జీతం రాగానే ఇలా చేస్తున్నారా ..అయితే మీ ఆర్థిక ప్రణాళిక దెబ్బతిన్నట్టే!

Personal Finance: ఉద్యోగులకు జీతం పడిన మొదటి రెండు రోజులు ఎంతో సంతోషంగా ఉన్నప్పటికీ, ఆ తర్వాత వరుసగా వచ్చే ఇంటి అద్దెలు, ఈఎంఐలు, క్రెడిట్ కార్డు బిల్లుల వంటి ఖర్చులతో ఒకటో తేదీ వచ్చేసరికి మళ్లీ ఆర్థిక ఇబ్బందులు ఎదురవుతుంటాయి. తక్కువ సంపాదన వల్ల  ఆర్థిక సమస్యలు    రావు, సరైన ప్రణాళిక లేకుండా డబ్బును ఖర్చు చేయడం వల్లే వస్తాయి. అందువల్ల ప్రతి ఒక్కరూ తమ ఆదాయాన్ని బట్టి ఒక క్రమబద్ధమైన బడ్జెట్ వ్యవస్థను ఏర్పాటు చేసుకోవడం ముఖ్యం.

నిపుణుల సూచన..
ఆర్థిక నిపుణుల సూచనల ప్రకారం, ఆదాయంలో ఈఎంఐల వాటా 25 నుండి 35 శాతం దాటకుండా చూసుకోవాలి. వ్యక్తిగత రుణాలు, క్రెడిట్ కార్డుల బిల్లులు లాంటివన్నీ కలిపి జీతంలో 40 శాతం దాటితే అత్యవసర పరిస్థితుల్లో తీవ్ర ఆర్థిక ఒత్తిడిని ఎదుర్కోవాల్సి వస్తుంది. కాబట్టి అందరికీ ఒకే రకమైన బడ్జెట్ సూత్రాలు సరిపోవు. నివసించే ప్రాంతం, కుటుంబ అవసరాలను బట్టి అద్దె, కిరాణా, విద్యుత్ బిల్లులు, పిల్లల ఫీజుల వంటి తప్పనిసరి ఖర్చులకు మొదటి ప్రాధాన్యం ఇవ్వాలి.

 ‘సిప్’తో స్థిరమైన ప్రయోజనాలు..
చాలామంది ఖర్చులన్నీ పోగా మిగిలిన మొత్తాన్ని పొదుపు చేయాలనుకుంటారు, కానీ ఈ విధానాన్ని మార్చుకోవాలి. జీతం అకౌంట్‌లో పడగానే నిర్ణీత మొత్తాన్ని పక్కన పెట్టడం అలవాటు చేసుకోవాలి. అత్యవసర నిధి, రికరింగ్ డిపాజిట్లకు ఆటోమేటిక్‌గా డబ్బు బదిలీ అయ్యేలా చూసుకోవడం ద్వారా ఆర్థిక క్రమశిక్షణ అలవడుతుంది. అలాగే, ఆదాయం పెరిగిన తర్వాత పెట్టుబడులు పెడదామని వాయిదా వేయకుండా, స్థిరమైన క్రమబద్ధమైన పెట్టుబడి విధానం (SIP) ద్వారా చిన్న మొత్తాలతోనే మొదలుపెట్టడం మంచిది. ఆలస్యంగా పెద్ద మొత్తంలో పెట్టే పెట్టుబడి కంటే, ముందుగా ప్రారంభించే చిన్న ‘సిప్’లే దీర్ఘకాలంలో ఎక్కువ లాభాలను అందిస్తాయి. ఆదాయం పెరిగే కొద్దీ సిప్ మొత్తాన్ని కూడా పెంచుకుంటూ పోవచ్చు. దీనితో పాటు అనుకోని ఆపదల్లో కుటుంబాన్ని ఆదుకోవడానికి ఆరోగ్య బీమా, టర్మ్ ఇన్సూరెన్స్ వంటివి తీసుకోవడం తప్పనిసరి ఆర్థిక బాధ్యతగా గుర్తించాలి.

ఎస్ఎఫ్టీ’ తప్పులపై జాగ్రత్త..
ప్రస్తుత  సంవత్సరానికి (2026-27) సంబంధించి ఆదాయపు పన్ను రిటర్నులు (ITR-1, ITR-2, ITR-4) దాఖలు చేసే ప్రక్రియ ప్రారంభమైంది. పన్ను చెల్లింపుదారులు తమ ఆర్థిక లావాదేవీల వివరాలను స్పష్టంగా చూపించాల్సిన సమయమిది. ఆదాయపు పన్ను చట్టం ప్రకారం బ్యాంకులు, ఎన్‌బీఎఫ్‌సీలు, మ్యూచువల్ ఫండ్ ట్రస్టీలు, సబ్-రిజిస్ట్రార్లు ఒక పరిమితి దాటిన పెద్ద ఆర్థిక లావాదేవీలను ‘స్టేట్‌మెంట్ ఆఫ్ ఫైనాన్షియల్ ట్రాన్సాక్షన్స్’ (SFT) రూపంలో పన్ను శాఖకు సమర్పిస్తారు. సాధారణంగా మే 31 నాటికి ఈ ప్రక్రియ పూర్తవుతుంది. ఇందులో డివిడెండ్లు, వడ్డీ చెల్లింపులు, లిస్టెడ్ షేర్లు, మ్యూచువల్ ఫండ్ లావాదేవీలు ప్రధానంగా ఉంటాయి.

పన్ను చెల్లింపుదారులు ఐటీఆర్ దాఖలు చేయడానికి ముందే తమ ఏఐఎస్ (AIS), ఫామ్ 26AS లను డౌన్‌లోడ్ చేసుకుని, ప్రతి ఒక్క లావాదేవీని జాగ్రత్తగా తనిఖీ చేసుకోవాలి. ఒకే లావాదేవీని రెండుసార్లు నివేదించడం, తప్పు లావాదేవీ విలువను నమోదు చేయడం లేదా పాన్ నంబరు తప్పుగా ఇవ్వడం వంటి పొరపాట్లు జరుగుతుంటాయి. ఉమ్మడి ఖాతాల విషయంలో ఒకరి లావాదేవీలను మరొకరి ఖాతాలో తప్పుగా చూపించే అవకాశం కూడా ఉంటుంది. ఏఐఎస్‌లో ఏవైనా తప్పులు ఉంటే వెంటనే ఆన్‌లైన్ పోర్టల్ ద్వారా ఫిర్యాదు చేయాలి. తప్పుల్లేని ఏఐఎస్ వచ్చిన తర్వాతే రిటర్నులను ఫైల్ చేయడం ఉత్తమం.