పల్నాడులో కీలక పరిణామం.. నామినేషన్ వేయని మాజీ ఎమ్మెల్యే..!
- Published By: G Vencatesh
- October 21, 2026 / 05:54 PM IST
పల్నాడు జిల్లా రొంపిచర్లలో స్థానిక సంస్థల ఎన్నికల నామినేషన్ల పర్వం తీవ్ర ఉద్రిక్తతకు దారితీసింది. నామినేషన్ల దాఖలు ప్రక్రియ సందర్భంగా రొంపిచర్ల పరిసర ప్రాంతాల్లో అధికార తెలుగుదేశం (TDP), ప్రతిపక్ష వైఎస్సార్ కాంగ్రెస్ పార్టీ (YCP) వర్గీయుల మధ్య ఒక్కసారిగా ఘర్షణ వాతావరణం చోటుచేసుకుంది. ఇరుపక్షాల నాయకులు, కార్యకర్తలు పోటాపోటీగా మొహరించి నినాదాలు చేయడంతో రొంపిచర్ల కేంద్రంగా రాజకీయ సెగలు రాజుకున్నాయి. ఒకానొక దశలో ఇరు వర్గాలు పరస్పరం దాడులకు సిద్ధపడటంతో అక్కడ తీవ్ర ఉద్రిక్త పరిస్థితి నెలకొంది.
ఈ ఘర్షణల నేపథ్యంలో వైఎస్సార్ కాంగ్రెస్ పార్టీకి చెందిన మాజీ ఎమ్మెల్యే గోపిరెడ్డి శ్రీనివాసరెడ్డి నామినేషన్ వేయకుండానే అక్కడి నుంచి వెనుదిరగడం తీవ్ర చర్చనీయాంశంగా మారింది. అక్కడ నెలకొన్న అల్లర్లు, ఉద్రిక్త పరిస్థితుల కారణంగా ఆయన తన నామినేషన్ ప్రక్రియను తాత్కాలికంగా వాయిదా వేసుకున్నారు. అయితే, తాను వెనక్కి తగ్గేదే లేదని, రేపు ఖచ్చితంగా భారీ అనుచరవర్గంతో వచ్చి నామినేషన్ వేస్తానని స్పష్టం చేస్తూ మాజీ ఎమ్మెల్యే గోపిరెడ్డి శ్రీనివాసరెడ్డి అక్కడి నుంచి వెళ్లిపోయారు.
తమ అభ్యర్థులను నామినేషన్లు వేయకుండా అడ్డుకుంటున్నారని వైసీపీ శ్రేణులు ఆరోపిస్తున్నాయి. మరోవైపు రొంపిచర్లలో మళ్లీ ఎలాంటి అవాంఛనీయ సంఘటనలు జరగకుండా పోలీసులు రంగంలోకి దిగి ముందస్తు చర్యలు చేపట్టారు. అక్కడ అదనపు బలగాలను మోహరించి పరిస్థితిని అదుపులోకి తెచ్చేందుకు ప్రయత్నిస్తున్నారు. నామినేషన్లు వేసేందుకు వచ్చే అభ్యర్థులందరికీ, వారు ఏ పార్టీ వారైనా సరే.. తాము పూర్తి స్థాయిలో తగిన భద్రత కల్పిస్తామని పోలీస్ ఉన్నతాధికారులు ప్రకటించారు. ఎవరూ చట్టాన్ని చేతుల్లోకి తీసుకోకూడదని, శాంతిభద్రతలకు విఘాతం కలిగిస్తే కఠిన చర్యలు ఉంటాయని హెచ్చరించారు. పల్నాడు జిల్లాలో నెలకొన్న ఈ ఉత్కంఠ పరిణామాల నేపథ్యంలో, రేపు మాజీ ఎమ్మెల్యే నామినేషన్ వేసే సమయంలో ఎలాంటి పరిస్థితులు చోటుచేసుకుంటాయోనని జిల్లా వ్యాప్తంగా తీవ్ర ఆందోళన నెలకొంది.
