ముదిరిన ‘కొండా vs కడియం’ వివాదం.. ఇక తాడోపేడో!!
- Published By: Vasishta
- July 9, 2026 / 03:15 PM IST
ఉమ్మడి వరంగల్ జిల్లా కాంగ్రెస్ రాజకీయం ఒక్కసారిగా వేడెక్కింది. మంత్రి కొండా సురేఖ, స్టేషన్ ఘన్పూర్ ఎమ్మెల్యే కడియం శ్రీహరి మధ్య నడుస్తున్న కోల్డ్ వార్ ఇప్పుడు బహిరంగ యుద్ధంగా మారింది. ఇద్దరు అగ్ర నేతల మధ్య మొదలైన ఈ ‘ఈగో వార్’ కాంగ్రెస్ పార్టీకి తీవ్ర తలనొప్పిగా పరిణమించింది. తాజాగా మంత్రి కొండా సురేఖ చేసిన ఘాటు వ్యాఖ్యలు జిల్లా రాజకీయాల్లో ప్రకంపనలు సృష్టిస్తున్నాయి. కడియం శ్రీహరితో తాను తాడోపేడో తేల్చుకుంటానని, ఆయన వైఖరిని ఎంతమాత్రం సహించేది లేదని సురేఖ స్పష్టం చేయడంతో ఈ వివాదం ఇప్పట్లో సద్దుమణిగేలా కనిపించడం లేదు.
మంత్రి కొండా సురేఖ వర్సెస్ కడియం శ్రీహరి వివాదం వెనుక ప్రోటోకాల్, నియోజకవర్గాలపై ఆధిపత్య పోరు స్పష్టంగా కనిపిస్తోంది. తన పరిధిని దాటి కడియం శ్రీహరి వ్యవహరిస్తున్నారని కొండా సురేఖ తీవ్ర అసంతృప్తితో ఉన్నారు. ఒక ప్రభుత్వ అధికారిపై ఒత్తిడి తెచ్చి, నియమ నిబంధనలకు విరుద్ధంగా సమీక్షా సమావేశం ఏర్పాటు చేయించడమే ప్రస్తుత వివాదానికి మూల కారణమని తెలుస్తోంది. నాకంటే సీనియర్ అయిన కడియం శ్రీహరికి ఒక ఎమ్మెల్యే పరిధి ఏంటో తెలియదా? అని సురేఖ ప్రశ్నించారు. గతంలో డిప్యూటీ సీఎంగా, మంత్రిగా పనిచేసిన కడియం, ప్రస్తుతం కేవలం ఎమ్మెల్యేగా ఇమడలేకపోతున్నారని, ఆ అసంతృప్తితోనే కావాలని సమస్యలు సృష్టిస్తూ జిల్లా రాజకీయాలను డిస్టర్బ్ చేయాలని చూస్తున్నారని సురేఖ ఆరోపించారు.
ఈ పంచాయితీని మరింత ముందుకు తీసుకెళ్లారు మంత్రి కొండా సురేఖ. కడియం శ్రీహరికి నేరుగా రాజీనామా సవాల్ విసిరారు. “చేతనైతే ఎమ్మెల్యే పదవికి రాజీనామా చేసి, మళ్లీ పోటీ చేసి గెలిచి, మంత్రి పదవి తెచ్చుకో” అంటూ తీవ్రస్థాయిలో ధ్వజమెత్తారు. కడియం శ్రీహరి కాంగ్రెస్లోకి వచ్చినప్పటికీ ఆయన ద్వంద్వ వైఖరి అవలంబిస్తున్నారనే విషయాన్ని సురేఖ హైలైట్ చేశారు. ఒకవైపు కాంగ్రెస్ వ్యవహారాల్లో జోక్యం చేసుకుంటూనే, మరోవైపు తాను ఇంకా ‘బీఆర్ఎస్ ఎమ్మెల్యేనే’ అని చెప్పుకోవడంపై ఆమె మండిపడ్డారు. తన కూతురు కడియం కావ్యను మాత్రం కాంగ్రెస్ తరపున ఎంపీగా పోటీ చేయించి గెలిపించుకున్నారని, కానీ ఆయన మాత్రం పార్టీకి విధేయుడిగా ఉండటం లేదని ఎండగట్టారు.
ఈ ఇద్దరు నేతల మధ్య వివాదం కాంగ్రెస్ అధిష్ఠానానికి, ముఖ్యంగా పీసీసీకి పెద్ద సవాల్గా మారింది. ఇప్పటికే ఈ విషయమై కొండా సురేఖ పార్టీకి లేఖ రాయగా, తాను ఎలాంటి వివరణ ఇచ్చే ప్రసక్తే లేదని కడియం శ్రీహరి భీష్మించుకు కూర్చున్నారు. తాను తప్పు చేయనప్పుడు వివరణ ఎందుకు ఇవ్వాలనేది కడియం వాదనగా ఉంది. అయితే, ఈ సమస్యను పరిష్కరిస్తామని పీసీసీ తనకు హామీ ఇచ్చిందని సురేఖ చెబుతున్నారు. ఒకవేళ అధిష్ఠానం జోక్యం చేసుకోకపోతే, జిల్లాలో కడియం ఆటలు సాగనివ్వనని, తానే స్వయంగా తాడోపేడో తేల్చుకుంటానని సురేఖ హెచ్చరించడం పరిస్థితి తీవ్రతకు అద్దం పడుతోంది.
ఉమ్మడి వరంగల్ జిల్లాలో పట్టు కోసం కొండా, కడియం వర్గాల మధ్య ఎప్పటి నుంచో అంతర్గత పోరు నడుస్తోంది. ఇప్పుడు అది అధికారిక సమీక్షలు, ప్రోటోకాల్ వివాదాల రూపంలో బయటపడింది. కడియం శ్రీహరి లాంటి సీనియర్ నేతను కాంగ్రెస్ పూర్తిగా దూరం చేసుకోలేదు, అలాగని కేబినెట్ మంత్రిగా ఉన్న కొండా సురేఖను అసంతృప్తికి గురిచేయలేదు.
మొదటి నుంచి కడియం శ్రీహరి బుద్ధి ఇంతేనని, ఆయనకు సమస్యలు సృష్టించడం అలవాటని సురేఖ చేసిన వ్యక్తిగత విమర్శలు ఇరు వర్గాల మధ్య దూరాన్ని మరింత పెంచాయి. కడియం శ్రీహరి ఈ వ్యాఖ్యలపై ఎలా స్పందిస్తారనే దాన్ని బట్టి వరంగల్ కాంగ్రెస్ భవిష్యత్తు రాజకీయం ఆధారపడి ఉంటుంది. అధిష్ఠానం వెంటనే రంగంలోకి దిగి ఈ ఇద్దరు సీనియర్ల మధ్య రాజీ కుదర్చకపోతే, రాబోయే రోజుల్లో జిల్లాలో పార్టీ తీవ్ర నష్టపోయే ప్రమాదం ఉందనడంలో ఎలాంటి సందేహం లేదు.
