కాకినాడ కార్పొరేషన్‌పై జనసేన కన్ను.. వైసీపీకి కోలుకోలేని దెబ్బ..!
- Published By: Tech Team
- October 12, 2026 / 06:13 PM IST
ఆంధ్రప్రదేశ్‌లో స్థానిక సంస్థల ఎన్నికల వేడి పతాక స్థాయికి చేరిన వేళ, ఉమ్మడి తూర్పుగోదావరి జిల్లా రాజకీయాల్లో ఊహించని పరిణామాలు చోటుచేసుకుంటున్నాయి. మున్సిపల్ ఎన్నికల్లో కీలకమైన మేయర్ స్థానాలను ఎలాగైనా కైవసం చేసుకోవాలనే వ్యూహంతో జనసేన పార్టీ అడుగులు వేగవంతం చేసింది. ఇందులో భాగంగానే పెద్దాపురం నియోజకవర్గానికి చెందిన పలువురు కీలక వైఎస్సార్ కాంగ్రెస్ పార్టీ (YCP) నాయకులు ఈరోజు జనసేన పార్టీలో చేరారు. మంగళగిరిలోని పార్టీ కేంద్ర కార్యాలయంలో ఉప ముఖ్యమంత్రి, జనసేన అధినేత పవన్ కళ్యాణ్(Pawan Kalyan) వారికి పార్టీ కండువాలు కప్పి సాదరంగా ఆహ్వానించారు.
కూటమి సీట్ల సర్దుబాటులో జనసేన పార్టీ దక్కించుకోబోయే మున్సిపల్ కార్పొరేషన్లు, ముఖ్యంగా కాకినాడ వంటి కీలక మేయర్ స్థానాల్లో క్షేత్రస్థాయి బలాన్ని పెంచుకోవడంపై పవన్ కళ్యాణ్ ప్రత్యేక శ్రద్ధ పెట్టారు. వైపక్ష వైఎస్సార్సీపీని రాజకీయంగా దెబ్బకొట్టడమే కాకుండా, ఆ పార్టీలోని బలమైన సామాజిక వర్గాల నేతలను, ఆర్థికంగా అండదండలు ఉన్న నాయకులను తమవైపు తిప్పుకోవడంలో జనసేన సఫలీకృతమవుతోంది. క్షేత్రస్థాయిలో పట్టున్న వైసీపీ నేతలను వరుసగా పార్టీలోకి చేర్చుకోవడం ద్వారా ప్రతిపక్షాన్ని కోలుకోలేని దెబ్బ తీసేలా జనసేన వ్యూహాత్మకంగా ముందుకు వెళ్తోంది.
పెద్దాపురం, కాకినాడ పరిసర ప్రాంతాల్లో వైఎస్సార్సీపీకి పట్టున్న డివిజన్లు మరియు గ్రామాల్లోని ద్వితీయ శ్రేణి నాయకత్వం ఇప్పుడు జనసేన వైపు మొగ్గు చూపుతోంది. జనసేన పోటీ చేయాలనుకుంటున్న కార్పొరేషన్ పరిధిలోని వార్డుల్లో గెలుపు గుర్రాలను ముందుగానే సిద్ధం చేసుకోవడానికి ఈ వలసలు బాగా ఉపయోగపడనున్నాయి. క్షేత్రస్థాయిలో తమ పార్టీ బలాన్ని భారీగా పెంచుకోవడం ద్వారా, కూటమి సీట్ల సర్దుబాటు చర్చల్లో ఎక్కువ వార్డులు మరియు మేయర్ స్థానాలను దక్కించుకోవచ్చనేది జనసేన అంతర్గత వ్యూహంగా కనిపిస్తోంది.
అటు వైఎస్ జగన్ మోహన్ రెడ్డి రీజనల్ కోఆర్డినేటర్లతో భేటీ అయి మేయర్ అభ్యర్థులను ఖరారు చేసే పనిలో పడగా.. ఇటు పవన్ కళ్యాణ్ ఆ పార్టీలోని కీలక నేతలను జనసేనలోకి లాగుతూ క్షేత్రస్థాయిలో వైఎస్సార్సీపీకి గట్టి సవాల్ విసురుతున్నారు. రాబోయే రోజుల్లో గోదావరి జిల్లాల నుంచి మరికొంత మంది ప్రతిపక్ష నేతలు జనసేన బాట పట్టే అవకాశం ఉందని రాజకీయ వర్గాల్లో చర్చ నడుస్తోంది.
