పాలమూరు రంగారెడ్డికి ప్రాధాన్యం..నిధుల విడుదలలో జాప్యం ఉండదు : సీఎం రేవంత్

పాలమూరు-రంగారెడ్డి ఎత్తిపోతల ప్రాజెక్టును ఈ టర్మ్ లోనే పూర్తి చేస్తామని తెలంగాణ ముఖ్యమంత్రి రేవంత్ రెడ్డి (Revanth Reddy) స్పష్టం చేశారు. ఉమ్మడి మహబూబ్ నగర్ (Mahabubnagar) జిల్లా మంత్రులు, ఎమ్మెల్యేలతో సీఎం ఎంసీహెచ్ఆర్డీ లో ప్రాజెక్టులపై సమీక్షించారు. పాలమూరు ( Palamuru)- రంగారెడ్డి (Rangareddy)కి సంబంధించి నియోజకవర్గాల వారీగా ఉన్న సమస్యలను చర్చించారు. ఈ సందర్భంగా రేవంత్ రెడ్డి మాట్లాడారు. ఈ ప్రాజెక్టుకు సంబంధించి నిలిచిపోయిన భూ సేకరణ ప్రక్రియను యుద్ధప్రాతిపది కన పూర్తి చేయాలని, జిల్లా మంత్రులు ( Ministers), ఎమ్మెల్యేలందరూ పాలు పంచుకోవాలని, దగ్గరుండి మరీ పూర్తి చేయించాలని నిర్దేశించారు. భూసేకరణ పూర్తి కాగానే పనులు కూడా చేపట్టాలని స్పష్టం చేశారు. ఉమ్మడి మహబూబ్ నగర్ జిల్లాలో బీమా, నెట్టెంపాడు, కోయిల్ సాగర్, మక్తల్- నారాయణపేట- కొడంగల్, కల్వకుర్తి ఎత్తిపోతల పథకాలకు అవసరమైన భూములను సేకరించే ప్రక్రియను యుద్ధప్రాతిపదికన చేపట్టాలన్నారు. భూ సేకరణపై నియోజకవర్గాల వారీగా సమావేశాలు నిర్వహించి పూర్తి వివరాలు తనకు ఇవ్వాలని నిర్దేశించారు. ఆ సమావేశాలకు ఈఎన్సీలనూ పంపిస్తానని చెప్పారు. ప్రాజెక్టుల భూసేకరణను తమ ప్రభుత్వం అత్యంత ప్రాధాన్య అంశంగా తీసుకుందని, భూ సేకరణకు నిధుల విడుదలలో ఎటువంటి జాప్యమూ ఉండబోదని, పెండింగ్ బిల్లుల చెల్లింపులను కూడా పూర్తి చేయడానికి సిద్ధంగా ఉన్నామని భరోసా ఇచ్చారు.