ఢిల్లీ పర్యటనలో సీఎం చంద్రబాబు బిజీ బిజీ..!

ఆంధ్రప్రదేశ్ ముఖ్యమంత్రి చంద్రబాబు నాయుడు(Chandrababu Naidu) నేడు సాయంత్రం దేశ రాజధాని ఢిల్లీకి పయనం కానున్నారు. రాష్ట్ర పునర్నిర్మాణం, కేంద్ర నిధుల రాక, మరియు విభజన హామీల అమలుపై కేంద్ర ప్రభుత్వంతో అత్యంత కీలకమైన చర్చలు జరిపేందుకు ఈ పర్యటన ఖరారైంది. రెండు రోజుల పాటు సాగనున్న ఈ హస్తిన పర్యటనలో భాగంగా సీఎం చంద్రబాబు.. ప్రధాని నరేంద్ర మోదీతో పాటు పలువురు కేంద్ర క్యాబినెట్ మంత్రులతో వరుసగా భేటీ కానుండటం ఏపీ రాజకీయ వర్గాల్లో తీవ్ర ఆసక్తిని రేకెత్తిస్తోంది.

ఢిల్లీ చేరుకున్న వెంటనే నేడు సాయంత్రమే కేంద్ర ఆర్థిక శాఖ మంత్రి నిర్మలా సీతారామన్, అలాగే కేంద్ర రోడ్డు రవాణా, రహదారుల శాఖ మంత్రి నితిన్ గడ్కరీలతో ముఖ్యమంత్రి చంద్రబాబు విడివిడిగా సమావేశం కానున్నారు. అమరావతి రాజధాని నిర్మాణానికి ప్రపంచ బ్యాంకు నిధుల విడుదల, పోలవరం ప్రాజెక్టు సవరించిన అంచనాలకు ఆమోదం, అలాగే రాష్ట్రంలో కొత్త జాతీయ రహదారుల మంజూరు, పెండింగ్ నిధుల విడుదలపై ఈ భేటీలలో ప్రధానంగా చర్చించనున్నారు.

ఇక పర్యటనలో రెండో రోజైన రేపు ప్రధానమంత్రి నరేంద్ర మోదీ, కేంద్ర హోంమంత్రి అమిత్ షాలతో ముఖ్యమంత్రి చంద్రబాబు అత్యంత కీలకమైన సమావేశాల్లో పాల్గొననున్నారు. వీటితో పాటు కేంద్ర జలశక్తి శాఖ మంత్రి సీఆర్ పాటిల్, కేంద్ర ఓడరేవులు, రవాణా శాఖ మంత్రి శర్బానంద సోనోవాల్‌లతోనూ ఆయన భేటీ కానున్నారు. అలాగే, ప్రతిష్టాత్మక సీఐఐ (CII) భాగస్వామ్య సదస్సుకు కూడా సీఎం హాజరై, ఏపీకి పెట్టుబడులను ఆకర్షించేందుకు పారిశ్రామికవేత్తలతో చర్చలు జరపనున్నారు. మొత్తానికి రాష్ట్ర ఆర్థికాభివృద్ధిని పరుగులు పెట్టించడమే లక్ష్యంగా చంద్రబాబు ఈ పర్యటనను ఉపయోగించుకోనున్నారు.