US: ఆల్ఫాబెట్ సెంచరీ బాండ్.. క్యూ కట్టిన మదుపరులు..!

టెక్ దిగ్గజం గూగుల్ మాతృ సంస్థ ఆల్ఫాబెట్ ఇంక్, ఆర్టిఫిషియల్ ఇంటెలిజెన్స్ (ఏఐ) రంగంపై పూర్తిస్థాయి ఫోకస్ పెట్టింది. భవిత ఏఐపైనే ఉందని గుర్తించిన ఆల్ఫాబెట్… ఈరంగంలో తన ఆధిపత్యాన్ని నిలబెట్టుకునేందుకు భారీ ప్రణాళికతో ముందుకొచ్చింది. ఈ క్రమంలో, రికార్డు స్థాయిలో దాదాపు 32 బిలియన్ డాలర్ల నిధులను కేవలం 24 గంటల్లోనే బాండ్ల రూపంలో సమీకరించింది. ఇందులో భాగంగా 100 ఏళ్ల కాలపరిమితితో ‘సెంచరీ బాండ్’ జారీ చేయడం టెక్ ప్రపంచంలో సంచలనంగా మారింది.

ఫిబ్రవరి 9, 10 తేదీల్లో ఆల్ఫాబెట్ ఈ భారీ రుణ సమీకరణను పూర్తి చేసింది. అమెరికా మార్కెట్లో 20 బిలియన్ డాలర్లు, బ్రిటన్ మార్కెట్లో 5.5 బిలియన్ పౌండ్లు (సుమారు 7.53 బిలియన్ డాలర్లు), స్విస్ మార్కెట్లో 3.055 బిలియన్ ఫ్రాంకుల రూపంలో బాండ్లను విక్రయించింది. ముఖ్యంగా, బ్రిటన్‌లో జారీ చేసిన బాండ్లలో ఒక బిలియన్ పౌండ్ల విలువైన 100 ఏళ్ల ‘సెంచరీ బాండ్’ కూడా ఉంది. 1990ల తర్వాత ఒక పెద్ద టెక్ కంపెనీ ఇలాంటి సుదీర్ఘకాలిక బాండ్‌ను జారీ చేయడం ఇదే తొలిసారి .

ఏఐ రంగంలో పెరుగుతున్న పోటీని తట్టుకుని, తన జెమినీ మోడల్, క్లౌడ్ ఇన్‌ఫ్రాస్ట్రక్చర్‌ను మరింత విస్తరించడమే లక్ష్యంగా ఆల్ఫాబెట్ ఈ నిధులను సమీకరించింది. 2026 సంవత్సరంలో సుమారు 185 బిలియన్ డాలర్ల మూలధన వ్యయం (క్యాపెక్స్) చేయాలని కంపెనీ అంచనా వేస్తోంది. ఇది గత ఏడాది కంటే దాదాపు రెట్టింపు కావడం గమనార్హం. ఈ నిధులను ప్రధానంగా ఏఐ సామర్థ్యాలను పెంచేందుకు, కొత్త డేటా సెంటర్ల నిర్మాణానికి ఉపయోగించనుంది.

ఆల్ఫాబెట్ బాండ్లకు ఇన్వెస్టర్ల నుంచి అనూహ్యమైన స్పందన లభించింది. అమెరికా డాలర్ బాండ్ల కోసం ఏకంగా 100 బిలియన్ డాలర్లకు పైగా ఆర్డర్లు రాగా, 100 ఏళ్ల బాండ్‌కు కూడా దాదాపు 10 రెట్ల డిమాండ్ కనిపించింది. “సాధారణంగా ప్రభుత్వాలు లేదా స్థిరమైన ఆదాయం ఉండే యుటిలిటీ కంపెనీలు మాత్రమే వందేళ్ల బాండ్లను జారీ చేస్తాయి. ఇప్పుడు టెక్ కంపెనీకి కూడా ఇన్వెస్టర్లు అంతటి విశ్వాసాన్ని చూపడం ఏఐపై వారికున్న దీర్ఘకాలిక నమ్మకాన్ని సూచిస్తోంది,” అని గ్లోబల్ మార్కెట్ విశ్లేషకులుచెబుతున్నారు.

అయితే, నిరంతరం వేగంగా మారుతున్న టెక్నాలజీ రంగంలోని కంపెనీపై ఇంత దీర్ఘకాలిక పెట్టుబడి పెట్టడం సమర్థనీయం కాదని కొందరు నిపుణులు అభిప్రాయపడుతున్నారు. మొత్తం మీద, ఈ భారీ రుణ సమీకరణతో ఆల్ఫాబెట్ తన భవిష్యత్తును పూర్తిగా ఏఐపైనే పందెం కాస్తోందన్న బలమైన సంకేతాన్ని మార్కెట్లకు పంపింది.