డేటా సెంటర్ల దెబ్బకు న్యూయార్క్లో విద్యుత్ కష్టాలు.. భారీ కొరత తప్పదా?
ఒకప్పుడు విద్యుత్ సరఫరాలో పెద్దగా ఇబ్బందులు లేని న్యూయార్క్కు ఇప్పుడు కొత్త సమస్య ఎదురవుతోంది. నగరాలు విస్తరిస్తున్నాయి, పరిశ్రమలు పెరుగుతున్నాయి, ముఖ్యంగా ఏఐ (AI) రంగం వేగంగా అభివృద్ధి చెందుతోంది. ఈ క్రమంలో డేటా సెంటర్ల సంఖ్య కూడా భారీగా పెరుగుతోంది. వీటన్నింటికీ విద్యుత్ అవసరం చాలా ఎక్కువ. కానీ పెరుగుతున్న ఈ అవసరాలకు తగ్గట్టుగా విద్యుత్ ఉత్పత్తి మాత్రం పెరగడం లేదు. ఫలితంగా వచ్చే కొన్నేళ్లలో న్యూయార్క్ రాష్ట్రం విద్యుత్ కొరతను ఎదుర్కోవాల్సి రావచ్చని గ్రిడ్ ఆపరేటర్ హెచ్చరిస్తోంది.
2033 నుంచే మొదలవ్వనున్న విద్యుత్ కొరత?
న్యూయార్క్ ఇండిపెండెంట్ సిస్టమ్ ఆపరేటర్ (NYISO) విడుదల చేసిన తాజా అంచనాలు పరిస్థితి ఎంత తీవ్రంగా మారబోతోందో చెబుతున్నాయి. 2033 నాటికి రాష్ట్రంలో విద్యుత్ డిమాండ్కు సరిపడా సరఫరా అందుబాటులో ఉండకపోవచ్చని సంస్థ అంచనా వేసింది. అప్పటికి సుమారు 225 మెగావాట్ల విద్యుత్ లోటు ఏర్పడే అవకాశం ఉంది. అయితే ఇది ఇక్కడితో ఆగేలా కనిపించడం లేదు. మరో మూడేళ్లలో, అంటే 2036 నాటికి ఈ లోటు 1,850 మెగావాట్లకు మించవచ్చని అంచనా వేస్తున్నారు. న్యూయార్క్ రాష్ట్రవ్యాప్తంగా విద్యుత్ కొరత ఏర్పడే అవకాశాన్ని గ్రిడ్ ఆపరేటర్ తొలిసారిగా గుర్తించడం ఈ నివేదికలో కీలకమైన విషయం.
ఏఐ, డేటా సెంటర్లే అసలు సమస్యనా?
ఇప్పుడు ప్రపంచమంతా ఏఐ వైపు పరుగులు తీస్తోంది. కొత్త ఏఐ మోడళ్ల అభివృద్ధి, క్లౌడ్ సేవలు, భారీ కంప్యూటింగ్ కార్యకలాపాల కోసం పెద్ద సంఖ్యలో డేటా సెంటర్లు ఏర్పాటవుతున్నాయి. అయితే వీటిని నడపడానికి ఎంతటి విద్యుత్ అవసరమో చాలామందికి తెలియదు. వేలాది సర్వర్లు నిరంతరం పనిచేయాలి. వాటి వేడిని తగ్గించడానికి కూలింగ్ వ్యవస్థలు కూడా నిరంతరం నడవాలి.
అంటే ఒక డేటా సెంటర్ పనిచేయాలంటే భారీ స్థాయిలో విద్యుత్ అవసరమవుతుంది. ఇలాంటి కేంద్రాలు పెరుగుతున్న కొద్దీ విద్యుత్ డిమాండ్ కూడా అమాంతం పెరుగుతోంది. న్యూయార్క్లో ఇప్పుడు కనిపిస్తున్న సమస్యకు ఇదొక ప్రధాన కారణంగా మారుతోంది. ఒకవైపు కొత్త టెక్నాలజీ కోసం విద్యుత్ అవసరం పెరుగుతుంటే, మరోవైపు ఆ అవసరాన్ని తీర్చే ఉత్పత్తి సామర్థ్యం అదే స్థాయిలో పెరగడం లేదు.
న్యూయార్క్ నగరానికి ముందే కష్టాలు!
