హైదరాబాద్‌లో కొలరాడో డెన్వర్‌ యూనివర్సిటీ .. భారత్​లో తొలి అమెరికన్​ ప్రభుత్వ విశ్వవిద్యాలయ​ క్యాంపస్ ఇదే

అమెరికా (America)కు చెందిన ప్రభుత్వ యూనివర్సిటీ కొలరాడో డెన్వర్‌ (University of Colorado Denver ) (సీయూ డెన్వర్‌) తన విదేశీ ప్రాంగణాన్ని హైదరాబాద్ (Hyderabad) నగరంలో త్వరలో ప్రారంభించనుంది. తెలంగాణ రాష్ట్రంలోనే కాకుండా మొత్తం భారత్‌ (India) లోనే క్యాంపస్​ ఏర్పాటు కోసం అనుమతి పొందిన తొలి అమెరికన్‌ ప్రభుత్వ విశ్వవిద్యాలయం ఇదే కావడం విశేషం. భాగ్యనగరంలో సీయూ క్యాంపస్‌ను నెలకొల్పేందుకు ఆ వర్సిటీ తాజాగా యూనివర్సిటీ గ్రాంట్ కమిషన్ నుంచి లెటర్‌ ఆఫ్‌ ఇంటెంట్‌ (ఎల్‌ఓఐ) పొందింది. 2027 ఆగస్టు నుంచి క్లాసులు ప్రారంభించేందుకు సన్నాహాలు చేస్తున్నారు.

విద్యా నాణ్యత, ఫలితాలు, ఉద్యోగ మార్కెట్‌కు అనుగుణమైన స్కిల్స్​పై ఈ వర్సిటీ ప్రధానంగా దృష్టి పెట్టనుంది. బిజినెస్, అనలిటిక్స్‌, కంప్యూటింగ్, ఇంజినీరింగ్ వంటి అధిక డిమాండ్‌ ఉన్న రంగాల్లో కోర్సులను సీయూ డెన్వర్ అందించనుంది. వర్సిటీ ఛాన్సలర్‌ కెన్నెత్‌ క్రిస్టెన్సెన్‌ (Kenneth Christensen) మాట్లాడుతూ భారతీయ విద్యార్థులతో తమకున్న సుదీర్ఘ అనుబంధాన్ని ఈ క్యాంపస్‌ ద్వారా మరింత ముందుకు తీసుకెళ్తామన్నారు. వివిధ రంగాల్లో తమకున్న ప్రత్యేక అనుభవాన్ని భారత్‌లోని విద్యార్థులకు అందించే అవకాశం లభించడం పట్ల సంతోషం వ్యక్తం చేశారు.