నోట్లో కరిగిపోయే ‘కుంకుమపువ్వు డ్రై ఫ్రూట్స్ మోదక్’ తయారీ విధానం..

పండుగ సీజన్ అనగానే గణనాథునికి అత్యంత ప్రీతికరమైన ప్రసాదం మోదక్ ముందుగా గుర్తువస్తుంది. సంప్రదాయ వంటకాలను ఇష్టపడే వారి కోసం ప్రముఖ చెఫ్ దీపక్ ప్రత్యేకంగా ‘కుంకుమపువ్వు , డ్రై ఫ్రూట్స్ మోదక్’ తయారీ విధానాన్ని పంచుకున్నారు. ఆరోగ్యకరమైన పదార్థాలతో ఇంట్లోనే ఎంతో సులభంగా ఈ మోదక్‌లను ఎలా తయారు చేయాలో పారా వారీగా తెలుసుకుందాం.

కావలసిన పదార్థాలు..
ఈ వంటకం తయారీకి ప్రధానంగా రెండు భాగాలు కావాలి. బియ్యం పిండి ముద్ద కోసం 1 కప్పు బియ్యం పిండి, 1¼ కప్పుల నీళ్లు, 1 టీస్పూన్ నెయ్యి, చిటికెడు ఉప్పు తీసుకోవాలి. అలాగే లోపల నింపే మిశ్రమం కోసం 1 కప్పు టాటా సంపన్  డ్రై ఫ్రూట్స్ & నట్స్ మిక్స్ (సన్నగా తరిగినవి), 4 టాటా సంపన్  ఖర్జూరాలు (గింజలు తీసి గుజ్జు చేసినవి), 2 టేబుల్ స్పూన్ల తురిమిన బెల్లం, 2 టేబుల్ స్పూన్ల పచ్చి కొబ్బరి తురుము, 2 టేబుల్ స్పూన్ల ఎండిన అంజీర్ (సన్నగా తరిగినవి), 8-10 కుంకుమపువ్వు రేకులు (1 టేబుల్ స్పూన్ గోరువెచ్చని పాలలో లేదా నీళ్లలో నానబెట్టినవి), పావు టీస్పూన్ యాలకుల పొడి, 1 టీస్పూన్ నెయ్యి సిద్ధం చేసుకోవాలి.

లోపల నింపే స్టఫింగ్ ..
ముందుగా పాన్‌లో 1 టీస్పూన్ నెయ్యి వేడి చేసి, డ్రై ఫ్రూట్స్ మిక్స్ వేసి 2 నిమిషాలు తేలికగా వేయించాలి. ఆ తర్వాత తరిగిన ఖర్జూరాలు, అంజీర్, కొబ్బరి తురుము , బెల్లం కలపాలి. మిశ్రమం దగ్గరగా వచ్చే వరకు తక్కువ మంటపై ఉడికించాలి. ఆపై నానబెట్టిన కుంకుమపువ్వుతో పాటు ఆ నీటిని, యాలకుల పొడిని కూడా కలిపి మరో నిమిషం పాటు ఉడికించాలి. ఇప్పుడు స్టవ్ మీద నుంచి దించి, ఆ మిశ్రమం పూర్తిగా చల్లారే వరకు పక్కన పెట్టాలి.

బియ్యం పిండి ముద్ద తయారీ విధానం..
మరో పాన్‌లో నీళ్లు, నెయ్యి , ఉప్పు వేసి మంట మీద బాగా మరిగించాలి. మంటను తగ్గించి, క్రమంగా బియ్యం పిండిని పోస్తూ ఉండలు లేకుండా త్వరగా కలపాలి. ఆ తర్వాత మూత పెట్టి 3-4 నిమిషాల పాటు అలా ఉంచాలి. ఆ మిశ్రమాన్ని ఒక ప్లేట్‌లోకి తీసుకుని, అది కొద్దిగా వేడిగా ఉన్నప్పుడే మెత్తని పిండి ముద్దలాగా బాగా కలుపుకోవాలి.

మోదక్‌ల ఆకృతి ..
చేతులకు కొద్దిగా నెయ్యి రాసుకుని, సిద్ధం చేసుకున్న పిండి ముద్దను 12-14 సమాన భాగాలుగా విభజించాలి. ప్రతి భాగాన్ని నెమ్మదిగా నొక్కుతూ, అంచులను పల్చగా చేస్తూ చిన్న గిన్నెలా చేయాలి. దాని మధ్యలో తయారు చేసుకున్న డ్రై ఫ్రూట్స్ మిశ్రమాన్ని ఉంచి, అంచులను మడతలుగా పైకి చేర్చి పైన మూసివేసి సాంప్రదాయ మోదక్ ఆకారంలోకి తీసుకురావాలి. చివరగా నెయ్యి రాసిన స్టీమర్‌లో ఈ మోదక్‌లను అమర్చి, బయటి పొర మెరిసేలా మారే వరకు 10-12 నిమిషాల పాటు ఆవిరిపై ఉడికించాలి. దించి 2 నిమిషాల పాటు అలాగే ఉంచి, కొద్దిగా నెయ్యి రాసి కొన్ని కుంకుమపువ్వు రేకులతో అలంకరిస్తే గుమగుమలాడే రుచికరమైన మోదక్‌లు సిద్ధం.