ఢిల్లీ నుంచి దేశవ్యాప్త పోరాటం.. బరిలోకి కాంగ్రెస్ దళం..!

హస్తిన వీధుల్లో సర్, ఓట్ల తొలగింపు అవకతవకలు, సీఈసీ జ్ఞానేష్ కుమార్ రాజీనామా డిమాండ్ తో ఉదృతంగా పోరాటం చేసిన ఇండీకూటమి పోరాటాన్ని మరింతగా విస్తరించేందుకు ఏర్పాట్లు జరుగుతున్నాయి. ముఖ్యంగా ఈ పోరాటానికి నాయకత్వం వహించిన కాంగ్రెస్.. ఇప్పుడీ ఉద్యమాన్ని క్షేత్రస్థాయికి చేర్చాలని నిర్ణయించింది. దీనికి గానూ ప్రత్యేక కార్యాచరణ రూపకల్పన చేస్తోంది.

“ఓట్ బచావో – దేశ్ బచావో” (ఓటును కాపాడండి – దేశాన్ని రక్షించండి) నినాదంతో చేపట్టనున్న దేశవ్యాప్త ప్రచార కార్యక్రమం కోసం అఖిల భారత కాంగ్రెస్ కమిటీ (ఏఐసీసీ) భారీ స్థాయిలో పరిశీలకులను నియమించింది. కాంగ్రెస్ అధ్యక్షుడు మల్లికార్జున ఖర్గే ఆమోదంతో 208 మంది నేతలతో కూడిన జాబితాను పార్టీ విడుదల చేసింది. ఈ నియామకాలు తక్షణమే అమల్లోకి వస్తాయని ఏఐసీసీ ప్రధాన కార్యదర్శి (సంస్థాగత) కేసీ వేణుగోపాల్ ఒక ప్రకటనలో వెల్లడించారు.

ఈ పరిశీలకులు జిల్లా క్లస్టర్ల వారీగా ప్రచార కార్యక్రమాలను పర్యవేక్షించనున్నారు. రాష్ట్ర విభాగాలతో సమన్వయం చేసుకోవడం, బూత్ స్థాయిలో పార్టీ కార్యకర్తలను సమీకరించడం, సంస్థాగత లోపాలను సరిదిద్దడం వంటి కీలక బాధ్యతలను వీరు నిర్వర్తించనున్నారు. రాబోయే రాజకీయ సవాళ్లను సమర్థవంతంగా ఎదుర్కొనేందుకు పార్టీ శ్రేణుల్లో నూతనోత్సాహం నింపడమే ఈ భారీ నియామకాల ప్రధాన ఉద్దేశమని తెలుస్తోంది.

ఈ జాబితాలో పలువురు సీనియర్ నేతలకు ఏఐసీసీ చోటు కల్పించింది. వీరిలో అధిర్ రంజన్ చౌదరి, పృథ్వీరాజ్ చవాన్, నానా పటోలే, హెచ్.కె. పాటిల్ వంటి జాతీయ నేతలతో పాటు, తెలుగు రాష్ట్రాల నుంచి మాజీ మంత్రులు ఎన్. రఘువీరారెడ్డి, పల్లంరాజు, మాజీ ఎమ్మెల్సీ జి. రుద్రరాజు, మల్లు రవి తదితరులకు కీలక బాధ్యతలు అప్పగించారు.