బెజవాడ మేయర్ పీఠంపై బీసీ కార్డు ప్రయోగం..!

రాబోయే మున్సిపల్ ఎన్నికల నేపథ్యంలో విజయవాడ కార్పొరేషన్ (VMC) మేయర్ పీఠాన్ని దక్కించుకునేందుకు కూటమిలో రాజకీయం రసవత్తరంగా మారింది. ఈ ప్రతిష్టాత్మక స్థానం కోసం కూటమిలోని రెండు ప్రధాన సామాజిక వర్గాల మధ్య తీవ్రస్థాయిలో పోటీ నెలకొంది. మేయర్ సీటును తమకే కేటాయించాలంటూ అటు కమ్మ, ఇటు కాపు సామాజిక వర్గాలకు చెందిన కీలక నేతలు పట్టుబడుతుండటంతో అంతర్గతంగా పెద్ద ఫైట్ నడుస్తోంది. రెండు వర్గాల నుంచి బలమైన ఆశావహులు రేసులో ఉండటం, ఎవరికి ఇచ్చినా మరొకరు అసంతృప్తికి గురయ్యే ప్రమాదం ఉండటంతో అధిష్టానానికి ఇది పెద్ద తలనొప్పిగా మారింది.

ఈ నేపథ్యంలో కమ్మ, కాపు సామాజిక వర్గాల మధ్య నడుస్తున్న ఈ పోటీకి బ్రేక్ వేస్తూ, తెలుగుదేశం పార్టీ (TDP) అధిష్టానం సరికొత్త పొలిటికల్ వ్యూహాన్ని తెరపైకి తెస్తున్నట్లు పొలిటికల్ సర్కిల్స్‌లో గట్టిగా టాక్ వినిపిస్తోంది. ఇరు వర్గాల ఘర్షణకు తావులేకుండా, పార్టీకి ఎప్పుడూ అండగా ఉండే వెనుకబడిన తరగతుల కార్డును మళ్లీ ప్రయోగించే ఆలోచనలో చంద్రబాబు నాయుడు ఉన్నట్లు తెలుస్తోంది. గతంలో కూడా విజయవాడ మేయర్ పీఠాన్ని బీసీలకు అప్పగించి సక్సెస్ అయిన చారిత్రక నేపథ్యం తెలుగుదేశం పార్టీకి ఉంది.

ఈసారి కూడా బీసీ రిజర్వేషన్ల సమీకరణాలను బ్యాలెన్స్ చేస్తూ, కమ్మ-కాపు వివాదానికి చెక్ పెట్టేందుకు బీసీ సామాజిక వర్గానికి చెందిన సమర్థుడైన అభ్యర్థికి మేయర్ సీటు ఖరారు చేస్తే ఎలా ఉంటుందనే కోణంలో టీడీపీ అగ్రనాయకత్వం కసరత్తు చేస్తోంది. దీనివల్ల ఇటు పార్టీలో అంతర్గత విభేదాలు సమసిపోవడమే కాకుండా, నగరంలో అత్యధిక ఓటు బ్యాంక్ కలిగిన బీసీలకు పెద్దపీట వేసినట్లు అవుతుందని భావిస్తున్నారు. ఈ సరికొత్త సామాజిక సమీకరణం బెజవాడ రాజకీయాన్ని ఏ మలుపు తిప్పుతుందో చూడాలి.