KYIV: అవినీతి సంక్షోభంలో కీవ్.. చిక్కుల్లో జెలెన్ స్కీ ..!

ఓవైపు రష్యా యుద్ధం రావణకాష్టంలా కాలుతోంది. ఈ యుద్ధంలో లక్షలాది మంది ఉక్రెయిన్ సైనికులు, పౌరులు ప్రాణాలు కోల్పోయారు.దీన్నిముగించేందుకు ఎన్ని ప్రయత్నాలు జరుగుతున్నా అవి సరైన ఫలితాలివ్వడం లేదు. ఇలాంటి తరుణంలో ప్రభుత్వంలోని అధికారుల అవినీతి… అక్కడి ప్రజల్లో చర్చనీయాంశమైంది.అధ్యక్షుడు వొలోదిమిర్‌ జెలెన్‌స్కీ(Zelensky) ప్రధాన కార్యనిర్వాహక అధికారి ఆంద్రీ యెర్మాక్‌ గృహం, కార్యాలయాలను అవినీతి నిరోధక సంస్థల అధికారులు శుక్రవారం ఉదయం సోదా చేశారు. చమురు రంగంలో 10 కోట్ల డాలర్ల అవినీతి జరిగిందనే ఆరోపణలను పురస్కరించుకుని ఈ దాడులు జరిగాయి.

రష్యాతో యుద్ధం కొనసాగుతూ, అమెరికా ఒత్తిడిపై శాంతికి ఒప్పుకోవలసిన అగత్యం ముంచుకొస్తున్న సమయంలో అవినీతి నిరోధక శాఖల అధికారుల దాడులు జరగడం జెలెన్‌స్కీ సర్కారుకు ఇబ్బందికరమే. అమెరికాతో చర్చల్లో యెర్మాక్‌ పాల్గొంటున్నారు. యెర్మాక్‌ నివాసం ఉండే అపార్ట్‌మెంట్‌ రాజధాని కీవ్‌లో జెలెన్‌స్కీ కార్యాలయ సముదాయంలోనే ఉంది. యెర్మాక్‌ నివాసంలో అవినీతి నిరోధక శాఖ అధికారులు సోదాలు జరిపిన వేళ జెలెన్‌స్కీ ఆ కాంప్లెక్స్‌లో ఉన్నదీ లేనిదీ తెలియరాలేదు.

ఒకప్పుడు జెలెన్‌స్కీకి వ్యాపార భాగస్వామి తైమూర్‌ మిండిచ్‌ చమురు కుంభకోణానికి సూత్రధారి అని దర్యాప్తు అధికారులు అనుమానిస్తున్నారు. తైమూర్‌ దేశం విడచిపరారైనా ఆయన పరోక్షంలోనే విచారణ జరిగే అవకాశముంది. చమురు కుంభకోణాన్ని పురస్కరించుకుని ఇద్దరు మంత్రులు రాజీనామా చేశారు కూడా. యెర్మాక్‌ సహాయకులు ఇద్దరు 2024లోనే రాజీనామా చేయగా, మరో సహాయకుడు ఇంకా విధుల్లో కొనసాగుతున్నారు. ఈ ముగ్గురిపై లంచగొండి ఆరోపణలపై దర్యాప్తు జరుగుతోంది. యెర్మాక్‌కు అవినీతిలో పాత్ర ఉందని ఆరోపణలు రాకపోయినా అతడికీ ఉద్వాసన చెప్పాలని ఒత్తిడి పెరుగుతోంది.

ఐరోపా సమాఖ్య (ఈయూ)లో చేరాలనుకుంటున్న జెలెన్‌స్కీకి మొదట అవినీతిని నిర్మూలించాలని ఈయూ షరతుపెడుతోంది. పూర్వాశ్రమంలో న్యాయవాది అయిన యెర్మాక్‌ …15 ఏళ్ల క్రితం టీవీ కార్యక్రమాల నిర్మాణంలో ప్రవేశించారు. అప్పట్లో టీవీ హాస్య నటుడిగా పేరున్న జెలెన్‌స్కీతో ఆయనకు సాన్నిహిత్యం ఏర్పడింది. జెలెన్‌స్కీ దేశాధ్యక్షుడైన తరవాత ఆయనకు కుడిభుజంగా వ్యవహరించసాగారు. ప్రధానమంత్రి, ఇతర మంత్రుల నియామకంలోనూ యెర్మాక్‌ పాత్ర ఉంది. రష్యాతో శాంతి కుదుర్చుకోవాలని అమెరికా నుంచి ఒత్తిడి పెరుగుతున్న వేళ యెర్మాక్‌ ఉదంతం జెలెన్‌ స్కీకి గుదిబండలా పరిణమిస్తోంది.