ఎలాన్‌ మస్క్‌ భారీ సాయం… ట్రంప్‌ కోసం ప్రతినెలా!

అమెరికా అధ్యక్ష ఎన్నికల్లో రిపబ్లికన్‌ పార్టీ అభ్యర్థి డొనాల్డ్‌ ట్రంప్‌నకు పూర్తి మద్దతు ప్రకటించారు స్పేస్‌ఎక్స్‌, టెస్లా సంస్థ అధినేత ఎలాన్‌ మస్క్‌. ఈ క్రమంలోనే ట్రంప్‌ కోసం భారీఎత్తున నిధులు సమకూర్చేందుకు ఆయన సిద్ధమైనట్లు తెలుస్తోంది. ప్రతినెలా దాదాపు 45 మిలియన్‌ డాలర్లు (భారత కరెన్సీలో దాదాపు రూ.376 కోట్లు) ఇచ్చేందుకు ప్రణాళికలు  రూపొందిస్తున్నామని మస్క్‌ చెప్పినట్లు సమాచారం.  ఈ అధ్యక్ష ఎన్నికల్లో ట్రంప్‌నకు గానీ, బైడెన్‌కు గానీ  తన వైపు నుంచి ఆర్థిక సహకారం ఉండబోదంటూ గతంలో మస్క్‌ ప్రకటించారు. అయితే, మనసు మార్చుకున్న టెస్లా అధినేత ఇప్పటికే మాజీ అధ్యక్షుడి తరపున ప్రచార కార్యక్రమాలు నిర్వహిస్తున్న పొలిటికల్‌ యాక్షన్‌ కమిటీ ( పీఏసీ) కి పెద్ద మొత్తంలో విరాళం అందించారు. అయితే, ఎంత ఇచ్చారన్నది ఇంకా వెల్లడి కాలేదు. తాజాగా ట్రంప్‌పై కాల్పుల ఘటనతో ఆయనకు పూర్తి మద్దతు ప్రకటించిన మస్క్‌, ఇప్పుడు మరోసారి విరాళాలు అందించేందుకు ముందుకొచ్చినట్లు తెలుస్తోంది.