మందులు లేకుండానే షుగర్ కంట్రోల్.. నిపుణులు చెప్తున్న ఆ సీక్రెట్స్ ఇవే!

Diabetes: ప్రస్తుత కాలంలో ప్రపంచవ్యాప్తంగా అత్యంత వేగంగా విస్తరిస్తున్న ఆరోగ్య సమస్యల్లో మధుమేహం (డయాబెటిస్) ఒకటి. ఒకప్పుడు వృద్ధులలో మాత్రమే ఎక్కువగా కనిపించే ఈ వ్యాధి, ఇప్పుడు మారుతున్న జీవనశైలి, శారీరక శ్రమ లేకపోవడం, తీవ్రమైన మానసిక ఒత్తిడి , జంక్ ఫుడ్స్ అలవాట్ల కారణంగా యువతలోనూ సాధారణంగా మారుతోంది. అయితే, నిపుణుల అభిప్రాయం ప్రకారం.. మన రోజువారీ ఆహారపు అలవాట్లలో కొన్ని చిన్న చిన్న మార్పులు చేసుకోవడం ద్వారా మధుమేహం బారిన పడకుండా మనల్ని మనం కాపాడుకోవచ్చు.

తాజా వైద్య అధ్యయనాల  ప్రకారం, మూడు ముఖ్యమైన జీవనశైలి మార్పులు డయాబెటిస్‌ను సహజంగా నివారించడంలో కీలక పాత్ర పోషిస్తాయి. దాదాపు ఆరు సంవత్సరాల పాటు 4,700 మందిపై జరిపిన ఈ పరిశోధనలో.. ఈ నియమాలను పాటించిన వారిలో మధుమేహం వచ్చే ప్రమాదం ఏకంగా 31 శాతం వరకు తగ్గినట్లు శాస్త్రవేత్తలు గుర్తించారు.

డయాబెటిస్ ముప్పును తగ్గించే  మార్పులు ఇవే..

1. మెడిటరేనియన్ డైట్ (Mediterranean Diet)..
ఈ తరహా ఆహార విధానంలో తాజా ఆకుకూరలు, కూరగాయలు, పండ్లు, , సంపూర్ణ ధాన్యాలకు (Whole grains) ఎక్కువ ప్రాధాన్యత ఇస్తారు. అలాగే శరీరానికి మేలు చేసే ఆలివ్ ఆయిల్, బాదం, వాల్‌నట్స్ వంటి ఆరోగ్యకరమైన కొవ్వులు (Healthy fats) ఉన్న పదార్థాలను భాగం చేసుకుంటారు. ఈ ఆహారంలో ఫైబర్ (పీచు పదార్థం) పుష్కలంగా ఉండటం వల్ల ఇన్సులిన్ పనితీరు మెరుగవుతుంది. ఫలితంగా రక్తంలో చక్కెర స్థాయిలు అదుపులో ఉంటాయి.

2. క్యాలరీల నియంత్రణ (Calorie Deficit)..
అధిక బరువు లేదా ఊబకాయం అనేది మధుమేహం రావడానికి ప్రధాన కారణాల్లో ఒకటి. అందుకే మనం రోజూ తీసుకునే ఆహారంలో క్యాలరీలను తగ్గించుకోవాలని నిపుణులు సూచిస్తున్నారు. ఈ పరిశోధనలో పాల్గొన్నవారు రోజువారీ ఆహారంలో సుమారు 600 క్యాలరీలను తగ్గించుకున్నారు. దీనివల్ల శరీరంలోని అదనపు కొవ్వు కరిగి బరువు తగ్గడమే కాకుండా, బ్లడ్ షుగర్ లెవెల్స్ కూడా కంట్రోల్‌లోకి వచ్చాయి.

3. క్రమం తప్పకుండా వ్యాయామం..
ఉత్తమమైన ఆహారంతో పాటు శరీరానికి తగిన శారీరక శ్రమ కూడా తోడవ్వాలి. రోజువారీ జీవితంలో కనీసం అరగంట పాటు వాకింగ్ (నడక), యోగా, లేదా తేలికపాటి వ్యాయామాలు చేయడం వల్ల శరీరం ఇన్సులిన్‌ను సమర్థవంతంగా ఉపయోగించుకుంటుంది.ఫైబర్ ఎక్కువగా ఉండే ఆహారం , క్రమబద్ధమైన వ్యాయామం వల్ల రక్తంలో గ్లూకోజ్ స్థాయిలను అద్భుతంగా నియంత్రించవచ్చని స్పష్టం చేసింది.

సమతుల్యమైన ఆహారం, క్రమబద్ధమైన శారీరక శ్రమ, , ఆరోగ్యకరమైన జీవనశైలిని అలవర్చుకోవడం ద్వారా మధుమేహం లాంటి దీర్ఘకాలిక సమస్యలను ఎలాంటి మందులు లేకుండానే సహజంగా దూరం పెట్టవచ్చని వైద్య నిపుణులు సూచిస్తున్నారు.