టీడీపీ ఎమ్మెల్యేపై వైసీపీ నేతల దాడియత్నం..!
- Published By: G Vencatesh
- November 5, 2026 / 03:30 PM IST
ఆంధ్రప్రదేశ్ స్థానిక సంస్థల ఎన్నికల పోలింగ్ వేళ అనంతపురం జిల్లాలో తీవ్ర రాజకీయం వేడెక్కింది. కుందుర్పి మండలం బెస్తరపల్లిలో తెలుగుదేశం పార్టీ(tdp) ఎమ్మెల్యే అమిలినేని సురేంద్రబాబుపై వైఎస్సార్సీపీ(YSRCP) నాయకులు దాడికి యత్నించడం స్థానికంగా పెద్ద కలకలం రేపింది. ఈ క్రమంలో ఎమ్మెల్యేను కాపాడబోయిన ఆయన గన్‌మెన్‌పై కూడా వైఎస్సార్సీపీ శ్రేణులు దాడికి తెగబడ్డారు. బెస్తరపల్లి గ్రామంలో జరుగుతున్న జడ్పీటీసీ, ఎంపీటీసీ ఎన్నికల ఓటింగ్‌ సరళిని పరిశీలించడానికి కళ్యాణదుర్గం ఎమ్మెల్యే అమిలినేని సురేంద్రబాబు స్థానిక పోలింగ్ కేంద్రం వద్దకు వెళ్లారు.
అయితే, ఎమ్మెల్యే పోలింగ్ బూత్ వద్దకు వస్తున్నారనే సమాచారం తెలుసుకున్న వైఎస్సార్సీపీ నేతలు, కార్యకర్తలు ఒక్కసారిగా భారీ సంఖ్యలో అక్కడికి చేరుకున్నారు. ఎమ్మెల్యే వాహనాన్ని ముట్టడించి, ఆయనపై దాడి చేసేందుకు దూసుకెళ్లారు. వైసీపీ శ్రేణులు ఒక్కసారిగా ఎమ్మెల్యేపైకి దూసుకురావడంతో అప్రమత్తమైన ఆయన గన్‌మెన్ వెంటనే అడ్డుగా నిలబడి ఎమ్మెల్యే సురేంద్రబాబును సురక్షితంగా పక్కకు తీసుకెళ్లే ప్రయత్నం చేశారు. ఈ క్రమంలో ఆగ్రహానికి గురైన వైసీపీ నేతలు గన్‌మెన్‌ను చుట్టుముట్టి ఆయనపై భౌతిక దాడికి పాల్పడ్డారు.
ఈ పెనుగులాటలో అక్కడ తీవ్ర ఉద్రిక్త వాతావరణం నెలకొంది. స్థానిక టీడీపీ శ్రేణులు కూడా అక్కడికి చేరుకోవడంతో ఇరువర్గాల మధ్య తోపులాట జరిగింది. పోలింగ్ కేంద్రం వద్ద పరిస్థితి చేయి దాటుతుండటంతో పోలీసులు వెంటనే రంగప్రవేశం చేశారు. లాఠీఛార్జ్ చేసి ఇరువర్గాలను చెల్లాచెదురు చేశారు. ఎమ్మెల్యే అమిలినేని సురేంద్రబాబును సురక్షితంగా అక్కడి నుండి తరలించారు. ఎన్నికల వేళ శాంతిభద్రతలకు విఘాతం కలిగించి, ప్రజాప్రతినిధితో పాటు విధుల్లో ఉన్న ప్రభుత్వ రక్షకభటుడిపై దాడికి పాల్పడిన వారిపై కఠిన చర్యలు తీసుకోవాలని టీడీపీ శ్రేణులు డిమాండ్ చేస్తున్నాయి. ప్రస్తుతం బెస్తరపల్లిలో ఎలాంటి అవాంఛనీయ సంఘటనలు జరగకుండా అదనపు బలగాలను మోహరించారు.
