రాహుల్ పై బీఆర్‌ఎస్ సెటైరికల్ ర్యాప్ సాంగ్!
- Published By: Vasishta
- November 13, 2026 / 05:00 PM IST
హైదరాబాద్ వేదికగా అంతర్జాతీయ స్థాయిలో నిర్వహిస్తున్న ‘భారత్ సమ్మిట్ 2.0’ తెలంగాణ రాజకీయాల్లో వేడి పుట్టిస్తోంది. సుమారు 70 దేశాల నుంచి వెయ్యి మందికి పైగా ప్రతినిధులు హాజరవుతున్న ఈ ప్రతిష్ఠాత్మక సదస్సులో పాల్గొనేందుకు కాంగ్రెస్ అగ్రనేత రాహుల్ గాంధీ నగరానికి విచ్చేస్తున్నారు. ఈ నేపథ్యంలో బీఆర్‌ఎస్ వినూత్న రీతిలో నిరసన గళం వినిపిస్తోంది. ఒక పాట రూపంలో రాహుల్ గాంధీపై వ్యంగ్యాస్త్రాలు సంధించింది.
బీఆర్‌ఎస్ సోషల్ మీడియా వేదికగా ఒక ప్రత్యేక పంజాబీ శైలి ర్యాప్ గీతాన్ని విడుదల చేసింది. రాహుల్ గాంధీకి స్వాగతం పలుకుతున్నట్లుగా సాగే ఈ వ్యంగ్య గీతం, 2023 అసెంబ్లీ ఎన్నికల సమయంలో కాంగ్రెస్ ఇచ్చిన హామీల అమలుపై సూటిగా ప్రశ్నలు సంధిస్తోంది. అధికారంలోకి వచ్చిన వంద రోజుల్లోనే ఆరు గ్యారంటీలు అమలు చేస్తామని బాండ్ పేపర్లపై రాసిచ్చిన హామీలు మూడేళ్లు గడుస్తున్నా ఎందుకు పూర్తిస్థాయిలో పట్టాలెక్కలేదని ఈ పాట ద్వారా నిలదీసింది. ముఖ్యంగా మహిళలకు నెలకు రూ.2,500 ఆర్థిక సాయం, వృద్ధులు, వితంతువులకు రూ.4,000 పింఛన్ వంటి కీలక హామీల జాప్యాన్ని ఎత్తిచూపుతూ, ‘‘సమాధానాలతో రండి.. కేవలం ప్రసంగాల కోసం కాదు’’ అంటూ బీఆర్‌ఎస్ సవాల్ విసిరింది.
బీఆర్‌ఎస్ వర్కింగ్ ప్రెసిడెంట్ కేటీఆర్ ‘ఎక్స్’ వేదికగా రాహుల్ గాంధీపై తీవ్ర స్థాయిలో విమర్శలు గుప్పించారు. రాష్ట్రంలో ప్రజా సమస్యలు తీవ్రరూపం దాల్చినప్పుడు మౌనంగా ఉన్న రాహుల్, ఇప్పుడు ప్రజాధనంతో నిర్వహిస్తున్న ప్రచార ఆర్భాటం కోసం ఏ నైతిక హక్కుతో వస్తున్నారని ఆయన ప్రశ్నించారు. ఉద్యోగ నోటిఫికేషన్ల కోసం నిరసన తెలిపిన నిరుద్యోగ యువతపై పోలీసుల లాఠీఛార్జ్, లగచర్ల ఘటనలో భూముల కోసం పోరాడిన గిరిజన మహిళలపై జరిగిన దాడుల సమయంలో రాహుల్ ఎందుకు స్పందించలేదని కేటీఆర్ నిలదీశారు. అసెంబ్లీ ఆవరణలో మహిళా ఎమ్మెల్యేల పట్ల అనుచితంగా ప్రవర్తించిన ఘటనపైనా ఆయన మౌనాన్ని ప్రశ్నించారు. హైడ్రా కూల్చివేతల పేరుతో పేద, మధ్యతరగతి ప్రజల నివాసాలను నేలమట్టం చేసినప్పుడు ఢిల్లీలో నిద్రపోయారా అని ఎద్దేవా చేశారు. అలాగే కంచ గచ్చిబౌలిలోని హెచ్‌సీయూ భూముల్లో వేలాది చెట్ల నరికివేత, వన్యప్రాణుల మనుగడకు ముప్పు వాటిల్లడం, కేబీఆర్ పార్కు వద్ద చేపట్టిన పనుల వల్ల పర్యావరణానికి కలిగిన నష్టాన్ని ప్రస్తావిస్తూ రాహుల్ పర్యావరణ ప్రేమ ఎక్కడకు పోయిందని చురకలంటించారు.
ఒకవైపు రాజ్యాంగ పరిరక్షణ గురించి మాట్లాడే రాహుల్ గాంధీ, మరోవైపు బీఆర్‌ఎస్‌కు చెందిన పది మంది ఎమ్మెల్యేలను కాంగ్రెస్‌లో చేర్చుకోవడాన్ని ఎలా సమర్థించుకుంటారని కేటీఆర్ ప్రశ్నించారు. రైతులు, నేతన్నల ఆత్మహత్యలు, జర్నలిస్టుల అర్ధరాత్రి అరెస్టులు, భూకబ్జాలతో పాటు సొంత పార్టీ మంత్రులు, ఎమ్మెల్యేలే బహిరంగంగా చేస్తున్న అవినీతి ఆరోపణలపై రాహుల్ సమాధానం చెప్పాలని డిమాండ్ చేశారు. ‘భారత్ సమ్మిట్’ నిర్వహణకు సుమారు రూ.100 కోట్ల తెలంగాణ ప్రజల సొమ్మును ఖర్చు చేస్తున్నారని, ఇది కేవలం రాహుల్ గాంధీ ఇమేజ్ బిల్డింగ్ కోసం చేస్తున్న ప్రచార స్టంట్ అని బీఆర్‌ఎస్ ఆరోపిస్తోంది.
మొత్తానికి, అంతర్జాతీయ వేదికగా తెలంగాణ బ్రాండ్ ఇమేజ్‌ను పెంచుకోవాలని కాంగ్రెస్ ప్రభుత్వం భావిస్తుంటే, అదే వేదికను అస్త్రంగా చేసుకుని ప్రభుత్వ వైఫల్యాలను దేశవ్యాప్తంగా ఎండగట్టాలని బీఆర్‌ఎస్ వ్యూహరచన చేసింది. రాహుల్ గాంధీ పర్యటన వేళ అధికార, విపక్షాల మధ్య మొదలైన ఈ రాజకీయ సమరం రానున్న రోజుల్లో మరింత తీవ్రరూపం దాల్చే అవకాశాలు స్పష్టంగా కనిపిస్తున్నాయి.
