మార్కెట్ ఫిల్టర్లన్నీ సేఫ్ కాదు.. WHO సంచలన రిపోర్ట్

WHO: మార్కెట్‌లో దొరికే వివిధ రకాల గృహోపయోగ వాటర్ ఫిల్టర్లు ఎంతవరకు సురక్షితం? అవి నీటిలోని ప్రమాదకర వైరస్‌లు, బ్యాక్టీరియాలను నిజంగానే తొలగిస్తున్నాయా? అనే అంశాలపై ప్రపంచ ఆరోగ్య సంస్థ (WHO) నిష్పాక్షికమైన పరిశోధనలు చేసి ఒక అధికారిక నివేదికను విడుదల చేసింది. ‘ఇంటర్నేషనల్ స్కీమ్ టు ఎవల్యుయేట్ హౌస్‌హోల్డ్ వాటర్ ట్రీట్‌మెంట్ టెక్నాలజీస్’ పేరుతో నిర్వహించిన కచ్చితమైన పరీక్షల ఆధారంగా నాణ్యమైన ఫిల్టర్ల జాబితాను తన వెబ్‌సైట్‌లో అందుబాటులో ఉంచింది.

ఏటా దాదాపు 20 వేల  డయేరియా కేసులు..
ముఖ్యంగా అత్యవసర సమయాల్లో, బస్తీలు, గ్రామీణ ప్రాంతాల్లోని పేదలు, తక్కువ ఆదాయ వర్గాల వారు వాడే చిన్న చిన్న ఫిల్టర్లను లక్ష్యంగా చేసుకుని ఈ పరీక్షలు నిర్వహించారు. అపరిశుభ్రమైన నీటిని తాగడం వల్ల అనేక వ్యాధులు ప్రబలుతున్నాయని, గ్రేటర్ హైదరాబాద్‌ పరిధిలోనే ఏటా దాదాపు 20 వేల వరకు డయేరియా (విరేచనాలు) కేసులు నమోదవుతున్నాయని నివేదిక పేర్కొంది.

ఆరు రకాల టెక్నాలజీలపై పరీక్షలు..
మొత్తం నాలుగు రౌండ్లలో 51 రకాల ఉత్పత్తులను డబ్ల్యూహెచ్‌ఓ గుర్తించిన ల్యాబ్‌లలో పరీక్షించారు. నీటిని శుద్ధి చేసేందుకు ఉపయోగించే ప్రధానమైన ఆరు సాంకేతికతలను ఇందులో పరిశీలించారు.

• మెంబ్రేన్ ఫిల్ట్రేషన్
• సిరామిక్ ఫిల్ట్రేషన్
• యూవీ (UV) క్రిమి సంహారక
• సోలార్ క్రిమి సంహారక
• రసాయన క్రిమి సంహారక
• ఫ్లోక్యులేషన్ క్రిమి సంహారక

ఈ పరీక్షల్లో బ్యాక్టీరియాను 99 శాతం, వైరస్‌లను 99.9 శాతం, ప్రొటోజోవాను 99 శాతం వరకు సమర్థవంతంగా ఫిల్టర్ చేసిన ఉత్పత్తులకు మాత్రమే డబ్ల్యూహెచ్‌ఓ ‘స్టార్ రేటింగ్’ ఇచ్చింది. నాణ్యత లేని మిగతా వాటిని నిరభ్యంతరంగా తిరస్కరించింది.

ఐఎస్‌ఐ మార్కు తరహాలోనే గుర్తింపు..
మనదేశంలో ఐఎస్‌ఐ మార్కు మాదిరిగానే, వాటర్ ఫిల్టర్ నాణ్యమైనదా కాదా అని తెలుసుకోవడానికి డబ్ల్యూహెచ్‌ఓ జాబితా ఉపయోగపడుతుంది. తక్కువ ధరలో లభించే మార్కెట్ ఉత్పత్తులకే ఇందులో ప్రాధాన్యత ఇచ్చారు. అయితే, ఈ జాబితాలో లేనంత మాత్రాన అవి నాణ్యత లేనివని చెప్పలేమని, బహుశా అవి ఇంకా పరీక్షల పరిధిలోకి వచ్చి ఉండకపోవచ్చని స్పష్టం చేసింది.

 కీలక సూచనలు..

• వాటర్ ఫిల్టర్ ఎంత మంచిదైనా సరే, దానిని సకాలంలో సర్వీసింగ్ చేయకపోతే వ్యాధుల ముప్పు తప్పదు.
• వేసవి నేపథ్యంలో ప్రతి ఇంట్లోనూ వాటర్ ఫిల్టర్ల పనితీరును తరచూ తనిఖీ చేసుకోవాలి.
• తాగే నీటి రంగు, రుచి, వాసనలలో ఏమాత్రం తేడా వచ్చినా వెంటనే అప్రమత్తం కావాలి.
• వినియోగదారుల ఆరోగ్యాన్ని దృష్టిలో ఉంచుకుని ఈ నాణ్యతా జాబితాను ఎప్పటికప్పుడు అప్‌డేట్ చేస్తామని ప్రపంచ ఆరోగ్య సంస్థ వివరించింది.