Telangana BJP : తెలంగాణలో బీజేపీది బలుపా..? వాపా..?
- Published By: Vasishta
- February 14, 2026 / 10:53 AM IST
తెలంగాణ మున్సిపల్ ఎన్నికల ఫలితాలు రాష్ట్ర రాజకీయాల్లో కొత్త సమీకరణాలకు తెరలేపాయి. ప్రధానంగా భారతీయ జనతా పార్టీ (BJP) సాధించిన ప్రగతి ఆ పార్టీ శ్రేణుల్లో ఉత్సాహాన్ని నింపుతుండగా, క్షేత్రస్థాయిలో ఇంకా ఎదుర్కోవాల్సిన సవాళ్లను కూడా స్పష్టం చేస్తోంది. గతంతో పోలిస్తే ఓట్ల శాతం, సీట్ల సంఖ్య గణనీయంగా పెరగడం ద్వారా కమలనాథులు తమ పట్టును నిరూపించుకున్నారు. ముఖ్యంగా ఉత్తర తెలంగాణలో బీజేపీ తన బలాన్ని చాటుకోగా, దక్షిణాది జిల్లాల్లో మాత్రం ఆశించిన స్థాయిలో రాణించలేకపోయింది.
ఈ ఎన్నికల్లో బీజేపీ సాధించిన అతిపెద్ద విజయం కరీంనగర్ మున్సిపల్ కార్పొరేషన్. కేంద్ర హోం శాఖ సహాయ మంత్రి బండి సంజయ్ నేతృత్వంలో బీజేపీ ఇక్కడ చరిత్ర సృష్టించింది. గతంలో కేవలం 13 స్థానాలకే పరిమితమైన పార్టీ, ఈసారి ఏకంగా 30 స్థానాలను కైవసం చేసుకుని అతిపెద్ద పార్టీగా అవతరించింది. స్వతంత్ర అభ్యర్థులు, ఇతర పార్టీల మద్దతుతో మేయర్ పీఠాన్ని దక్కించుకునే దిశగా అడుగులు వేస్తోంది. బండి సంజయ్ తన కంచుకోటలో సత్తా చాటడం పార్టీకి జాతీయ స్థాయిలోనూ గుర్తింపునిచ్చింది.
రాష్ట్రంలోని ఆరు ప్రధాన కార్పొరేషన్లలో మహబూబ్నగర్ మినహా బీజేపీ, బీఆర్ఎస్ కంటే మెరుగైన ఫలితాలు సాధించడం విశేషం. ఈ ఆరు కార్పొరేషన్లలోని 354 డివిజన్లకు గాను బీజేపీ 69 స్థానాలు గెలుచుకోగా, బీఆర్ఎస్ 48 స్థానాలకే పరిమితమైంది. ప్రతిపక్ష హోదాలో ఉన్న బీఆర్ఎస్ కంటే బీజేపీ అత్యధిక స్థానాలను గెలుచుకోవడం ఆసక్తికరంగా మారింది.
బీజేపీ గత ఎన్నికలతో పోలిస్తే తన గ్రాఫ్ను గణనీయంగా పెంచుకుంది. గతంలో 239 వార్డుల్లో గెలిచిన బీజేపీ, ఈసారి సుమారు 350 వార్డుల్లో విజయం సాధించింది. గత ఎన్నికల్లో 13 శాతంగా ఉన్న ఓట్ల శాతం, ఈసారి 20 శాతానికి పైగా పెరిగింది. గతంలో ఆమన్గల్, మక్తల్కే పరిమితమైన చైర్మన్ పదవులు, ఈసారి ఆదిలాబాద్, నారాయణపేట, మెట్పల్లి, రాయికల్ వంటి చోట్ల దక్కించుకునే అవకాశం ఏర్పడింది.
పార్టీకి ఎనిమిది మంది ఎమ్మెల్యేలు ఉన్నప్పటికీ, వారి నియోజకవర్గాల్లో ఫలితాలు మిశ్రమంగా ఉన్నాయి. ఆదిలాబాద్ లో పాయల్ శంకర్ ఆధ్వర్యంలో 49 వార్డుల్లో 21 స్థానాలు గెలిచి, ఎక్స్-అఫీషియో సభ్యుల మద్దతుతో చైర్మన్ పీఠానికి చేరువయ్యారు. కామారెడ్డిలో ఎమ్మెల్యే కె.వెంకటరమణారెడ్డి తన పట్టు నిలుపుకున్నారు. 18 స్థానాలు సాధించారు. నిర్మల్ లో ఏలేటి మహేశ్వర్రెడ్డి నియోజకవర్గంలో 13 స్థానాలకే పరిమితం కావడం కొంత నిరాశ కలిగించింది. ఆర్మూర్, భైంసా, సిర్పూర్లలో పార్టీ ఆశించిన స్థాయిలో సీట్లు సాధించలేకపోయింది.
విజయాలు ఒకవైపు ఉన్నా, బీజేపీకి ఈ ఎన్నికలు కొన్ని చేదు నిజాలను కూడా గుర్తుచేశాయి. దక్షిణ తెలంగాణలో పార్టీ పరిస్థితి ఆందోళనకరంగా ఉంది. ఉమ్మడి వరంగల్, ఖమ్మం, నల్గొండ జిల్లాల్లో పార్టీ ఉనికి నామమాత్రంగానే ఉంది. రాష్ట్రవ్యాప్తంగా 43 మున్సిపాలిటీల్లో బీజేపీ ఖాతా తెరవలేకపోయింది. చేవెళ్ల, మల్కాజ్గిరి, మెదక్ పార్లమెంటు పరిధిలోని మున్సిపాలిటీల్లో పార్టీ సింగిల్ డిజిట్ స్థానాలకే పరిమితమైంది. ఎంపీలు కొండా విశ్వేశ్వర్ రెడ్డి, ఈటల రాజేందర్ వంటి హేమాహేమీలు ఉన్నా మున్సిపల్ స్థాయిలో ఓటర్లను ఆకట్టుకోవడంలో వెనుకబడ్డారు. ఎంపీ ధర్మపురి అర్వింద్ గట్టి ప్రయత్నం చేసినా, నిజామాబాద్ కార్పొరేషన్లో గతంలో వచ్చిన 28 సీట్లనే ఈసారి కూడా సాధించగలిగారు.
ఈ ఫలితాలు తెలంగాణలో బీజేపీకి ఒక స్పష్టమైన దిశను చూపిస్తున్నాయి. ఉత్తర తెలంగాణలో బలమైన శక్తిగా ఎదిగిన బీజేపీ, దక్షిణ తెలంగాణలో క్షేత్రస్థాయి క్యాడర్ను నిర్మించుకోవాల్సిన అవసరం ఉంది. మున్సిపాలిటీల్లో ఓట్ల శాతం పెరగడం భవిష్యత్తులో జరిగే ఎన్నికలకు సానుకూల అంశం. అయితే, కేవలం పట్టణ ప్రాంతాలకే పరిమితం కాకుండా, గ్రామీణ ప్రాంతాలకు పార్టీని విస్తరించడంపై దృష్టి సారించాలి.
