మెలోనీ జుమ్కా.. అదిరిపోలా..!
- Published By: Srinivas Mohan
- April 25, 2026 / 07:20 PM IST
చక్కనమ్మ ఏం చేసినా అందమే… అది మరోసారి రుజువు చేశారు ఇటలీ ప్రధాని జార్జియా మెలోనీ.. ఎప్పుడు ట్రెండింగ్ లో ఉండే.. ఈ బామ.. ఇప్పుడు ఓవెండి జుమ్కాతో… సోషల్ మీడియాను షేక్ చేస్తున్నారు. ముఖ్యంగా.. వెండి జుమ్కాలు (చాంద్బాలీ తరహా) ధరించి ఆమె తీసుకున్న ఈ ఫొటో ఇంటర్నెట్లో తెగ వైరల్ అవుతోంది. ఈ ఫొటో చూసిన భారతీయ నెటిజన్లు ఆనందంతో స్పందిస్తూ, బాలీవుడ్ సినిమా ‘రాకీ ఔర్ రాణీ కీ ప్రేమ్ కహానీ’లోని ‘వాట్ జుమ్కా’ పాటను గుర్తుచేసుకుంటూ మీమ్స్, కామెంట్లతో హోరెత్తించారు.
ఆసక్తికరంగా ఈ ఫొటోకు మెలోనీ ఇటాలియన్ భాషలో ఒక రాజకీయపరమైన క్యాప్షన్ ఇచ్చారు. “ఇతరుల్లా మాకు తీగలు లేవు, యజమానులు లేరు, మేము ఆదేశాలు తీసుకోము. మా ఏకైక దిక్సూచి ఇటలీ ప్రయోజనాలే. దానినే మేము గర్వంగా అనుసరిస్తాము” అంటూ ఆమె రాసుకొచ్చారు. అయితే, భారతీయుల దృష్టి మాత్రం ఆమె సందేశం కంటే ఎక్కువగా ఆమె ధరించిన జుమ్కాలపైనే నిలిచింది.
ఇదిలా ఉంటే… జార్జియా మెలోనీ జుమ్కాలు ధరించడం ఇదే మొదటిసారి కాదు. గతంలో కూడా ఆమె తన ఇన్స్టాగ్రామ్లో పవర్ సూట్పై జుమ్కాలు ధరించిన వీడియోలను పంచుకున్నారు. ఇది భారతీయ సంప్రదాయ ఆభరణాలపై ఆమెకున్న ఇష్టాన్ని తెలియజేస్తోంది.
పాశ్చాత్య దేశాల్లో భారతీయ జుమ్కాలపై ఆసక్తి ఇటీవలి కాలంలో ఎక్కువైంది. గత నెలలో పారిస్ ఫ్యాషన్ వీక్లో ప్రముఖ బ్రాండ్ రాల్ఫ్ లారెన్, తమ కలెక్షన్లో భాగంగా జుమ్కా తరహా చెవిపోగులను ప్రదర్శించింది. అయితే, వాటి మూలాలు దక్షిణాసియా అని చెప్పకుండా ‘వింటేజ్ యాక్సెసరీస్’ అని వర్ణించడంతో భారతీయుల నుంచి విమర్శలు ఎదుర్కొంది.
అయితే, వెస్టర్న్ దుస్తులతో జుమ్కాలను ఎలా స్టైల్గా ధరించవచ్చో మెలోనీ తన సెల్ఫీతో చూపించారు. ఆఫీస్ వేర్ లేదా వెస్టర్న్ దుస్తులతో సంప్రదాయ ఆభరణాలను జత చేయడం ఇప్పుడు ఒక ట్రెండ్గా మారింది. షార్ప్ సిల్హౌట్ దుస్తులతో ఇలాంటి జుమ్కాలు ధరిస్తే ప్రత్యేక ఆకర్షణ వస్తుంది. గోల్డ్ జుమ్కాలు లేత రంగులు, ఆలివ్ గ్రీన్ వంటి వాటిపై, సిల్వర్ జుమ్కాలు నలుపు, నీలం వంటి ముదురు రంగులపై చక్కగా నప్పుతాయి. అయితే, పెళ్లిళ్లకు వాడే బరువైన జుమ్కాలను ఆఫీసులకు వేసుకోకపోవడమే మంచిదని ఫ్యాషన్ నిపుణులు సూచిస్తున్నారు. మొత్తానికి మెలోనీ సెల్ఫీతో ‘జుమ్కా’ మరోసారి గ్లోబల్ ట్రెండ్గా నిలిచింది.
