ఇందిరమ్మ ఇళ్లు.. రేవంత్ సర్కార్ సరికొత్త ప్రయోగం!

తెలంగాణలో పేదల సొంతింటి కలను నిజం చేసే ప్రధాన హామీ ‘ఇందిరమ్మ ఇళ్ల పథకం’ కీలకమైన దశకు చేరుకుంది. గత కాంగ్రెస్ ప్రభుత్వాల హయాంలో అత్యంత ప్రజాదరణ పొందిన ఈ పథకాన్ని ముఖ్యమంత్రి రేవంత్ రెడ్డి ప్రభుత్వం సరికొత్త హంగులతో, ఆధునిక పట్టణ అవసరాలకు అనుగుణంగా పునఃప్రారంభించింది. అందులో భాగంగానే గ్రేటర్ హైదరాబాద్ కోర్ అర్బన్ రీజియన్ (CURE) పరిధిలోని పేదలకు కేటాయించే ఇందిరమ్మ ఫ్లాట్లకు సంబంధించి ఇవాల్టి నుంచి లబ్ధిదారుల ఎంపిక ప్రక్రియ లక్కీ డ్రా రూపంలో ప్రారంభమైంది.

హైదరాబాద్ కోర్ అర్బన్ రీజియన్ పరిధిలోని 16 అసెంబ్లీ నియోజకవర్గాల్లో నిర్మించిన 7,340 అఫర్డబుల్ ఫ్లాట్లకు శుక్రవారం నుంచి సోమవారం వరకు లక్కీ డ్రా నిర్వహించనున్నారు. రోజుకు 4 నియోజకవర్గాల చొప్పున ఈ డ్రా కొనసాగుతుంది. స్థల పరిమితి, భద్రతా కారణాల దృష్ట్యా దరఖాస్తుదారులందరినీ డ్రా వేదికల వద్దకు అనుమతించడం లేదని, అయితే కేంద్రాల సమీపంలో స్క్రీన్ల ద్వారా ప్రత్యక్ష ప్రసారం ఏర్పాటు చేశామని హౌసింగ్ బోర్డు వైస్ చైర్మన్ వి.పి. గౌతమ్ తెలిపారు. ఈ లక్కీ డ్రా ప్రక్రియను హౌసింగ్ బోర్డు అధికారిక వెబ్‌సైట్ tghb.telangana.gov.in, ఫేస్‌బుక్, ఇన్‌స్టాగ్రామ్ (tghd.official) హ్యాండిల్స్‌లో కూడా ప్రత్యక్ష ప్రసారం చేస్తున్నారు.

పైలట్ ప్రాజెక్ట్ కింద ఒక్కో నియోజకవర్గానికి 480 ఫ్లాట్ల చొప్పున నిర్మించగా, 16 నియోజకవర్గాల్లో మొత్తం 7,340 ఫ్లాట్లు సిద్ధమయ్యాయి. అంతేకాకుండా మరో నాలుగు నియోజకవర్గాల్లోని 1,920 ఫ్లాట్ల కోసం దరఖాస్తు చేసుకునేందుకు సెప్టెంబర్ 3, 2026 వరకు గడువు పొడిగించారు. మొత్తంగా హైదరాబాద్ రీజియన్‌లో ఏకంగా లక్ష ఇందిరమ్మ ఇళ్లను నిర్మించడమే లక్ష్యంగా ప్రభుత్వం కార్యాచరణ రూపొందించింది.

గతంలో ఉమ్మడి ఆంధ్రప్రదేశ్ ముఖ్యమంత్రిగా వై.ఎస్. రాజశేఖరరెడ్డి ఉన్నప్పుడు ‘ఇందిరమ్మ పథకం’ రాష్ట్రవ్యాప్తంగా సామాజిక విప్లవాన్ని సృష్టించింది. పేదలకు నివాస హక్కు కల్పించడంలో ఈ పథకం కాంగ్రెస్ పార్టీకి తిరుగులేని ఓటు బ్యాంకును తెచ్చిపెట్టింది. తెలంగాణ ఆవిర్భావం తర్వాత కేసీఆర్ నేతృత్వంలోని బీఆర్‌ఎస్ ప్రభుత్వం ‘డబుల్ బెడ్‌రూమ్’ పథకాన్ని తెచ్చినప్పటికీ, గ్రౌండింగ్ ఆలస్యం, లబ్ధిదారుల ఎంపికలో వివక్ష, పట్టణాల్లో నిర్మాణాలు పూర్తికాకపోవడం వంటి ఆరోపణలు తీవ్రంగా వచ్చాయి. గత అసెంబ్లీ ఎన్నికల్లో కాంగ్రెస్ ‘ఆరు గ్యారెంటీలలో’ ఇందిరమ్మ ఇళ్లను ప్రధానంగా చేర్చి, ప్రతి నియోజకవర్గంలో పేదలకు పక్కా ఇళ్ల నిర్మాణానికి ఆర్థిక సాయం, పట్టణాల్లో హౌసింగ్ టవర్ల నిర్మాణాన్ని వాగ్దానం చేసింది.

గత అసెంబ్లీ ఎన్నికల్లో కాంగ్రెస్ పార్టీ రాష్ట్రమంతటా భారీ మెజారిటీ సాధించినప్పటికీ, గ్రేటర్ హైదరాబాద్ పరిధిలోని మెజారిటీ స్థానాల్లో బీఆర్‌ఎస్, ఎంఐఎంల హవా నడిచింది. నగర ఓటర్లలో పట్టు సాధించడం రేవంత్ సర్కార్‌కు ఇప్పుడు అత్యంత ప్రతిష్టాత్మకం. జీహెచ్‌ఎంసీ పరిధిలో వేలాది మంది పేద, మధ్యతరగతి ప్రజలకు సొంతింటి సమస్య ప్రధాన ఎజెండాగా ఉంది. ఈ నేపథ్యంలో లక్ష ఇందిరమ్మ ఫ్లాట్ల లక్ష్యాన్ని ప్రకటించి, మొదటి విడతలోనే 7,340 ఇళ్లకు అత్యంత పారదర్శకంగా లైవ్ స్ట్రీమింగ్ ద్వారా లక్కీ డ్రా తీయడం ద్వారా ప్రజల్లో విశ్వాసాన్ని పెంచేందుకు రేవంత్ ప్రభుత్వం వ్యూహాత్మకంగా అడుగులు వేసింది. డ్రాలో ఎంపికకాని వారు నిరాశ చెందవద్దని, తర్వాతి విడతల్లో దరఖాస్తు చేసుకోవచ్చని స్పష్టం చేయడం ద్వారా నగర పేదలలో ఆశావహ దృక్పథాన్ని నింపే ప్రయత్నం చేస్తోంది.

రాబోయే స్థానిక సంస్థల ఎన్నికలు, గ్రేటర్ హైదరాబాద్ మున్సిపల్ ఎన్నికల ముంగిట అర్బన్ పేదలను తమ వైపు తిప్పుకోవడానికి ఈ ‘ఇందిరమ్మ హౌసింగ్ టవర్స్’ ఒక గేమ్‌చేంజర్‌గా మారే అవకాశముంది. ఇచ్చిన హామీని నిర్దేశిత గడువుల్లోగా పూర్తి చేసి పేదలకు అందించడమే కాంగ్రెస్ పార్టీకి రాజకీయంగా అతిపెద్ద మైలేజీగా మారనుంది.