వందల ఏళ్ల నాటి శవాలు ఆన్‌లైన్‌లో అమ్మకం! కొంటున్నవాళ్లు వాటితో ఏం చేస్తున్నారు?

శతాబ్దాల క్రితం చనిపోయిన ఓ మనిషి శరీరం.

ఎండిపోయిన చేతులు. ముడుచుకుపోయిన పాదాలు. జుట్టు ఇంకా అలాగే ఉన్న తల.
కొన్ని సందర్భాల్లో మొత్తం మమ్మీ. ఒకప్పుడు ఇవన్నీ పురావస్తు పరిశోధనలో భాగం.మరి
ఇప్పుడు?అలాంటి మమ్మీ అవశేషాలు ఆన్‌లైన్‌లో అమ్మకానికి వస్తున్నాయి.

సోషల్ మీడియా పోస్టులు, ఈ-కామర్స్ ప్లాట్‌ఫార్ములు, వ్యక్తిగత వెబ్‌సైట్లు, వేలం సంస్థలు… ఇలా మనిషి శరీర అవశేషాలకు కూడా ఒక రహస్య మార్కెట్ ఏర్పడుతోంది.

ఇంత పాత మానవ అవశేషాలను అసలు ఎవరు కొంటున్నారు? ఎందుకు కొంటున్నారు? వాటితో ఏం చేస్తున్నారు?

అసలు వీటిని ఏం చేస్తారు?

చాలామంది వీటిని అరుదైన పురాతన వస్తువులుగా కొనుగోలు చేస్తున్నారు. తమ వ్యక్తిగత కలెక్షన్లలో ఉంచుతున్నారు. కొందరు ఇంట్లో ప్రదర్శిస్తున్నారు. మరికొన్ని ఆన్‌లైన్ వేలాల్లో అమ్ముతున్నారు.

పరిశోధకులు 128 ఆన్‌లైన్ పోస్టులను పరిశీలించగా, మమ్మీ చేసిన చేతులు, కాళ్లు ఎక్కువగా కనిపించాయి. అయితే 51.6 శాతం లిస్టింగ్స్‌లో తలలు, పుర్రెలు లేదా జుట్టు, మృదుకణజాలంతో ఉన్న మానవ తల అవశేషాలు ఉన్నట్లు గుర్తించారు.

అంటే ఒకప్పుడు ఒక మనిషిగా ఉన్న శరీరం… ఇప్పుడు ఎవరో ఒకరి కలెక్షన్ పీస్ గా మారుతోంది. అయితే అక్కడ పెద్ద ప్రమాదం పొంచి ఉందంటున్నారు శాస్త్రజ్ఞులు.

వందల ఏళ్ల తర్వాత కూడా ప్రమాదమా?

ఇదే అసలు షాకింగ్ విషయం. మమ్మిఫికేషన్‌లో శరీరం కుళ్లిపోకుండా ఉండేందుకు గతంలో వివిధ రసాయనాలను ఉపయోగించారు. కొన్ని సందర్భాల్లో ఆర్సెనిక్, మెర్క్యురీ, లెడ్ వంటి భారీ లోహాలు కూడా ఉపయోగించబడ్డాయి. అదే సమయంలో శతాబ్దాల పాటు ఎండిపోయిన మానవ అవశేషాల్లో కొన్ని సూక్ష్మజీవులు, ముఖ్యంగా ఫంగస్ స్పోర్లు, నిద్రాణంగా మిగిలి ఉండే అవకాశం ఉంది.

అవశేషాన్ని కదిలించినప్పుడు అవి గాల్లోకి వ్యాపిస్తే? దాన్ని తాకిన వ్యక్తి మాత్రమే కాదు… అదే గదిలో ఉన్నవాళ్లు కూడా ప్రమాదంలో పడొచ్చు.

“మమ్మీ కర్స్” నిజానికి ఇదేనా?

