Budget Session: తొలి విడత బడ్జెట్ సమావేశాలు పూర్తి.. 9వ తేదీకి సభ వాయిదా

కేంద్ర బడ్జెట్ సమావేశాల (Budget Session) తొలి విడత శుక్రవారం తీవ్ర గందరగోళం, నిరసనల మధ్య ముగిసింది. ప్రతిపక్ష సభ్యుల ఆందోళనలు, నినాదాలతో దద్దరిల్లిన లోక్‌సభ ఎట్టకేలకు మూడు వారాల పాటు విరామం తీసుకుంది. కేంద్ర మంత్రి హర్దీప్ సింగ్ పూరీ తక్షణమే తన పదవికి రాజీనామా చేయాలని విపక్షాలు పట్టుబట్టడంతో సభలో ఉద్రిక్త వాతావరణం నెలకొంది. అమెరికాకు చెందిన ప్రముఖ లైంగిక నేరస్థుడు జెఫ్రీ ఎప్‌స్టీన్‌తో మంత్రికి సంబంధాలు ఉన్నాయంటూ వస్తున్న ఆరోపణల నేపథ్యంలో ప్రతిపక్షాలు సభను స్తంభింపజేశాయి.

శుక్రవారం ఉదయం లోక్‌సభ (Budget Session) సమావేశాలు ప్రారంభమైన వెంటనే ప్రతిపక్ష ఎంపీలు ప్రభుత్వానికి వ్యతిరేకంగా నినాదాలు చేస్తూ స్పీకర్ వెల్‌లోకి దూసుకెళ్లారు. సభాపతి స్థానంలో ఉన్న సంధ్యా రే సభ్యులను శాంతపరచడానికి ప్రయత్నించారు. ఎంపీలంతా తమ స్థానాలకు వెళ్లి కూర్చోవాలని విజ్ఞప్తి చేసినప్పటికీ వారు వెనక్కి తగ్గలేదు. నిరసనలు మరింత తీవ్రమవ్వడంతో పరిస్థితి అదుపులోకి రాక సభను మధ్యాహ్నానికి వాయిదా వేశారు. వాస్తవానికి సభ ప్రారంభానికి ముందే పార్లమెంట్ ఆవరణలో విపక్ష నేతలు ‘ఎప్‌స్టీన్ ఫైల్స్’ వ్యవహారంపై పెద్ద ఎత్తున నిరసనలు తెలియజేశారు.

మధ్యాహ్నం తిరిగి (Budget Session) సభ ప్రారంభమైన తర్వాత కూడా కొంతసేపు గందరగోళం కొనసాగింది. అనంతరం కొన్ని కీలకమైన శాసనపరమైన కార్యక్రమాలను త్వరితగతిన పూర్తి చేసి, లోక్‌సభను మార్చి 9వ తేదీకి వాయిదా వేస్తున్నట్లు ప్రకటించారు. ఈ మూడు వారాల సుదీర్ఘ విరామ సమయంలో పార్లమెంటరీ స్థాయి సంఘాలు (స్టాండింగ్ కమిటీలు) కీలకంగా పనిచేయనున్నాయి. ఇటీవలే ప్రవేశపెట్టిన కేంద్ర బడ్జెట్‌లో వివిధ మంత్రిత్వ శాఖలకు కేటాయించిన నిధులు, పద్దుల పంపిణీపై ఈ కమిటీలు కూలంకషంగా పరిశీలన జరపనున్నాయి. తిరిగి మార్చి 9న ప్రారంభమయ్యే రెండవ విడత బడ్జెట్ సమావేశాల్లో ఈ కేటాయింపులపై సభలో ఆమోదం తెలుపనున్నారు.