పట్టణ, మండలి పోరుకు బీజేపీ ‘డబుల్ ఇంజిన్’ వ్యూహం!
తెలంగాణ రాజకీయాల్లో మరో కీలక ఘట్టానికి తెరలేవనుంది. 2027 మార్చిలో జరగనున్న శాసనమండలి ఎన్నికలు, మరోవైపు త్వరలోనే రానున్న కీలక నగరపాలక సంస్థల ఎన్నికల నేపథ్యంలో బీజేపీ తన వ్యూహాలకు పదును పెట్టింది. గురువారం పార్టీ రాష్ట్ర కార్యాలయంలో జరిగిన వరుస సమావేశాలు, ఆ పార్టీ అగ్రనాయకత్వం క్షేత్రస్థాయి నుంచి పార్టీని సమాయత్తం చేస్తున్న తీరుకు అద్దం పడుతున్నాయి.
రాష్ట్రంలో త్వరలో జరగనున్న ఎన్నికలు, పార్టీ బలోపేతంపై బీజేపీ రాష్ట్ర శాఖ కసరత్తు ముమ్మరం చేసింది. రాష్ట్ర అధ్యక్షుడు ఎన్. రామచందర్ రావు అధ్యక్షతన జరిగిన భేటీలో మున్సిపల్ ఎన్నికల ఇన్ఛార్జ్ ఆశిష్ షెలార్, కేంద్ర మంత్రి కిషన్ రెడ్డి, ఎమ్మెల్సీలు ఏవీఎన్ రెడ్డి, మల్క కొమరయ్య, రాష్ట్ర ప్రధాన కార్యదర్శి గౌతమ్ రావు సహా పలువురు ముఖ్య నేతలు పాల్గొన్నారు. కొన్ని రోజులుగా షెలార్, రామచందర్ రావు నిర్వహిస్తున్న వరుస సమీక్షలకు కొనసాగింపుగా ఈ సమావేశం జరిగింది. కేవలం ఎన్నికల ప్రణాళికలకే పరిమితం కాకుండా, బూత్ స్థాయి కమిటీల బలోపేతం, జిల్లా నాయకత్వం, అనుబంధ మోర్చాల మధ్య సమన్వయాన్ని పెంపొందించడంపై నాయకత్వం ప్రధానంగా దృష్టి సారించింది.
ఇవి కూడా చదవండి
తెలంగాణలో బీజేపీకి సంప్రదాయంగా పట్టున్న పట్టణ ప్రాంతాల్లో తన ఆధిపత్యాన్ని మరింత సుస్థిరం చేసుకోవాలని కమలదళం భావిస్తోంది. ఇందులో భాగంగా హైదరాబాద్, సైబరాబాద్, మల్కాజిగిరి, వరంగల్, ఖమ్మం మున్సిపల్ కార్పొరేషన్ల ఎన్నికలపై పార్టీ ప్రత్యేక దృష్టి పెట్టింది. వార్డు స్థాయి నుంచే పార్టీ యంత్రాంగాన్ని పరుగులు పెట్టిస్తూ, స్థానిక మౌలిక సదుపాయాల లేమి, పట్టణాభివృద్ధి అంశాలను ప్రచారాస్త్రాలుగా మలుచుకోవాలని నిర్ణయించింది. దీనికి తోడు, కేంద్రంలోని నరేంద్ర మోదీ ప్రభుత్వం అమలు చేస్తున్న సంక్షేమ పథకాలను గడపగడపకూ తీసుకెళ్లడం ద్వారా పట్టణ ఓటర్లను ఆకట్టుకోవాలన్నది బీజేపీ ప్రధాన ఎత్తుగడగా కనిపిస్తోంది.
వచ్చే ఏడాది మార్చిలో జరగనున్న మహబూబ్నగర్- రంగారెడ్డి- హైదరాబాద్, వరంగల్- ఖమ్మం- నల్గొండ పట్టభద్రుల ఎమ్మెల్సీ స్థానాలను కైవసం చేసుకునేందుకు బీజేపీ ఇప్పటి నుంచే పావులు కదుపుతోంది. ఇందుకోసం ప్రత్యేకంగా ‘శాసనమండలి ఎన్నికల పర్యవేక్షణ కమిటీ’ సమావేశమై ఎన్నికల సన్నద్ధతను సమీక్షించింది. విద్యావంతులు, ఉద్యోగులు, నిరుద్యోగుల ఓట్లు కీలకమైన ఈ స్థానాల్లో గెలుపు కోసం సీనియర్ నేతలు, కమిటీ సభ్యుల మధ్య సమన్వయం పెంచుతూ పక్కా ప్రచార వ్యూహాలను రచిస్తోంది.
రాష్ట్రంలో అధికార కాంగ్రెస్, ప్రధాన ప్రతిపక్షం బీఆర్ఎస్ మధ్య నెలకొన్న రాజకీయ పోటీని తనకు అనుకూలంగా మార్చుకోవాలని బీజేపీ చూస్తోంది. ముఖ్యంగా హైదరాబాద్, సైబరాబాద్, మల్కాజిగిరి వంటి అత్యంత కీలకమైన అర్బన్ బెల్ట్లలో పట్టు సాధించడం ద్వారా రాబోయే అసెంబ్లీ ఎన్నికలకు బలమైన పునాది వేసుకోవాలన్నది ఆ పార్టీ దీర్ఘకాలిక లక్ష్యం. అయితే, బూత్ స్థాయిలో కార్యకర్తల సమీకరణ, గ్రూపు రాజకీయాలకు తావులేకుండా ఐక్యంగా ముందుకు సాగడం, క్షేత్రస్థాయి సమస్యలపై అధికార పార్టీని సమర్థవంతంగా నిలదీయడం వంటి అంశాలపైనే బీజేపీ విజయావకాశాలు ఆధారపడి ఉంటాయి. మొత్తంమీద, ఎన్నికలకు ఇంకా సమయం ఉండగానే అగ్రనాయకత్వం రంగంలోకి దిగి శ్రేణులను సన్నద్ధం చేయడం తెలంగాణ రాజకీయాల్లో వేడిని పెంచుతోంది.