రాష్ట్రం మొత్తానికి 2033 నాటికి విద్యుత్ కొరత ఏర్పడవచ్చని అంచనా వేస్తున్నప్పటికీ, కొన్ని ప్రాంతాల్లో పరిస్థితి అంతకంటే ముందే ఇబ్బందికరంగా మారే అవకాశం ఉంది. ముఖ్యంగా న్యూయార్క్ నగరం, లోయర్ హడ్సన్ వ్యాలీ ప్రాంతాలు 2032 నుంచే విద్యుత్ సరఫరా సమస్యలను ఎదుర్కోవచ్చని నివేదిక చెబుతోంది. అంటే రాష్ట్రవ్యాప్తంగా కొరత మొదలయ్యేలోపే, విద్యుత్ వినియోగం ఎక్కువగా ఉండే ఈ ప్రాంతాల్లో సరఫరాపై ఒత్తిడి పెరగవచ్చు. డిమాండ్ పెరుగుతున్న వేగానికి తగ్గట్టుగా కొత్త విద్యుత్ వనరులు అందుబాటులోకి రాకపోతే పరిస్థితి మరింత క్లిష్టంగా మారే అవకాశం ఉంది.
ఇవి కూడా చదవండి
పాత విద్యుత్ కేంద్రాలతో పెరుగుతున్న ఆందోళన
విద్యుత్ డిమాండ్ పెరగడమే న్యూయార్క్కు ఉన్న సమస్య కాదు. అక్కడ ఇప్పటికే పనిచేస్తున్న విద్యుత్ ఉత్పత్తి కేంద్రాలు కూడా పాతబడిపోతున్నాయి. వాటి పనితీరుపై, ఎప్పుడైనా సాంకేతిక సమస్యలు తలెత్తవచ్చనే విషయంలో ఆందోళనలు పెరుగుతున్నాయి. కొత్త అవసరాలు ఒకవైపు, పాత ఉత్పత్తి వ్యవస్థలపై పెరుగుతున్న ఒత్తిడి మరోవైపు.. ఈ రెండూ కలిస్తే విద్యుత్ సరఫరాలో అంతరాయాలు ఏర్పడే ప్రమాదం ఉంది. అందుకే కేవలం విద్యుత్ ఉత్పత్తిని పెంచడమే కాకుండా, ఉన్న గ్రిడ్ వ్యవస్థను మరింత బలోపేతం చేయడం కూడా ఇప్పుడు అత్యవసరంగా మారింది.
ఇప్పుడేం చేయాలి?
ఈ పరిస్థితి నుంచి బయటపడాలంటే న్యూయార్క్ ముందుగానే మేల్కొనాల్సి ఉంటుంది. కొత్త విద్యుత్ ఉత్పత్తి కేంద్రాలను ఏర్పాటు చేయడం, పాత కేంద్రాల సామర్థ్యాన్ని మెరుగుపరచడం, విద్యుత్ నిల్వ వ్యవస్థలను అభివృద్ధి చేయడం వంటి చర్యలు తీసుకోవాల్సి ఉంటుంది. అంతేకాదు, రాబోయే రోజుల్లో డేటా సెంటర్లు, ఏఐ సంస్థల నుంచి ఎంత విద్యుత్ డిమాండ్ వస్తుందో ముందుగానే అంచనా వేసి అందుకు తగిన ఏర్పాట్లు చేసుకోవాలి. లేకపోతే టెక్నాలజీ అభివృద్ధి ఎంత వేగంగా జరిగినా, దానికి అవసరమైన విద్యుత్ అందించడం పెద్ద సవాలుగా మారుతుంది.
మొత్తానికి, ఏఐ విప్లవం ప్రపంచానికి కొత్త అవకాశాలను తెస్తున్నా, దాన్ని నడిపించే విద్యుత్ మాత్రం ఇప్పుడు కీలకమైన వనరుగా మారుతోంది. డేటా సెంటర్ల కోసం పోటీ పెరుగుతున్న కొద్దీ విద్యుత్పై ఒత్తిడి కూడా పెరుగుతోంది. న్యూయార్క్లో కనిపిస్తున్న ఈ పరిస్థితి ఒక్క ఆ రాష్ట్రానికే పరిమితమయ్యే సమస్య కాదు. భవిష్యత్తులో ఏఐ, డేటా సెంటర్లపై భారీగా పెట్టుబడులు పెట్టే ప్రతి దేశం ఎదుర్కోవాల్సి వచ్చే సవాలుకు ఇది ఒక ముందస్తు సంకేతంగా చూడవచ్చు.
—- సూర్య ప్రకాష్ జోశ్యుల







