’’TAGCA 20 వ వార్షికోత్సవ వేడుకలు ఎంతో సంతృప్తిని ఇస్తున్నాయి’’
తెలుగు అసోసియేషన్ ఆఫ్ గ్రేటర్ షార్లెట్ ఏరియా (TAGCA) 20 వ వార్షికోత్సవ వేడుకలు ఘనంగా జరిగాయి. సంస్థ వ్యవస్థాపక సభ్యునిగా, మాజీ అధ్యక్షుని హోదాలో పురుషోత్తమ చౌదరి గూడె ప్రసంగించారు. సంస్థ ఇలా అభివృద్ధి చెందడం తనకెంతో సంతృప్తిని, ఆనందాన్ని కలిగిస్తోందని చెప్పుకొచ్చారు. ఈ చారిత్రాత్మక మైలురాయి వేడుకల్లో భాగం కావడం తనకు ఎంతో ఆనందాన్ని, గర్వాన్ని కలిగిస్తోందని పేర్కొన్నారు.
టాగ్కా కుటుంబ సభ్యులందరినీ ఒకే వేదికపై చూడటం తనకు ఎన్నో మధుర జ్ఞాపకాలను గుర్తుచేసిందని, హృదయాన్ని ఆనందంతో నింపిందని ఆయన తెలిపారు. ఒక చిన్న ఆశయం, ఉమ్మడి నిబద్ధతతో మొదలైన ఈ ప్రయాణం నేడు ఎంతో బలమైన, చైతన్యవంతమైన సంస్థగా ఎదిగి ఎందరో సభ్యుల మరియు విస్తృత సమాజ జీవితాలను ప్రభావితం చేస్తోందని కొనియాడారు.

ఈ అద్భుతమైన వేడుకను నిర్వహించి, అందరినీ ఒకచోట చేర్చిన ప్రస్తుత టాగ్కా కార్యవర్గానికి (ఎగ్జిక్యూటివ్ కమిటీ), ముఖ్యంగా అధ్యక్షుడు దిలీప్ తోటకూరకు ఆయన ప్రత్యేక అభినందనలు తెలిపారు. గత ఇరవై ఏళ్లలో పనిచేసిన మరియు ప్రస్తుత కార్యవర్గ సభ్యులు, వాలంటీర్లు, సభ్యులు, మద్దతుదారుల దూరదృష్టి, అంకితభావం, నిస్వార్థ సేవ వల్లే ఈ విజయం సాధ్యమైందని, ప్రతి ఒక్కరూ టాగ్కా చరిత్రలో ఒక అర్థవంతమైన అధ్యాయాన్ని లిఖించారని ప్రశంసించారు.

గత 20 ఏళ్లుగా సంస్థను నడిపించిన స్నేహం, ఐక్యత, సేవా దృక్పథం భవిష్యత్ తరాలకు కూడా స్ఫూర్తినివ్వాలని ఆయన ఆకాంక్షించారు. టాగ్కా కుటుంబ సభ్యులందరికీ 20వ వార్షికోత్సవ శుభాకాంక్షలు తెలుపుతూ, రాబోయే దశాబ్దాల్లోనూ సంస్థ మరింతగా అభివృద్ధి చెందుతూ సమాజానికి మేలు చేయాలని ఆయన అభిలషించారు.







