారని ఫిర్యాదులో పేర్కొన్నారు. దీనిపై విచారణ చేపట్టిన ప్రివిలేజ్ కమిటీ, ప్రాథమికంగా ఆమె వ్యాఖ్యలు, చర్యలు సభా హక్కుల ఉల్లంఘన కిందకే వస్తాయని భావించి నోటీసులు జారీ చేసింది.

రేణుకా చౌదరి తన దూకుడు స్వభావానికి, వాక్చాతుర్యానికి పేరుగాంచిన నాయకురాలు. గతంలో కూడా ఆమె సభలో గట్టిగా నవ్వడంపై ప్రధాని మోదీ చేసిన వ్యాఖ్యలు పెద్ద చర్చకు దారితీశాయి. అయితే, తాజా ‘కుక్క’ వివాదం కేవలం రాజకీయ విమర్శలకు పరిమితం కాకుండా, ‘ప్రివిలేజ్ నోటీసు‘ వరకు వెళ్లడం గమనార్హం.

రాజకీయ విశ్లేషకుల అభిప్రాయం ప్రకారం, ప్రతిపక్ష ఎంపీలు ప్రభుత్వంపై విమర్శలు చేసే క్రమంలో కొన్నిసార్లు లక్ష్మణ రేఖ దాటుతున్నారనే వాదనకు ఇది బలం చేకూరుస్తోంది. అదే సమయంలో, చిన్న చిన్న విషయాలను కూడా ప్రివిలేజ్ కమిటీ వరకు తీసుకువెళ్లడం ద్వారా ప్రతిపక్ష గొంతు నొక్కే ప్రయత్నం జరుగుతోందని కాంగ్రెస్ శ్రేణులు ఆరోపిస్తున్నాయి.

ఈ నెల 23వ తేదీన రేణుకా చౌదరి ఇచ్చే వివరణపై అందరి దృష్టి నెలకొంది. ఆమె తన వ్యాఖ్యలకు క్షమాపణలు చెబుతారా? లేక తన చర్యను సమర్థించుకుంటారా? అన్నది వేచి చూడాలి. ఒకవేళ ప్రివిలేజ్ కమిటీ ఆమె వివరణతో సంతృప్తి చెందకపోతే, సభ ఆమెపై క్రమశిక్షణ చర్యలు తీసుకునే అవకాశం ఉంటుంది. ఇది కేవలం ఒక వ్యక్తిగత వివాదంగా కాకుండా.. పార్లమెంటరీ మర్యాదలు, సభ్యుల భావప్రకటనా స్వేచ్ఛ మధ్య ఉన్న సున్నితమైన సరిహద్దులపై చర్చకు దారితీసింది.