టైగర్ ష్రాఫ్ పై దాడి ప్లానింగ్ ఎలా జరిగిందంటే…!
- Published By: Srinivas Mohan
- October 22, 2026 / 01:25 PM IST
బాలీవుడ్ నటుడు టైగర్ ష్రాఫ్‌పై కాల్పుల ఘటన కేసులో దర్యాప్తు వేగవంతమైంది. ఈ కేసులో ప్రధాన నిందితులుగా ఉన్న ముగ్గురు షూటర్లను రాజస్థాన్‌లోని కోటా నుంచి ముంబైకి తరలించారు. నిందితులైన ఫూల్ సింగ్ (18), రెహాన్ అన్సారీ (18), రితిక్ కుమార్ అలియాస్ రోషన్ (22)లకు..అక్టోబర్ 31 వరకు పోలీస్ కస్టడీ విధించారు. కాల్పులకు ఉపయోగించిన రెండు ఫ్యాక్టరీ మేడ్ తుపాకుల కోసం గాలింపు జరుగుతోంది.
ఈ కేసులో నిందితులు నేరానికి ఉపయోగించిన మొబైల్ ఫోన్లను ధ్వంసం చేశారని పోలీసులు కోర్టుకు వివరించారు. దీంతో సోషల్ మీడియా యాప్‌ల ద్వారా వారి కమ్యూనికేషన్లను పునరుద్ధరించడంపై దర్యాప్తు బృందాలు దృష్టి సారించాయి. షూటర్లకు, హ్యాండ్లర్‌గా భావిస్తున్న శుభమ్ లోంకర్‌కు మధ్య జరిగిన సంభాషణలను అధికారులు పరిశీలిస్తున్నారు.
షూటర్లతో పాటు వారికి లాజిస్టిక్స్ అందించిన వారికి కలిపి సుమారు రూ.2 లక్షల వరకు చెల్లింపులు జరిగాయని డిప్యూటీ కమిషనర్ ఆఫ్ పోలీస్ రాజ్ తిలక్ రోషన్ తెలిపారు. ఈ మొత్తంలో రూ.25,000తో సెకండ్ హ్యాండ్ బైక్ కొనుగోలు చేయగా, రూ.37,000 రెహాన్ అన్సారీ ఖాతాకు బదిలీ అయ్యిందని చెప్పారు. నగదు రూపంలో జరిగిన చెల్లింపులు, యూపీఐ లావాదేవీలపై కూడా ఆరా తీస్తున్నట్లు పేర్కొన్నారు.
ప్రాథమిక విచారణ ప్రకారం, అనిల్ పండిట్ అనే వ్యక్తి సమీర్‌ను సంప్రదించగా, అతడు రెహాన్ అన్సారీని సంప్రదించాడు. కాల్పుల కోసం ఫూల్ సింగ్, రితిక్ కుమార్‌లను అన్సారీనే రంగంలోకి దించినట్లు పోలీసులు అనుమానిస్తున్నారు. ఆయుధాలు సరఫరా చేయడం, రవాణా చేయడం, లాజిస్టిక్స్ అందించడం వంటి ఆరోపణలపై రాధ, బబిత అనే ఇద్దరు మహిళలతో సహా మరో ఐదుగురిని పోలీసులు అరెస్ట్ చేశారు.
నిందితులు సోషల్ మీడియా పోస్టులు, రీల్స్ ద్వారా టైగర్ ష్రాఫ్ కదలికలను నిరంతరం పర్యవేక్షించారని పోలీసుల దర్యాప్తులో తేలింది. జుహులోని ప్లేగ్రౌండ్ వద్ద సుమారు 10 రోజుల పాటు రెక్కీ నిర్వహించారు. వాస్తవానికి అక్టోబర్ 11నే దాడికి ప్లాన్ చేసినప్పటికీ, ఆ రోజు నటుడు రాకపోవడంతో అది విఫలమైంది.