మమ్మీ సమాధులను తెరిస్తే మరణం వెంటాడుతుందనే కథలు ఎన్నో ఉన్నాయి. Tutankhamun సమాధి తెరిచిన తర్వాత Lord Carnarvon మరణించడంతో ఈ కథ మరింత బలపడింది.

కానీ శాస్త్రవేత్తలకు ఇందులో అతీంద్రియ శక్తుల కంటే Aspergillus వంటి ఫంగస్ స్పోర్ల వల్ల వచ్చే ఇన్ఫెక్షన్ ఎక్కువ ఆసక్తికరం.

పోలాండ్‌లోని Krakówలో King Casimir IV సమాధిని తెరిచినప్పుడు 12 మంది conservation scientistsలో 10 మంది మరణించారు. Aspergillus స్పోర్లను పీల్చడం దీనికి కారణమై ఉండవచ్చని పరిశోధనలో పేర్కొన్నారు.

అంటే… మమ్మీకి శాపం లేకపోయినా, మమ్మీ మాత్రం ప్రమాదకరంగా ఉండొచ్చు.

మరి కొరియర్ బాయ్ పరిస్థితి?

ఇక్కడే ఈ కథ మరింత భయపెడుతుంది. మమ్మీ అవశేషాలు పోస్టు, కొరియర్ ద్వారా కూడా పంపిస్తున్నారు. ప్యాకెట్‌ను ప్యాక్ చేసేవాళ్లు… వేర్‌హౌస్ సిబ్బంది… డెలివరీ డ్రైవర్లు… ట్రాన్స్‌పోర్ట్ హబ్ ఉద్యోగులు… కస్టమ్స్ అధికారులు… వాళ్లెవరికీ ఆ ప్యాకెట్‌లో మానవ శరీర అవశేషం ఉందని తెలియకపోవచ్చు. అవసరమైన రక్షణ పరికరాలు లేకుండానే దాన్ని చేతులతో పట్టుకునే అవకాశం ఉంది.

పరిశోధకులు పరిశీలించిన కొన్ని ఫొటోల్లో తీవ్రంగా క్షీణించిన మమ్మీ అవశేషాలు గాజు కవర్ లేకుండా, సాధారణ ఇళ్లలోనే ఉంచినట్లు కనిపించాయి.

అంటే మ్యూజియంలో అత్యంత జాగ్రత్తగా భద్రపరచాల్సిన వస్తువు… ఎవరో ఇంట్లో షెల్ఫ్‌పై ఉండొచ్చు.

అసలు శాపం ఎవరిది?

మమ్మీ నిజంగా శాపం ఇస్తుందా? దానికి శాస్త్రీయ ఆధారం లేదు. కానీ శతాబ్దాల నాటి మానవ అవశేషాలను ఎలాంటి భద్రత లేకుండా కొనడం, అమ్మడం మాత్రం నిజమైన ప్రమాదమే. శాపం మమ్మీ నుంచి రావాల్సిన అవసరం లేదు. మనిషి శరీరాన్ని ఒక “కలెక్షన్ ఐటమ్”గా మార్చి, దాని లోపల దాగి ఉన్న ప్రమాదాన్ని పట్టించుకోకపోవడమే… అసలు మమ్మీ కర్స్ కావచ్చు. వాటిలో దాగి ఉండేది కేవలం చరిత్ర కాదు.

కొన్ని సందర్భాల్లో ప్రమాదకరమైన సూక్ష్మజీవులు, విషపూరిత రసాయనాలు కూడా కావచ్చు. అందుకే పరిశోధకులు దీనికి ఒక షాకింగ్ పేరు పెట్టారు. “The Real Mummy’s Curse.”. అసలు శాపం మనిషి చరిత్రను ఒక వస్తువుగా మార్చి, దాని ప్రమాదాలను పట్టించుకోకుండా మార్కెట్‌లోకి విసిరేయడంలో ఉంది. శాపం ఉంటే… అది మమ్మీ నుంచి రావాల్సిన అవసరం లేదు. మన నిర్లక్ష్యం నుంచే రావచ్చు.