‘బబ్లూ XXL’ నుంచి దీపావళి స్పెషల్‌గా మ్యాజికల్ ఫస్ట్ స్పార్క్ రిలీజ్

ప్రముఖ నిర్మాతలు పుష్కూర్ రామ్ మోహన్ రావు, భరత్ ఎన్. నారంగ్ నేతృత్వంలోని శ్రీ వెంకటేశ్వర సినిమాస్ సంస్థ ‘బబ్లూ XXL’ తో ప్రేక్షకులను అలరించేందుకు సిద్ధమవుతోంది. యంగ్ ట్యాలెంటెడ్ సుమంత్ ప్రభాస్ హీరోగా నటిస్తున్న ఈ చిత్రాన్ని జెన్ జెడ్ ప్రేక్షకులను ఆకట్టుకునే ఎంటర్‌టైనర్‌గా రూపొందిస్తున్నారు. సోనాలి నారంగ్ సమర్పణలో తెరకెక్కుతున్న ఈ సినిమా సాయిలు కంపాటి దర్శకుడిగా రెండో సినిమా. ఆయన తొలి చిత్రం ‘రాజు వెడ్స్ రాంబాయి’ బ్లాక్‌బస్టర్ విజయం సాధించిన విషయం తెలిసిందే. ఇప్పటికే విడుదలైన బబ్లూ XXL టైటిల్, ఫస్ట్ లుక్‌కు మంచి స్పందన లభించింది.

దీపావళి వేడుకలకు మరింత ప్రత్యేకతను జోడిస్తూ ‘బబ్లూ XXL’ మేకర్స్ తాజాగా ఫస్ట్ స్పార్క్‌ను విడుదల చేశారు. బబ్లూ ప్రేమకథ ఎలా మొదలవుతుందో వినోదాత్మకంగా పరిచయం చేస్తూ ఈ గ్లింప్స్‌ను రూపొందించారు. తొలిచూపులోనే ప్రేమ పుట్టే క్షణంలోని మ్యాజిక్‌ను, ఆ సమయంలో కలిగే ఉత్సాహం, ఆసక్తి, అందమైన భావోద్వేగాలను ఈ ఫస్ట్ స్పార్క్ ఎంతో అందంగా ప్రజెంట్ చేస్తోంది.

ఈ ఫస్ట్ స్పార్క్ ద్వారా గహజీ ఎస్‌కేను కథానాయికగా పరిచయం చేశారు. బబ్లూతో ఆమెకు ఎదురయ్యే తొలి పరిచయం ఒక ఫ్రెష్ రొమాంటిక్ ట్రాక్‌కు పునాది వేస్తుంది. లీడ్ పెయిర్ మధ్య ఆకట్టుకునే ఆన్‌స్క్రీన్ కెమిస్ట్రీ ఈ గ్లింప్స్‌కు మరింత అందాన్ని తీసుకొచ్చింది. తన పరిచయ సన్నివేశాల్లో గహజీ ఎంతో అందంగా కనిపించి ఆకట్టుకున్నారు. విడుదలైన వెంటనే ఈ ప్రమోషనల్ వీడియోకు పాజిటివ్ రెస్పాన్స్ లభించడంతో సినిమాపై ఆసక్తి మరింత పెరిగింది.

సుమంత్ ప్రభాస్ ఈ చిత్రంలో యూత్‌ఫుల్, ఎంటర్‌టైనింగ్ పాత్రలో కనిపించనున్నారు. ఫస్ట్ స్పార్క్‌లో ఆయన సాయిపల్లవి వీరాభిమానిగా పరిచయమయ్యారు. తన సహజమైన కామెడీ టైమింగ్, ఎనర్జిటిక్ స్క్రీన్ ప్రెజెన్స్‌తో పాత్రకు మరింత ఆసక్తిని జోడించారు. ‘రాజు వెడ్స్ రాంబాయి’ బ్లాక్‌బస్టర్ విజయం తర్వాత రచయిత, దర్శకుడు సాయిలు తన రెండో దర్శకత్వ చిత్రంతో మరోసారి ప్రేక్షకులను అలరించేందుకు సిద్ధమవుతున్నారు.

మంచిర్యాల నేపథ్యంలో తెరకెక్కుతున్న ‘బబ్లూ XXL’లో రాధికా శరత్‌కుమార్, జయలలిత, శివాజీ రాజా ప్రముఖ పాత్రల్లో నటిస్తున్నారు. విజయ్ బుల్గానిన్ అందించిన సంగీతం, బ్యాక్‌గ్రౌండ్ స్కోర్ ఫస్ట్ స్పార్క్‌లోని రొమాంటిక్ మూడ్‌ను మరింత అందంగా ఎలివేట్ చేశాయి.

ఈ చిత్రానికి వాజిద్ బేగ్ సినిమాటోగ్రాఫర్‌గా, నరేష్ అడుప ఎడిటర్‌గా, పవన్ కల్యాణ్ ఎల్లపు ఆర్ట్ డైరెక్టర్‌గా, ఆయేషా మరియం కాస్ట్యూమ్ డిజైనర్‌గా పనిచేస్తున్నారు. జానీ, జేడీ కొరియోగ్రఫీ అందిస్తున్నారు.

ప్రస్తుతం శరవేగంగా షూటింగ్ జరుపుకుంటున్న ఈ చిత్రాన్ని 2027 ప్రారంభంలో థియేటర్లలో విడుదల చేసేందుకు ప్లాన్ చేస్తున్నారు. ఫ్రెష్ రొమాంటిక్, యూత్‌ఫుల్ ఎంటర్‌టైన్‌మెంట్‌తో ‘బబ్లూ XXL’ క్రమంగా ప్రేక్షకుల్లో అంచనాలను పెంచుకుంటోంది.