మరిన్ని చిక్కుల్లో సీఈసీ.. రాజీనామాకు కాంగ్రెస్, కాక్రోచ్ పార్టీ పట్టు..!

ప్రధాన ఎన్నికల కమిషనర్ జ్ఞానేశ్ కుమార్ పై వస్తున్న సీరియస్ ఆరోపణలు దేశ రాజకీయాల్లో ప్రకంపనలు రేపుతున్నాయి. జ్ఞానేశ్ కుమార్ తీసుకున్న పలు కీలక నిర్ణయాలపై ఇద్దరు ఎన్నికల కమిషనర్లు తీవ్ర అభ్యంతరాలు వ్యక్తం చేసినట్లు వచ్చిన నివేదికలు విపక్షాలకు అందివచ్చిన అస్త్రంలా మారాయి. ఓటర్ల జాబితా ప్రత్యేక సవరణ (ఎస్‌ఐఆర్) ప్రక్రియలో భాగంగా చేపట్టిన కొన్ని మార్పులు నిబంధనలకు విరుద్ధమని కమిషనర్లు అభ్యంతరం చెప్పినట్లు తెలియడంతో ప్రతిపక్షాలు తీవ్ర స్థాయిలో విరుచుకుపడుతున్నాయి.

ఓటర్ల జాబితా సవరణ ప్రక్రియలో భాగంగా ఫారం 6 (కొత్త ఓటర్ల నమోదు ఫారం)లో చేసిన మార్పులు, ఎలక్టోరల్ రోల్ సాఫ్ట్‌వేర్‌ను కేంద్రీకరించడం వంటి అంశాలపై ఎన్నికల కమిషనర్లు సుఖ్‌బీర్ సింగ్ సంధు, వివేక్ జోషి గత 10 నెలల్లో కనీసం 14 సార్లు అధికారికంగా అభ్యంతరాలు నమోదు చేసినట్లు ఓ మీడియా నివేదిక వెల్లడించింది. ముఖ్యంగా కొత్త ఓటర్ల నమోదు ఫారంలో చేసిన మార్పులు నిబంధనలకు విరుద్ధమని, ఇది “అనధికారికం, చట్టవిరుద్ధం” అని వారు పేర్కొన్నట్లు తెలిసింది. తమకు తెలియకుండానే కొన్ని నిర్ణయాలు తీసుకున్నారని కూడా వారు ఆక్షేపించినట్లు సమాచారం.

ఈ పరిణామాలపై ప్రతిపక్ష పార్టీలు తీవ్రంగా స్పందించాయి. సీఈసీని తక్షణమే పదవి నుంచి తొలగించాలని, ఆయనపై చట్టపరమైన చర్యలు తీసుకోవాలని డిమాండ్ చేశాయి. ప్రజాస్వామ్య సమగ్రతను దెబ్బతీశారని కాంగ్రెస్, తృణమూల్ కాంగ్రెస్ ఆరోపించాయి. సీఈసీ రాజీనామా చేయాలని డిమాండ్ చేస్తూ ఇవాళ కాంగ్రెస్ దేశవ్యాప్తంగా ఆందోళనలకు దిగనుంది. పార్టీ కార్యకర్తలు నిరసనలు చేపడుతున్నారు.ఉద్ధవ్ థాకరే వర్గం అయితే సీఈసీని అరెస్టు చేయాలని డిమాండ్ చేసింది. ఈ విషయంలో సుప్రీంకోర్టు జోక్యం చేసుకోవాలని విపక్షాలు కోరాయి. మరోవైపు..కాక్రోచ్ పార్టీ సైతం.. సీఈసీ రాజీనామాకు డిమాండ్ చేసింది. దీనికి గానూ డెడ్ లైన్ విధించింది.

ప్రతిపక్షాల ఆరోపణలను భారతీయ జనతా పార్టీ (బీజేపీ) తోసిపుచ్చింది. కమిషన్‌లోని అంతర్గత చర్చల్లో భిన్నాభిప్రాయాలు ఉండటం ప్రజాస్వామ్య ప్రక్రియలో భాగమేనని, దీన్ని సంస్థాగత వైఫల్యంగా చూడలేమని సమర్థించుకుంది. ప్రతిపక్షాల విమర్శలు కేవలం రాజకీయ ప్రేరేపితమని పేర్కొంది. ఈ వివాదంపై ఎన్నికల సంఘం స్పందిస్తూ, కమిషనర్ల మధ్య భిన్నాభిప్రాయాలు, సూచనలు నిర్ణయ ప్రక్రియలో సాధారణమేనని తెలిపింది. ఎస్‌ఐఆర్‌తో సహా అన్ని కీలక నిర్ణయాలు చివరికి ఏకగ్రీవంగానే తీసుకున్నామని స్పష్టం చేసింది.