WhatsApp: రూల్స్ పాటించలేదని రష్యాలో వాట్సాప్ బంద్

రష్యాలో ఇంటర్నెట్ ఆంక్షలు తారస్థాయికి చేరాయి. సోషల్ మీడియా దిగ్గజం మెటా (Meta) సంస్థకు చెందిన ప్రముఖ మెసేజింగ్ ప్లాట్‌ఫామ్ ‘వాట్సాప్’ (WhatsApp) సేవలను రష్యా ప్రభుత్వం దేశవ్యాప్తంగా పూర్తిగా నిలిపివేసింది. దేశీయ చట్టాలను, డేటా భద్రతా నిబంధనలను పాటించడంలో మెటా విఫలమైందంటూ రష్యా టెలికాం రెగ్యులేటర్ ఈ కఠిన నిర్ణయం తీసుకుంది. దేశ భద్రతకు ముప్పు వాటిల్లేలా, తప్పుడు సమాచారం వ్యాప్తి చెందేలా వాట్సాప్ వ్యవహరిస్తోందని, పదేపదే హెచ్చరించినా సంస్థ తన తీరును మార్చుకోలేదని క్రెమ్లిన్ వర్గాలు వెల్లడించాయి. ఇప్పటికే ఫేస్‌బుక్, ఇన్‌స్టాగ్రామ్‌లను ‘అతివాద సంస్థలు’గా (Extremist) ప్రకటించి నిషేధించిన రష్యా, ఇప్పుడు చివరిగా మిగిలిన వాట్సాప్‌ను కూడా బ్లాక్ చేయడంతో అక్కడి ప్రజలకు పాశ్చాత్య సోషల్ మీడియాతో సంబంధాలు దాదాపుగా తెగిపోయినట్లయింది.

అయితే ప్రజల కమ్యూనికేషన్ అవసరాల కోసం రష్యా ప్రభుత్వం స్వయంగా ఒక కొత్త ప్రత్యామ్నాయాన్ని తెరపైకి తెచ్చింది. ‘మాక్స్’ (Max) పేరుతో రూపొందించిన ప్రభుత్వ ఆధ్వర్యంలోని జాతీయ మెసెంజర్ యాప్‌ను వినియోగించాలని పౌరులకు సూచించింది. ఇది పూర్తి స్వదేశీ పరిజ్ఞానంతో తయారైందని, రష్యన్ సర్వర్లలో డేటా నిక్షిప్తమై ఉంటుందని, కాబట్టి విదేశీ గూఢచర్యానికి ఆస్కారం ఉండదని ప్రభుత్వం భరోసా ఇస్తోంది. పాశ్చాత్య దేశాల (WhatsApp) టెక్నాలజీ ఆధిపత్యానికి చెక్ పెట్టేందుకే రష్యా తన సొంత ఇంటర్నెట్ వ్యవస్థను (Sovereign Internet) బలపరుచుకుంటోందని అంతర్జాతీయ విశ్లేషకులు భావిస్తున్నారు.