ఐరాస రిపోర్ట్ అబద్దాల మూట… యువతకు అధిక ప్రాధాన్యమన్న భారత ప్రతినిధులు..
- Published By: Srinivas Mohan
- October 18, 2026 / 08:30 AM IST
ఇటీవలి కాలంలో భారత్ కు వ్యతిరేకంగా ఐక్యరాజ్యసమితిలో పలు నివేదికలు ప్రస్తావనకు వస్తున్నాయి. వాటన్నింటిలోనూ భారత్ టార్గెట్‌గా విమర్శలుంటున్నాయి. ఇటీవలి కాలంలో హస్తినలో యువత ఆందోళనలను ఐక్యరాజ్యసమితిలో ప్రస్తావించారు. లేటస్టుగా… దేశంలో యువత మానసిక ఆరోగ్యం, లింగ సమానత్వం వంటి అంశాలపై చర్చిస్తే వారిపై ప్రతీకార చర్యలు లేదా వేధింపులు జరుగుతున్నాయంటూ ఐక్యరాజ్యసమితి స్పెషల్ రిపోర్టర్ గీనా రొమెరో చేసిన ఆరోపణలను భారత్ తీవ్రంగా ఖండించింది. ఎలాంటి ఆధారాలు లేని, ఎవరో అనామకులు చెప్పిన మాటల ఆధారంగా ఈ నివేదికను రూపొందించారని, ఇది కేవలం వినికిడి సమాచారానికి తొడిగిన నివేదిక ముసుగు అని భారత్ ఘాటుగా విమర్శించింది.
ఐక్యరాజ్యసమితి సర్వప్రతినిధి సభ మూడో కమిటీ సమావేశంలో ఈ అంశంపై భారత్ తన వ్యక్తం నిరసనను చేసింది. ఐరాసలో భారత శాశ్వత మిషన్ ప్రథమ కార్యదర్శి, దౌత్యవేత్త అనూజ్ స్వరూప్ మాట్లాడుతూ.. “ప్రపంచంలోనే అతిపెద్ద యువశక్తి ఉన్న దేశంపై ఇంతటి నిరాధారమైన ఆరోపణలు చేయడం సరికాదు. పేరు కూడా తెలియని వ్యక్తులు ఇచ్చిన సమాచారాన్ని ఆధారంగా చేసుకుని ఈ నివేదిక తయారు చేశారు. ఇది నివేదిక రూపంలో ఉన్న వట్టి పుకార్ల మూట. భారత ప్రతినిధి బృందం దీనిని పూర్తిగా తిరస్కరిస్తోంది” అని స్పష్టం చేశారు. ఇలాంటి ఏకపక్ష, బాధ్యతారహిత నివేదికలు ఐక్యరాజ్యసమితి, దాని సంస్థల విశ్వసనీయతను తీవ్రంగా దెబ్బతీస్తాయని ఆయన ఆందోళన వ్యక్తం చేశారు.
భారత ప్రజాస్వామ్య వ్యవస్థ గొప్పతనాన్ని ఆయన ఈ సందర్భంగా గుర్తుచేశారు. శాంతియుతంగా సమావేశమయ్యే స్వేచ్ఛ, సంఘాలు ఏర్పాటు చేసుకునే హక్కు, వాక్ స్వాతంత్ర్యం, భావప్రకటనా స్వేచ్ఛ వంటివి భారత రాజ్యాంగంలోని ఆర్టికల్ 19 కింద పౌరులకు లభించిన ప్రాథమిక హక్కులని ఆయన వివరించారు. స్వతంత్ర న్యాయవ్యవస్థ, స్వేచ్ఛాయుత మీడియా, జాతీయ మానవ హక్కుల కమిషన్ వంటి వ్యవస్థలు ఈ హక్కులకు రక్షణగా నిలుస్తాయని తెలిపారు.
ప్రభుత్వ విధానాలను ప్రశ్నిస్తూ యువత చేపట్టిన ఎన్నో నిరసనలకు భారత్ వేదికైందని అనూజ్ స్వరూప్(ANUJ SWARUP) ఉదాహరణలతో సహా వివరించారు. ఇటీవలే కొందరు యువకులు వ్యంగ్యాస్త్రాలతో కూడిన ఒక రాజకీయ ఉద్యమం చేపట్టి, ప్రభుత్వ తీరును ప్రశ్నిస్తూ రాజధానిలో ర్యాలీలు నిర్వహించారని, సీనియర్ నేతలతో చర్చలు కూడా జరిపారని గుర్తుచేశారు. అలాగే, పరీక్షలలో అవకతవకలపై విద్యార్థులు నిరసనలు తెలిపినప్పుడు ప్రభుత్వం ఎంతో నిర్మాణాత్మకంగా స్పందించిందని పేర్కొన్నారు.
ప్రత్యేక ప్రతినిధి గీనా రొమెరోకు భారత్ తరఫున ఆయన గట్టిగా హితవు పలికారు. “నిందించే ముందు నిర్ధారించుకోవాలి” అని వ్యాఖ్యానించారు. 140 కోట్ల మంది ప్రజలున్న దేశం గురించి ఎవరో అనామకులు చెప్పిన మాటల ఆధారంగా సాధారణీకరించి మాట్లాడటం సరికాదని, ఇది ఐరాస ప్రతినిధి హోదాకు తగదని అన్నారు. నివేదికలు రూపొందించేటప్పుడు మరింత కఠినమైన ప్రమాణాలు, నిష్పాక్షికత పాటించాలని ఆయన సూచించారు.
