ఏపీ మెడికల్ కాలేజీల్లో సరికొత్త రూల్స్..!
- Published By: G Vencatesh
- November 9, 2026 / 05:45 PM IST
ఆంధ్రప్రదేశ్‌లోని ప్రభుత్వ మెడికల్ కాలేజీలు, వాటి పరిధిలోని అనుబంధ ఆసుపత్రులలో ఇన్ఫెక్షన్ల నియంత్రణకు రాష్ట్ర ప్రభుత్వం గట్టి చర్యలు ప్రారంభించింది. ఆపరేషన్ థియేటర్లు (OT), తీవ్ర నిఘా విభాగాలు (ICU) వంటి అత్యంత సున్నితమైన ప్రాంతాలలో రోగులకు ఇన్ఫెక్షన్లు సోకకుండా అడ్డుకట్ట వేసేందుకు ఆంధ్రప్రదేశ్ డైరెక్టరేట్ ఆఫ్ మెడికల్ ఎడ్యుకేషన్ (DME) తాజాగా ఒక కీలకమైన నివేదిక, మార్గదర్శకాలను విడుదల చేసింది. ఆసుపత్రులలో పరిశుభ్రత ప్రమాణాలను పెంచడం ద్వారా రోగుల ప్రాణాలకు మరింత రక్షణ కల్పించడమే ఈ నూతన నిబంధనల ముఖ్య ఉద్దేశం.
ఈ తాజా ఉత్తర్వుల ప్రకారం.. ఆపరేషన్ థియేటర్లు, ఐసీయూ విభాగాలలో పనిచేసే వైద్యులు, నర్సులు, ఇతర పారామెడికల్ సిబ్బంది అంతా తప్పనిసరిగా ప్రభుత్వం కేటాయించిన ప్రత్యేక దుస్తులను ధరించాల్సి ఉంటుంది. ఈ ప్రత్యేక దుస్తులను సిబ్బంది ఎవరి ఇళ్లకు వారు పట్టుకెళ్లడానికి వీల్లేదు. వీటిని కేవలం ఆయా ఆసుపత్రులకు చెందిన ల్యాండ్రీ విభాగంలోనే ప్రత్యేకంగా శుభ్రం చేయాలని, తద్వారా బయటి వాతావరణం నుండి వచ్చే బ్యాక్టీరియా హాస్పిటల్ లోపలికి ప్రవేశించకుండా అడ్డుకోవచ్చని డీఎంఈ స్పష్టం చేసింది.
సిబ్బంది సౌకర్యార్థం ఆసుపత్రులలో ఈ ప్రత్యేక దుస్తులను మార్చుకోవడానికి వీలుగా ప్రత్యేక గదులను ఏర్పాటు చేయాలని ల్యాబ్, మేనేజ్‌మెంట్ అధికారులను ఆదేశించారు. డ్యూటీకి వచ్చే సిబ్బంది తమ సొంత దుస్తులను ఆ గదుల్లో మార్చుకుని, ల్యాండ్రీ చేసిన హాస్పిటల్ దుస్తులను వేసుకుని మాత్రమే ఓటీ, ఐసీయూలలోకి అడుగుపెట్టాలి. హాస్పిటల్ ఇన్ఫెక్షన్ కంట్రోల్ కమిటీలు ఈ ప్రక్రియను ప్రతిరోజూ పర్యవేక్షిస్తాయి. ఒకవేళ ఎవరైనా ఈ వైద్య ఆరోగ్య నిబంధనలను ఉల్లంఘిస్తే, వారిపై శాఖాపరమైన కఠిన క్రమశిక్షణ చర్యలు ఉంటాయని డైరెక్టరేట్ ఆఫ్ మెడికల్ ఎడ్యుకేషన్ తీవ్ర హెచ్చరికలు జారీ చేసింది.
