టెంబా బవుమా సంచలన రికార్డు.. 76 ఏళ్ల నిరీక్షణకు తెర..!
- Published By: G Vencatesh
- October 21, 2026 / 07:05 PM IST
దక్షిణాఫ్రికా టెస్ట్ జట్టు కెప్టెన్ టెంబా బవుమా(Temba Bavuma) సరికొత్త చరిత్ర సృష్టించాడు. గెబెహా వేదికగా ఆస్ట్రేలియాతో(SA vs Aus) జరుగుతున్న రెండో టెస్టులో బవుమా 179 పరుగుల మారథాన్ ఇన్నింగ్స్‌తో అద్భుతమైన ప్రదర్శన చేశాడు. వర్షం కారణంగా మ్యాచ్‌ ఆలస్యమవడం, ఆ వెంటనే స్కాట్ బోలాండ్ దెబ్బకు టాప్ ఆర్డర్ కుప్పకూలడంతో తీవ్ర కష్టాల్లో పడిన ప్రొటీస్ జట్టును బవుమా ఒంటిచేత్తో ఆదుకున్నాడు. రేయాన్ రికెల్టన్, మార్కో జాన్సెన్, సైమన్ హార్మర్‌లతో కలిసి కీలక భాగస్వామ్యాలు నెలకొల్పి జట్టు స్కోరును 425/9 పరుగుల వద్ద డిక్లేర్ చేసేలా నడిపించాడు.
ఈ అద్భుతమైన ఇన్నింగ్స్ ద్వారా టెస్ట్ క్రికెట్ చరిత్రలోనే టెంబా బవుమా ఒక అరుదైన మైలురాయిని అందుకున్నాడు. టెస్టుల్లో ఆస్ట్రేలియాపై 150 లేదా అంతకంటే ఎక్కువ పరుగులు చేసిన ‘అత్యంత వృద్ధ కెప్టెన్’గా నిలిచి, గతంలో భారత మాజీ దిగ్గజ కెప్టెన్ మహ్మద్ అజహరుద్దీన్ పేరిట ఉన్న రికార్డును బద్దలు కొట్టాడు. 1998లో కోల్‌కతా టెస్టులో అజహరుద్దీన్ 35 ఏళ్ల 38 రోజుల వయసులో ఆసీస్‌పై 163 పరుగులు చేయగా.. ఇప్పుడు బవుమా 36 ఏళ్ల 154 రోజుల వయసులో 179 పరుగులు చేసి ఆ రికార్డును తన పేరిట లిఖించుకున్నాడు.
కేవలం అజహర్ రికార్డు మాత్రమే కాదు, దక్షిణాఫ్రికా గడ్డపై ఒక టెస్ట్ ఇన్నింగ్స్‌లో 150 ప్లస్ పరుగులు చేసిన అత్యంత వృద్ధ కెప్టెన్‌గా 76 ఏళ్ల సుదీర్ఘ నిరీక్షణకు బవుమా తెరదించాడు. గతంలో 1950లో ఆస్ట్రేలియా కెప్టెన్ ఆర్థర్ లిండ్సే హాసెట్ ఇదే గెబెహా వేదికపై దక్షిణాఫ్రికాపై 36 ఏళ్ల 187 రోజుల వయసులో 167 పరుగులు చేశాడు. మళ్లీ ఇన్నేళ్ల తర్వాత అదే వేదికపై బవుమా ఆ అరుదైన ఘనతను పునరావృతం చేశాడు. కాగా, హోమ్ గ్రౌండ్‌లో ఒక దక్షిణాఫ్రికా కెప్టెన్ చేసిన అత్యధిక స్కోర్లలో హాషీమ్ ఆమ్లా (208, 201), గ్రేమ్ స్మిత్ (183) ల తర్వాత బవుమా చేసిన 179 పరుగులే నాల్గవ అత్యధిక స్కోరు కావడం విశేషం.
