తెలంగాణ గవర్నర్ చేతుల మీదుగా ప్రముఖ దర్శకుడు పి.ఎన్. రామచంద్రరావుకు ప్రతిష్ఠాత్మక ‘కాశ్మీర్ పీఠం’ పురస్కారం

ప్రముఖ సీనియర్ సినీ దర్శకుడు పి.ఎన్. రామచంద్రరావు (PNR) కు ప్రతిష్ఠాత్మక శ్రీ శారదా శతాబ్ది విశేష సమ్మాన్ లభించింది. తెలంగాణ గవర్నర్ శ్రీ శివ ప్రతాప్ శుక్లా ఆయనను ఈ పురస్కారంతో సత్కరించారు.

హైదరాబాద్‌లోని దేవభూమి, సీవీకే పార్క్ లో జరిగిన 15వ శ్రీ శారదా శతాబ్ది సమ్మాన్ సమారోహ్లో ఈ సత్కారం జరిగింది. కాశ్మీర్‌కు చెందిన శ్రీమద్ జగద్గురు శారదా సర్వజ్ఞ పీఠం ట్రస్ట్ ఆధ్వర్యంలో ఈ కార్యక్రమాన్ని నిర్వహించారు. కాశ్మీర్ పీఠాధీశ్వరులు, శ్రీమద్ జగద్గురు శంకరాచార్యుల సమక్షంలో, సుప్రీంకోర్టు మాజీ న్యాయమూర్తి జస్టిస్ పంకజ్ మిట్టల్ ప్రత్యేక అతిథిగా హాజరయ్యారు.

ఐదు దశాబ్దాల సినీ సేవకు గౌరవం

సినిమా రంగంలో ఐదు దశాబ్దాలకు పైగా పి.ఎన్. రామచంద్రరావు అందించిన సేవలకు గుర్తింపుగా ఈ జాతీయ స్థాయి గౌరవాన్ని అందించారు. ముఖ్యంగా కాశ్మీర్ లోయలోని ప్రజల బాధలు, ధైర్యం, త్యాగం, పోరాట స్ఫూర్తిని తన కథనాల్లో ప్రతిబింబించిన తీరు ఈ పురస్కారానికి ప్రధాన కారణంగా నిలిచింది.

సమాజం, త్యాగం, నిజం వంటి అంశాలను తెరపై ముందుకు తీసుకువచ్చిన ఆయన కథన శైలి.. సంస్కృతి, దేశభక్తి, జాతీయ భావనలను సినిమాతో అనుసంధానించగల ప్రత్యేకతను కలిగి ఉందని పురస్కార నిర్వాహకులు పేర్కొన్నారు.

ఒకే ఏడాదిలో రెండు ప్రతిష్ఠాత్మక పురస్కారాలు

PNRకు ఇది మరో ప్రత్యేకమైన సంవత్సరం. ప్రముఖ దర్శకుడు దాసరి నారాయణరావు 79వ జయంతి సందర్భంగా ఈ ఏడాది మే 4న హైదరాబాద్‌లోని ప్రసాద్ ల్యాబ్స్‌లో జరిగిన ‘దాసరి లెజెండరీ అవార్డ్స్’ కార్యక్రమంలో ఆయనకు దాసరి లైఫ్‌టైమ్ అచీవ్‌మెంట్ అవార్డు అందించారు.

ప్రముఖ నిర్మాత తుమ్మలపల్లి రామ సత్యనారాయణ చేతుల మీదుగా ఈ పురస్కారం అందుకున్నారు. తెలుగు, దక్షిణ భారతీయ సినిమా అభివృద్ధిలో పి.ఎన్. రామచంద్రరావు చేసిన కృషికి గుర్తింపుగా ఈ అవార్డును ప్రదానం చేశారు.

52 ఏళ్ల సినీ ప్రయాణం

పి.ఎన్. రామచంద్రరావు సినీ ప్రయాణం 52 సంవత్సరాలకు పైగా కొనసాగుతోంది. ఇప్పటివరకు ఆయన 45కి పైగా చిత్రాలకు దర్శకత్వం వహించగా, 18 చిత్రాలను నిర్మించారు.

తెలుగు, కన్నడ, తమిళం, మలయాళ భాషల్లో ఆయన సినిమాలు తెరకెక్కాయి. 1987లో స్థాపించిన తన సొంత బ్యానర్ గాయత్రి కళా చిత్ర ద్వారా పలు చిత్రాలను నిర్మించారు.

సినీ పరిశ్రమలో ఆయనను ఒకప్పుడు ‘స్టార్ మేకర్’ గా కూడా పిలిచేవారు. జూనియర్ ఎన్టీఆర్, ప్రకాశ్ రాజ్, సౌందర్య, అమల, గౌతమి వంటి పలువురు ప్రముఖ నటీనటులతో ఆయన పనిచేశారు.

నిర్మాణం, దర్శకత్వంతో పాటు సినిమా పంపిణీ రంగంలోనూ ఆయన కీలక పాత్ర పోషించారు. 2011 నుంచి 2019 మధ్య తెలంగాణ ప్రాంతంలో 35కి పైగా ప్రముఖ చిత్రాల విడుదలలను ఆయన పర్యవేక్షించారు.

కొత్త తరానికి మరోసారి తన సత్తా చూపించేందుకు…

దాసరి లైఫ్‌టైమ్ అచీవ్‌మెంట్ అవార్డు ఆయన సుదీర్ఘ సినీ సేవకు గుర్తింపు అయితే.. తాజాగా లభించిన కాశ్మీర్ పీఠం పురస్కారం ఆయన కథనాల్లోని సామాజిక, జాతీయ అంశాలకు లభించిన గౌరవంగా నిలిచింది.

కాశ్మీర్ నేపథ్యంలో PNR భారీ యాక్షన్ థ్రిల్లర్

ఈ గౌరవం అందుకున్న సమయంలోనే పి.ఎన్. రామచంద్రరావు తన కెరీర్‌లో అత్యంత ప్రతిష్ఠాత్మకమైన పాన్-ఇండియా చిత్రాన్ని ప్రేక్షకుల ముందుకు తీసుకొచ్చారు. ఆ సినిమాకు మంచి రెస్పాన్స్ వచ్చింది.

ఆర్టికల్ 370 రద్దు తర్వాత కాశ్మీర్‌లో చోటుచేసుకున్న పరిణామాల స్ఫూర్తితో ఈ సినిమా రూపొందింది. కాశ్మీర్‌లోని కఠినమైన భౌగోళిక పరిస్థితులను నేపథ్యంగా చేసుకుని భారీ స్థాయిలో యాక్షన్ థ్రిల్లర్‌గా ఈ చిత్రాన్ని తెరకెక్కించారు. ధురంధర్ వంటి హై-ఇంటెన్సిటీ మిలిటరీ, స్పై థ్రిల్లర్ల తరహాలో ఈ సినిమాలో కంబాట్ సీక్వెన్స్‌లు, టాక్టికల్ వార్‌ఫేర్, భారీ యాక్షన్ బ్లాక్స్ ఉన్నాయి.

—సూర్య ప్రకాష్ జోశ్యుల